Espina e Delfín, o principal grupo galego que se encarga do ciclo integral da auga, obtivo unha achega de 7 millóns de euros do Ministerio para a Transición Ecolóxica e Reto Demográfico, do Goberno de España para o seu proxecto de dixitalización do ciclo urbano da auga, sendo a única empresa que conseguiu en solitario fondos para Galicia, dentro do Plan de Recuperación, Transformación e Resiliencia (PERTE).

Con este proxecto beneficiaranse nove concellos, entre eles Negreira. Hoxe foi presentado no noso concello por parte de Carlos García, adxunto á dirección de servizos de Espina e Delfín, e José Monteagudo, xefe de servizo, que estiveron acompañados polo alcalde, Manuel Ángel Leis Míguez. Logo dunha visita á Estación Depuradora de Augas Residuais (EDAR), situada en Negreiroa, comparecían nos micrófonos de Radio Negreira para explicar en qué consiste o proxecto.

Esta axuda será parte dun investimento de máis de 10 millóns de euros que Espina e Delfín destinará a este proxecto nos nove concellos beneficiados: Cartelle; Cerceda; Coirós; Leiro; Negreira; Palas de Rei; Sarria; Vilagarcía de Arousa e Vilanova de Arousa, que suman 80.000 habitantes.

En qué beneficiará a Negreira?

• Instalaranse 3.080 contadores intelixentes de telelectura
• Un caudalímetro nun punto de captación
• Un analizador de calidade nun punto de captación
• Control de procesos na ETAP
• Instalación dun analizador de calidade na Estación Depuradora de Augas Residuais (EDAR)
• Sectorización da rede de abastecemento con 9 contadores
• Unha plataforma xeoespacial GIS
• Modelización de redes e xemelgos dixitais
• Mellora da ciberseguridade
• Aplicación da Intelixencia Artificial (IA) ao control da explotación e calidade da auga
• Plataforma de acceso público de información
• Aplicación informática de xestión de abonados
• Planes directores

Sustitución de 5 bombas existentes e placas solares 

Podcast

O Concello abre as inscricións do Concilia Entroido para facilitar a conciliación ás familias de Negreira nos días sen cole (3, 4 e 5 de marzo), estando dirixido a alumnado de 3 a 12 anos, con prioridade para as familias empadroadas en Negreira.

Dita actividade desenvolvérase nas instalacións do Centro Sociocultural, en horario de mañá, de 8:30 a 14:30 horas. ⁣

Para anotarse pódese facer presencialmente no Rexistro Xeral ou a través da sede electrónica do Concello.

Documentos

Conta atrás para unha das grandes citas das festas do entroido na área de Santiago como son as de Negreira, que este ano se encargará de abrir a orquestra Olympus que volverá actuar en casa despois de dous anos. A última vez foi no entroido de 2023 e este ano amenizarán as vésperas do día grande na praza do Concello, a noite do venres 28 de febreiro, xunto ao disjockey Marco Kintana.

O alcalde de Negreira, Manuel Ángel Leis Míguez cando ao concelleiro de Cultura, José Antonio Villar Caamaño e mailas concelleiras, Teresa Duro Leis e María del mar García Vidal presentaron hoxe a programación festeira.

En canto ao sábado, día 1 de marzo, o desfile de comparsas e carrozas repartirá 5.000 euros en premios. Arrincará ás cinco da tarde desde o Campo dá Feira coa charanga Tíralle do aire para transitar polas principais rúas da vila ata terminar diante da Casa do Concello. As inscricións están abertas na Delegación de Cultura ata o mércores 26 de febreiro. Unha vez remate o desfile, actuará o grupo Atenas e un disjockey na praza do Concello para amenizar a posterior entrega de premios.

A última parada do entroido barcalés será o luns 3 de marzo coa festa infantil de disfraces desde as cinco e media da tarde no pavillón do colexio O Coto, que inclúe animación musical e talleres. 

O Concello pon en marcha unha nova proposta formativa para a veciñanza de Negreira que consiste nun curso destinado a mellorar as competencias dixitais da cidadanía no uso de dispositivos móbiles. Baixo o título: "Acreditación dixital e sedes electrónicas", esta formación ten como obxectivo ensinar aos participantes como obter e utilizar certificacións dixitais e diferentes plataformas de administración electrónica.

O programa abordará temas fundamentais como a obtención do certificado dixital, o uso da chave365 e das distintas variantes do sistema Cl@ve, así como as súas diferenzas. Ademais, trataranse aspectos relacionados coa banca electrónica e o uso de sedes electrónicas de diversas administracións, como o Concello, a Axencia Tributaria, a Seguridade Social, o Sergas, a Xunta ou a DXT.

O curso terá unha duración total de 10 horas e desenvolverase no Telecentro do Centro Sociocultural de Negreira. As sesións serán impartidas os xoves ou venres, en horario de 17:00 a 19:00 horas. O custo da formación é de 15 euros.

As persoas interesadas poden obter máis información ou formalizar a súa inscrición a través da Delegación de Cultura, chamando ao teléfono 676 454 879 ou enviando un correo electrónico a marcos.perez@concellodenegreira.es.

Infórmase da convocatoria de Pleno da Corporación Municipal de Negreira, en sesión extraordinaria e urxente, o xoves, día 6 de febreiro, ás 12:00 horas, no Salón de Plenos da Casa do Concello.

Orde do día

Primeiro.- Xustificación da urxencia da convocatoria.

Segundo.- Plan provincial de cooperación ás obras e servizos de competencia municipal (Plan único de Concellos) “POS + 2025”.

Complácenos anunciar que o Concello vén de recepcionar os fondos procedentes do Centro de Estudos e Investigacións Barcaleses (CEIBAR), que se atopaban en dependencias do instituto Xulián Magariños.

O alcalde, Manuel Ángel Leis Míguez cando aos portavoces do Partido Popular, Rubén Suárez Carballo e do Bloque Nacionalista Galego, José Ramón Blanco Torre recepcionaron os fondos entregados polo que foi director do IES, Adelino Pose Reino e vicedirector, X. Amancio Liñares Giraut cando foi creado este espazo no ano 2011 coincidindo co 30 aniversario do ensino público na comarca de Barcala.

O Concello de Negreira decidiu incorporar os fondos de Ceibar ó patrimonio bibliográfico municipal, facilitando que que exista un espazo para a memoria, consulta e estudos locais dos concellos de Negreira e A Baña. Vaise proceder á catalogación dos fondos que van estar ao servizo do alumnado, investigadores e veciñanza, coa idea que irá agrandándose con novas incorporacións de materiais diversos, con especial atención ás publicacións de autores da comarca de Barcala. 

O venres día 7 de febreiro no Auditorio do Centro Sociocultural, celebraremos a décimo terceira edición da Gala do Deporte ¨Concello de Negreira¨, coa entrega duns premios que recoñecen os méritos deportivos entre a veciñanza do noso concello, quenes co seu esforzo e compromiso levan o nome de Negreira por toda Galicia e tamén por España adiante, outorgados por un xurado integrado por un representante de cada clube, o técnico municipal de Deporte e o director de Radio Negreira.

A 13ª Gala do Deporte comezará ás 21:00 horas e, ademáis dos recoñecementos aos méritos deportivos, tamén haberá actuacións musicais e exhibicións, nunha gala cunha duración aproximada de 90 minutos.

Os galardoados/as na XII edición foron:

Mellor deportista do 2023 – Iván Pazos Puñal (para-kárate).

Mellor deportista promesa masculino – Hugo Pazos Nieto (kárate) e Gonzalo Pérez Fraga (fútbol).

Mellor deportista promesa feminino – Zaira Barreiro Lodeiro (fútbol).

Mellor club 2023 – Escola Akai Ryu (kárate).

Recoñecemento á traxectoria – José M. Rodríguez López (Rodri)

Recoñecemento colaborador co deporte – Niccalia

Mención especial do xurado – Javier Barca Cantorna, a título póstumo

Recoñecemento a CF Agrón- Barcala

Segundo informa a Policía Local, o luns 27, martes 28 e mércores 29 de xaneiro de 2025 vaise a producir un corte total no comezo da rúa de Castelao para tarefas de retirada de cascallos procedentes da demolición de dous inmobles, nos números 6 e 4 da citada da rúa.

Debido á presenza de maquinaria e vehículos pesados na calzada, faise necesario este corte de tráfico, agás acceso a garaxes.

O Concello de Negreira prega desculpen as molestias ocasionadas. 

Un total de 10 centros escolares de Ames, Mazaricos, Santa Comba, Val do Dubra, A Baña, Zas e Negreira participarán o vindeiro xoves 16 de xaneiro no Campionato Escolar Zonal de Campo a Través, nun circuito marcado na explanada do IES Xulián Magariños, nunha proba organizada pola Secretaría Xeral para o Deporte da Xunta de Galicia a través da Agrupación Deportivas Escolarix coa colaboración do Concello de Negreira.

Estarán presentes nenos e nenas de categoría benxamín (2017-2016), Alevín (2015-2014), Infantil (2013-2012) e Cadete (2011-2010).

As distancias e horarios son os seguintes:

Ás 11:00 h. Benxamín fem.: 500 m. (1 volta circuito)

Ás 11:10 h. Benxamín masc.: 500 m. (1 volta circuito)

Ás 11:20 h. Alevíns fem.: 1000 m. (2 voltas circuito)

Ás 11:30 h. Alevíns masc.: 1000 m. (2 voltas circuito)

Ás 11:45 h. Infantil fem.: 1.500 m. (3 voltas circuito)

Ás 12:00 h. Infantil masc.: 1.500 m. (3 voltas circuito)

Ás 12:15 h. Cadete fem.: 1.500 m. (3 voltas circuito)

Ás 12:35 h. Cadete masc.: 1.500 m. (3 voltas circuito)

Ás 13:00 h será a entrega de medaias para os participantes, sendo premiados os tres primeiros clasificados de cada categoría masculina e feminina.

Os mellores clasificados individuais e os mellores equipos participarán na seguinte Fase Intercomarcal de Campo a Través.

A acumulación de árbores e outros materiais orgánicos nos cauces dos ríos e dos regatos é un dos factores que favorece o risco de inundacións durante a tempada de chuvias. Por este motivo, Augas de Galicia leva a cabo, no marco das súas competencias, diferentes traballos de conservación e mantemento que nas próximas semanas se desenvolven de xeito paralelo nos concellos de Negreira e de Ames.

No noso concello, a actuación afecta a uns 900 metros do rego da Portela, entre as parroquias de Santa María de Portor e Santa Baia de Logrosa, moi preto do río Tambre. 

En Ames, afecta a 1,3 quilómetros do rego da Pataleira ao seu paso pola parroquia de San Lourenzo de Agrón, igualmente afluente do Tambre.