O Concello de Negreira informa que o luns 20 de xuño abrirán ó público para a tempada estival, as dúas piscinas municipais ao aire libre do Parque do Coto, prolongándose a tempada até o día 15 de setembro.

O seu horario de apertura durante os meses de xuño e setembro é de 16:00 a 20:30 horas; e durante os meses de xullo e agosto, de 10:00 a 15:00, e de 16:00 a 20:30 horas.

Abonos

Retirar na Delegación de Cultura e Deportes. Prezos:

Mensual: 10 euros

Tempada: 20 euros

Familiar: 30 euros

Familia numerosa: 40 euros

Cursos

Do 1 de xullo ó 30 de agosto, mediante pago dunha cota de 8 euros, entregándose o xustificante do ingreso bancario e maila solicitude cuberta, na Delegación de Cultura e Deportes.

Grupo 1: do 1 ó 29 de xullo, de 10 a 13 horas, de luns a venres (100 prazas)

Grupo 2: do 1 ó 30 de agosto, de 10 a 13 horas, de luns a venres (100 prazas)

Natación para bebés: do 1 de xullo ó 30 de agosto, de 13 a 13:30 horas. De luns a venres.

Natación para adultos e Terceira Idade: de 14 a 15 horas.

O Centro Sociocultural acolle a exposición dos traballos realizados nos diferentes Obradoiros de manualidades e creatividade ¨Animando as parroquias¨, desenvolvidos polo  Concello de Negreira, creacións que van permanecer expostas até o mércores día 29 de xuño na planta baixa.

Durante acto de clausura, tanto o alcalde, Jorge Tuñas Caamaño como a concelleira de Servizos Sociais, María Jesús Veiga Hortas, animaron ás usuarias a continuar o vindeiro curso coas súas actividades, as cales dixo «estimulan as capacidades de creación de fermosos traballos en pintura ou tela».

Parroquias participantes:

Alvite; Aro; Arzón; Bugallido; Gonte; Landeira; Portor; Xallas; A Pena; Liñaio; Logrosa e Negreira (grupos 1 e 2).

Con prioridade para as persoas que teñan participado ou estean a facelo, nas acción específicas impartidas no marco do proxecto RedeXiana2, promovida pola Deputación da Coruña, os mozos e mozas maiores de 18 anos, inscritos como demandantes de emprego e con certificado de escolaridade ou nivel básico e comprensión lectora, poden beneficiarse da acción formativa, de balde, de cara á preparación para a obtención dos permisos de conducir tipo B e do CAP, este último que habilita para a conducción de vehículos de mercancías.

Dita preparación vai ter lugar en Santiago de Compostela, e os interesados de Negreira débense anotar antes do 22 de xuño, no Servizo Local de Emprego, na primeira pranta da Casa do Concello, na rúa do Carme, 3.

Asemesmo, está previsto o inicio para o luns 27 de xuño do curso sobre Montaxe e mantemento de instalacións solares e fotovoltaicas que se vai a realizar no municipio de Ames.

Ábrese a convocatoria a todas as zonas, posto que hai prazas vacantes neste curso cunha duración de 900 horas. O prazo péchase este xoves de xuño. O curso non é acreditado polo que non leva aparellada a obtención do certificado de profesionalidade.

Co gallo da celebración da IV Trofeo Ciclista ¨Concello de Negreira¨, o sábado 25 de xuño, dende as 15:00 ás 21:00 horas, permanecerán pechadas ao tráfico as seguintes rúas:

Avenida das Brañas; rúa Real Club Deportivo da Coruña; rúa Carballiños; rúa Xosé Manuel López Ardeiro; rúa Castelao; rúa Rosalía de Castro e rúa do Tambre.

Para que o evento deportivo se poida desenvolver con normalidade e a máxima seguridade, o Concello de Negreira solicita a colaboración veciñal facendo o menor uso posíbel dos vehículos durante o desenvolvemento da proba.

O Concello de Negreira, a través do seu alcalde, Jorge Tuñas Caamaño, e mailo concelleiro de Deportes, José Daniel Casal, recoñeceu hoxe a traxectoria deportiva do atleta Jorge Crespo Arias, trala consecución o pasado venres 24 de xuño en Elxe, da medalla de ouro no Campionato de España de Atletismo Veteranos, na proba de 5.000 metros en pista ao aire libre, dentro da súa franxa de idade, de 35 a 39 anos.

Jorge, campión galego de Maratón en A Coruña no ano 2012, é a súa vez o vixente campión galego en 3.000 metros en pista cuberta, coa medalla acadada o pasado 28 de febreiro, tamén na Coruña, e actual campión galego de campo a través veteranos, o 6 de marzo, en Fene, ademáis de ter rematado terceiro no galego absoluto celebrado este ano en Ribadavia (Ourense).

Na distancia de 3.000 metros foi quinto no Ourense Termal, cunha marca de 08:48:02 a finais de maio, e a mediados deste mes de xuño participou coa Selección Galega de Atletismo nos Campionatos de España por Autonomías, celebrados na localidade madrileña de Alcobendas.

O seu reto máis inmediato é o Campionato Galego Absoluto en pista ao aire libre, na distancia de 5.000 metros, o vindeiro 16 de xullo en Ourense, tralo cal iniciará a súa preparación para tomar parte o 20 de novembro na Maratón de Valencia, onde acumula tres participación. No 2015 acadou a súa mellor marca con 2 horas e 27 minutos, sendo o sexto español n aliña de meta e posto 33 na xeral absoluta. Pero antes desa gran cita do ano, Jorge voltará á capital do Turia, no mes de outubro, coa intención de cubrir a Media Maratón de Valencia, a cal vaille server de test importante cara a distancia longa.  

Desexámoslle moitos máis éxitos na súa carreira deportiva, sempre levando o nome de Negreira por toda España.

A Escola Municipal de Música do Concello de Negreira bota o peche ó curso 2015/2016 cunha audición final do seu alumnado, por instrumentos, este venres día 1 de xullo, a partir das 19:30 horas no Auditorio do Centro Sociocultural. O Concello convida ás familias e veciñanza a asistir a este evento.

Compre salientar que o prazo de matrícula para o vindeiro curso xa está abertopolas tardes na Casa da Cultura.

Programa da audición:

O pleno extraordinario e urxente celebrado onte á noite pola Corporación Municipal de Negreira, prestou a súa aprobación inicial ó proxecto de Orzamento Xeral para o 2016 por un importe de 5.075.179,40 euros, tanto no capítulo de ingresos como de gastos. Tralo debate plenario, os orzamentos foron aprobados cos seis votos a favor do equipo de goberno (PSOE), a abstención dos dous concelleiros de Cidadáns e, co voto en contra dos cinco edís do Partido Popular.

O voceiro do PP, Manuel Hombre Porto, xustificou o voto en contra do seu grupo por non terse atendido a súa demanda para que se disgregasen máis as partidas de gasto, ademáis de por non contemplar propostas aprobados polo Pleno para construir a Variante do Tamara e crear un Fondo de Cohesión Social. Pola súa banda, dende Cidadáns de Negreira deron un «voto de confianza» tralo primeiro ano do executivo do PSOE coa súa abstención. O seu voceiro, José Manuel López Lago sinalou que estará vixilantes para que se cumpla o obxetivo de reducción da débeda cos proveedores, a cal supera o millón de euros.

Devandito acordo plenario débese publicar agora no Boletín Oficial da Provincia (BOP), e abrir un prazo de exposición pública por 15 días hábiles dende a data de publicación.

No capítulo de ingresos, o Concello estima unha recaudación de 1.586.000 euros por impostos directos e, de 35.000 por impostos indirectos. Por tasas, prezos públicos e outros ingresos, a estimación é de 601.210 euros, mentres que por transferencias correntes ascende a 2.190.454 euros. Por transferencias de capital a cifra é de 382.245 e por pasivos financieiros de 274.468 euros.

No capítulo de gastos, os de persoal ascenden a 1.900.394 euros, e os de bens correntes e servizos a 2.035.042. En investimentos reais a cifra é de 427.890 e no de pasivos financieiros de 461.468. Por transferencias correntes, os gastos sitúanse en 242.382 e por gastos financieiros en 8.000 euros.

Investimentos

Plan de Obras e Servizos (POS) 2016: Inclúen os asfaltados de pistas de Bouzas a Zas, Marcelle e outros por 96.195 euros; e mailo formigonado de pistas en Negreiroa, Bellalta e outras por 58.381 euros.

Plan de Acción Social (PAS) 2015: Inclúen a Área Recreativa de Negreiroa por 28.290 euros; a cuberta da pista de pádel por 58.572, e mailas obras de accesibilidade e seguridade vial por 140.806 euros.

O Plan Complementario FEADER 2014/2020 inclúe unha partida de 13.444 euros.

Como cada 1 de xullo comezaron as actividades permanentes do Concello de Negreira para o presente verán: cursos de natación na piscina municipal; os obradoiros Diververán e mailo Campamento urbano Respira.

E tamén rematou o curso na Escola Infantil Municipal, para os nenos e nenas de 0 a 3 anos, co tradicional festival de fin de curso.

Os obradoiros Diververán botaron a andar cunha trintena de rapaces inscritos, en dúas quendas, de 10:30 a 12:00 horas, e de 12:00 a 13:30 horas, na pranta baixa do Centro Sociocultural, sendo atendidos por dous monitores. Os talleres de manualidades e xogos desenvolveranse durante os meses de xullo e de agosto, polas mañás.

En canto ao Campamento urbano Respira, o seu horario é de 08:45 a 14:15 horas, no Colexio do Coto. Nesta primeira quenda do mes de xullo son catorce os nenos e nenas participantes na actividade desenvolvida polo Centro de Información á Muller (CIM), dependente do Concello de Negreira.

Cultura a pé de rúa

Este programa de espectáculos na rúa que tan boa acollida ten cada verán en Negreira, inclúe catro citas que comezan este venres 1 de xullo co espectáculo de clow a cargo de Nono, ás 21:00 horas, na rúa de Castelao.

O Cultura a pé de rúa continuará o venres 22 de xullo, con Jano sen medidas, un espectáculo multidisciplinar, no Parque do Coto, ás nove da noite. En agosto haberá dúas actuaciónsmáis: o venres 5 na Praza do Concello, co Mago Albert, e o mércores 31 con Bicirco, un espectáculo de maxia e malabares, no Parque do Coto.

As brigadas municipais de Negreira e Ames comezaron hoxe os traballos de roza da maleza acumulada ás beiras do río Tambre, ao seu paso pola paraxe natural de Ponte Maceira, cumprindo así, cunha das primeiras medidas de cara á posta en valor deste encrave paisaxístico de gran beleza e, polo que cada día pasan centos de peregrinos na súa ruta cara Fisterra e viceversa.

Até Ponte Maceira desprazaronse os alcaldes de Negreira e Ames, Jorge Tuñas e José Miñones, respeitivamente, xunto cos concelleiros de Obras e Servizos, Manuel Ángel Leis Míguez e Blas García, de Negreira e Ames, respeitivamente.

O seguinte paso vai ser a limpeza da maleza que hai nas beirarrúas e na calzada da ponte, todo ilo, á espera de que unha empresa especializada en traballos en altura comece coa limpeza do propio viaducto, algo que agardan poida completarse nas vindeiras semanas.

Compre dicir que froito desta colaboración supramunicipal, o vindeiro venres 15 de xullo, vai ter lugar a segunda actividade do programa Noites en vela. Trátase da actuación de Xavier Díaz e mailas pandereteiras Maianas, a partir das dez da noite. A particularidade desta actividade nocturna e o encrave escollido polo Concello de Ames, sobre os penedos que hai no lado amiense e, para o cal instalarase unha pasarela que permita o acceso dos músicos até os penedos.

A terceira e última actividade do Noites en vela vai selo venres 19 de agosto, ás 22:00 horas coa actuación do cuarteto Tetramop, de música clásica e cando se vai repetir a experiencia do verán de 2015 co apagón do alumado público para prender as velas colocadas por toda a ponte e arredores. 

Co gallo da celebración das Festas de San Cristovo, do 7 ó 10 de xullo, o Concello de Negreira informa da prohibición do acceso rodado e mailo estacionamento en toda a Praza do Concello, a partir do xoves ás oito da mañá. Debido á montaxe de escenarios e maila infraestructura paralela, faise necesario non aparcar en todo o recinto.

Asemesmo, informase que a parte final da rúa de Castelao (zona Centro de Saúde e contorna do IES), tamén permanecerá cortada á circulación, agás residentes, Garda Civil e Urxencias sanitarias.

Programa

Xoves 7.- A partir das 23:00 horas, espectacular verbena coas orquestras Panorama e París.

Venres 8.- Dende as 11:00 horas pasacalles coa charanga MeKánica.  Ás 13:00 h concerto da Banda Ateneo de Negreira, na rúa do Carme (diante da Casa do Concello). Sesión vermú charanga Mekánica.

Pola noite, verbena coas orquestras Aché e Fania.

Sábado 9.- Ás 12:00 horas, misa cantada na Capela do Cotón, na honra a San Cristovo e procesión motorizada. Pasacalles co grupo Os Viqueiras de Ordes. Xantar de confraternidade no Refuxo de Cobas.

Pola noite, verbena cos grupos Triunfo e Alkar.

Domingo 10.-   XII Feira Cabalar, na chaira a carón do IES Xulián Magariños, organizada pola Asociación Cabaleiros de Negreira.

Ás 10.30 h. horas saída da ruta

11.30 h. Concurso social de saltos

13:00 h. Chegada da ruta cabalar

14:30 h. Xantar

16.30 h. Concurso de enganches, en categorías: sulky; limoneras; troncos; cuartas.

18:30 h. Gran Ximcana, con premios aos tres mellores xínetes.

19:30 h. Entrega de trofeos

Haberá servizo de cantina e polbería.