A Corporación Municipal reunida este luns 14 de marzo en sesión ordinaria do Pleno, acordou por unanimidade efectuar as modificacións solicitadas pola Deputación da Coruña entorno ó Plan de Acción Social (PAS) 2015. Tamén refrendou o acordo do agrupamento dos concellos de Negreira e A Baña cara a subvención contemplada pola Consellería de Presidencia, Administracións Públicas e Xustiza, pola que os dous concellos compartirán unha actuación de aforro enerxético no alumado público, nas zonas de Covas e San Cibrán.

Os tres grupos políticos, por unanimidade, deron luz verde ó Plan de Aforro e Investimento (PAI) 2016, financiado pola Deputación da Coruña e, cuxo importe ascende a 274.468 euros, o cal será empregado íntegramente para amortizar débeda bancaria, polo que aforraránse os xuros do préstamo a liquidar, xa que conta con dous anos de carencia e a devolver nun prazo de dez anos.

O Pleno tamén prestou aprobación a un recoñecemento extraxudicial de créditos por un importe de 779.300 euros. Trátase de facturas por servizos prestados e non recoñecidas ó peche do último exercicio (31 de decembro de 2015), e correspondentes aos anos 2014 e 2015. Este punto foi aprobado únicamente cos votos a favor dos seis concelleiros do Goberno, coa abstención tanto do Partido Popular como de Cidadáns de Negreira.

Na sesión ordinaria do mes de marzo, prestouse aprobación a un total de seis mocións presentadas polo grupo municipal de Cidadáns (C´s), relativas a: Solicitude ante o Sergas, da cobertura do servizo de matrona, amortizado na actualidade, tendo en conta que as usuarios son derivadas cara o municipio da Baña; a creación dun Fondo de Cohesión Social coa porcentaxe do 0,1% que mantívose para este ano no IBI; emprazamento dun futuro Centro de día e Residencia de maiores, no terreo lindante co Centro de Saúde; trasladar o almacén de alimentos de Servizos Sociais para un local máis axeitado que o baixo do Auditorio; acometer unha serie de melloras e adaptabilidade no exterior da Escola Infantil Municipal, e por último, a emisión dun informe bimensual por parte da Intervención municipal para facer un seguimento público da situación económica do Concello.

Proposta Letras Galegas

A Corporación tamén aprobou unha proposta dirixida ó plenario da Real Academia Galega (RAG), de dedicación do Día das Letras Galegas 2017 ó poeta barcalés, Xosé Manuel López Gómez ¨Ardeiro¨.

Asemesmo, deuse lectura e aprobación, a unha declaración institucional dos tres partidos que conforman a Corporación municipal entorno ó proxecto presentado pola Asociación Cultural Afonso Eanes, en relación coa Lei de Memoria Histórica para homenaxear aos represaliados durante a Guerra Civil e maila Ditadura franquista. A voceira do goberno, María Jesús Veiga Hortas, expresou o rexeitamento de calquera acción golpista e, coincidindo coa proposta de Afonso Eanes expresaba o seguinte: «será esta Corporación a que decidirá, cómo, cando e onde, realizar dita homenaxe para todos aqueles que foron perseguidos pola súa ideoloxía relixiosa ou política, e que propiciaron a instauración da democracia».

Conscientes da importancia dun servizo das características da Escola Infantil Municipal, unha das prioridades do Concello é renovar o seu funcionamento e maila calidade do servizo en sí. De aí, que a Concellaría de Servizos Sociais e Educación remitíse ás familias, unha carta anunciándolle a intención de facer unha modificación do Regulamento de Organización e Funcionamento da Escola Infantil Municipal, a fin de adaptalo ás necesidades dos/as usuarios/as e que sexa o máis beneficioso posible tanto para as nais e pais como para os nenos e nenas.

Esta labor de modificación acometerase á maior brevidade posible coa intención de que os cambios efectuados entren en vigor este mesmo curso, e xa que logo, considerando de interese as propostas que as familias usuarias poidan aportar, solicítase a participación de tal xeito que acádase o mellor resultado para o bó funcionamento da Escola, especialmente en todo o relacionado coas súas necesidades do servizo respecto ós horarios e os cambios destos, tanto á hora de apertura como de peche, o funcionamento da instalación durante o mes de xullo e, a posibilidade de que a Escola permaneza aberta durante todo o mes de agosto, así como calquera outra cuestión que lle resulte de interese ás familias.

Tódalas suxerencias, propostas e inquedanzas, pódenas entregar mediante escrito presentado no Rexistro Xeral do Concello de Negreira, á atención da concelleira de Servizos Sociais e Educación, María Jesús Veiga Hortas, tendo como data límite para elo, o mércores 23 de marzo.

O Concello de Negreira informa da apertura do prazo para a renovación de matrícula, e de solicitude de novo ingreso para nenos e nenas de 0 a 3 anos, na Escola Infantil Municipal do Concello de Negreira para o próximo curso. 

• RENOVACIÓN DE MATRÍCULA

Ábrese o prazo de renovación de matrícula para o curso 2.016 - 2.017 dos alumnos e alumnas  da Escola Infantil Municipal de Negreira que xa asistiron durante o curso 2.015 – 2.016.

PRAZO: do 1 ó 15 de abril

LUGAR: Rexistro Xeral do Concello de Negreira, en horario de 9 a 14 horas

DOCUMENTACIÓN:
                              . última declaración da renda dos pais.
                              . xustificación da situación laboral (actual) dos pais.
                              . calquera outra circunstancia que varíe a situación socio-familiar.    
      

• SOLICITUDE DE NOVO INGRESO

Ábrese o prazo de inscrición de nenos e nenas 0 a 3 anos na Escola Infantil Municipal para o curso 2.016 - 2.017.

PRAZO: do 1 ó 15 de abril.

LUGAR: Rexistro Xeral do Concello de Negreira, en horario de 9 a 14 horas

DOCUMENTACIÓN:
                              . solicitude de novo ingreso.
                              . certificado de convivencia.
                              . DNI do pai,nai ou titor/a.
                              . libro de familia.
                              . última declaración da renda de todos os membros da unidade familiar.
                              . última nómina ou xustificación da situación laboral dos pais.
                              . tarxeta de desempregado/a.
                              . outros documentos que procedan, nos que consten incidencias familiares, económicas e sociais puntuables no baremo.                                             

                               .informe dos servizos sociais nos supostos  de que sexa necesario por falta de acreditación documental suficiente ou pola situación especial na que viva a unidade familiar.                                
                              . documentación complementaria: certificado médico do neno/a, carné de vacinacións actualizado, fotocopia da tarxeta sanitaria, dúas fotos do neno/a e impreso de domiciliación bancaria.

Venres 1 abril: : Compañía Caramuxo, 18:00 h.
Obra: "Pavillón Lino"
Duración: 45 min. PÚBLICO: Infantil

The momento Impro, 23:00 h.
Obra: "Entreliñas"
Duración: 50 min. PÚBLICO: + 18 anos
CAFE BAR O COTÓN

Sábado 2 abril: : Metátese Teatro (Palas de Rei), 21:00 h.
Obra: "A Saco!"
Duración: 60 min. PÚBLICO: T.P.

Sábado 9 abril: The Momento Impro, 21:00 h.
Obra: "Maquinando"
Duración: 60 min. PÚBLICO: +18 anos

Domingo 10 abril: Animundis Artes, 18:00 h.
Obra: "Animundis"
Duración: 60 min. PÚBLICO: Infantil

Venres 15 abril: Andaravía Teatro (Vedra), 21:00 h.
Obra: "Maniféstate"
Duración: 60 min. PÚBLICO: T.P.

Sábado 16 abril: Cayetano Lledó, 18:00 h.
Obra: "Sherlock Holmes"
Duración: 50 min. PÚBLICO: Infantil

Venres 22 abril: Aquelando Teatro (Muros), 21:00 h.
Obra: "No Día a Día"
Duración: 60 min. PÚBLICO: T.P.

Carlos Meixide Monólogo, 23:00 h.
Obra: "No Pensar"
Duración: 60 min. PÚBLICO: + 18 anos
BAR FONTANA

Sábado 23 abril: Debullando Teatro (E.M.T.N.), 21:00 h.
Obra: "Old Town"
Duración: 80 min. PÚBLICO: + 12 anos

Venres 29 abril: Compañía Voadora, 21:00 h.
Obra: "Calypso"
Duración: 60 min. PÚBLICO: + 18 anos

Sábado 30 abril: Ainé Producións, 20:30 h. / 22:30 h.
Obra: "Curtis & Teixeiro"
Duración: 90 min. PÚBLICO: + 18 anos

Hoxe dáse o pistoletazo de saída a unha nova edición do Ciclo de Teatro, do Concello de Negreira, o cal traerá representacións a nosa vila durante as cinco fins de semana do mes de abril, nunha mistura de grupos afeccioados e profesionais, cuxo colofón pórano o sábado día 30 as dúas funcións de Curtis&Teixeiro, con Xosé A. Touriñán e Federico Pérez.

Para abrir o Ciclo de Teatro, hoxe ás 18:00 horas temos no Auditorio de Negreira á compañía Caramuxo Teatro, coa obra ¨Pavillón Lino¨. Trátase dunha proposta escénica para toda a familia, que nace para homenaxear ao desaparecido ¨Pavillón Lino¨, da Coruña, un espazo cultural de estética modernista adicado a todo tipo de actividades artísticas. Esta obra ten unha duración de 45 minutos.

E pola noite, ás 23:00 horas, o Café Bar O Cotón acolle un espectáculo baseado na improvisación, onde ninguén sabe o que vai a ocorrer en cada representación. Trátase de ¨Entreliñas¨, a cargo da compañía The Moment Impro.

E compretando a primeira fin de semana do Ciclo de Teatro, o sábado é a quenda para Metátese Teatro, de Palas de Rei, coa obra ¨A saco¨. A cita é ás 21:00 horas no Auditorio para ver un espectáculo creado a través do xogo e da improvisación que se achega a diferentes universos temáticos: a violencia de xénero, a opresión dos máis febles á ludopatía, ou as relación sentimentais. É unha obra coral que combina linguaxe corporal, física e verbal, adicada a aqueles que non teñen voz. Ten unha duración de 60 minutos, sendo apta para tódolos públicos. 

Resto do mes

Nove citas máis compretan o Ciclo de Teatro, os venres e sábados do mes de abril, coa excepción do domingo 10 coa compañía Animundis Artes, e a obra musical do mesmo nome dirixida a toda a familia, a partir das seis do serán no Auditorio. O resto son: ¨Maquinando¨, o sábado 9 con The Moment Impro (21:00);  Maniféstate, de Andaravía Teatro, o venres 15 (21:00); Sherlock Holmes, teatro infantil con Cayetano Lledó, o día 16 (18:00); No día a día, de Aquelando Teatro, de Muros, o venres 22 (21:00), e ¨No pensar¨, un monólogo de Carlos Meixide (23:00), no Bar Fontana (23:00); ¨Old Town¨, coa Escola Municipal de Teatro, o sábado 23 (21:00); Calypso, coa compañía Voadora, o venres 29 (21:00), e para rematar, Curtis&Teixeiro, o sábado 30 de abril.

O sábado 2 de abril celébrase o Día Mundial de Concienciación sobre o Autismo, cuxo lema é: Inclusión, tolerancia e respeto. Axudar a darlle visibilidade a un trastorno que cada vez é máis común entre a poboación: 1 de cada 150 nenos, é a idea que hoxe mesmo levaba á Escola Infantil Municipal, a realizar unha saída cos nenos/as polas rúas da vila portando un testemuño azul con este lema: ‪#‎PásaloPorElAutismo. Foron recibidos polo alcalde de Negreira, Jorge Tuñas Caamaño, na Casa do Concello.

O movemento asociativo do autismo de todo o mundo celebra o Día Mundial de Concienciación sobre o Autismo co obxecto de concienciar á sociedade sobre este tipo de trastorno e promover a inclusión social das persoas con Trastorno do Espectro do Autismo (TEA).

No ano 2007 a Asemblea Xeral das Nacións Unidas (ONU), moi preocupada pola prevalencia do autismo en todas as rexións do mundo, declarou por unanimidad o 2 de abril como Día Mundial de Concienciación sobre o Autismo.

Por resolución 62/139 do 18 de decembro de 2007 (A/RES/62/139), a Asemblea instou aos Estados membros, ás organizacións competentes do sistema das Nacións Unidas e, a outras organizacións internacionais, así como á sociedade civil, incluídas as organizacións non gubernamentais e ó sector privado, a que observen debidamente este día e tomen as medidas para a toma de conciencia a través da sociedade sobre os nenos/as con autismo.

Cáese da programación do presente Ciclo de Teatro, a actuación da compañía Animundis Artes, co seu espectáculo de teatro infantil e musical ¨Animundis¨, que inicialmente fora programada para este domingo 10 de abril, ás seis do serán, no Auditorio do Centro Sociocultural.

Os motivos da súa anulación non trascenderon, pero dende a organización apuntan a unha desavenencia sobre o acordado inicialmente entre o Concello e a axencia que representa a devandita compañía de teatro infantil que debería actuar este domingo pola tarde.

Os Concellos de Negreira, Ames e Teo, presentan un total de nove equipos de estudantes, que cursan estudos de educación secundaria e bacharelato, á quinta edición do Club de Debate, cuxa fase clasificatoria de zona celébrase este venres 8 de abril, no Auditorio de Negreira.

 Esta iniciativa busca traballar na mocidade conceptos como a comunicación, a oratoria, a tolerancia e o pensamento crítico, ao tempo que fomenta o uso oral lingua en contextos formais e informais.

Galicia pode vivir do sector primario, vai selo tema sobre o que debaterán os equipos de escolares que participen este ano na fase clasificatoria de zona do Club de Debate. Oitenta estudantes de institutos dos tres concellos participan nesta fase que por vez primeira ten lugar no noso concello.

O Club de Debate é unha iniciativa impulsada dende os servizos de Normalización Lingüística municipais na que nesta edición participan once concellos: Ames, O Carballiño, Carballo, A Coruña, Ferrol, Narón, Negreira, Pontevedra, Rois, Santiago de Compostela e Teo. Leva xa cinco cursos organizándose de xeito cooperativo e coordinado entre varios concellos e cunha moi boa acollida dentro da comunidade escolar.

Antes da fase clasificatoria de zona do Club de Debate, realizouse  unha xornada formativa para todo o alumando participante que tivo lugar a finais do pasado mes de xaneiro, no Pazo da Peregrina, en Bertamiráns. Nela participaron todos os equipos anotados de Ames, Teo e Negreira.

Esta é unha das zonas con maior participación no certame, xa que se presentan 9 equipos, formados por un total de 80 estudantes e 7 profesoras e profesores. De Ames participan 6 equipos (1 do IES do Milladoiro e 5 do IES Plurilingüe de Ames, situado en Bertamiráns), 2 equipos do IES Xulián Magariños de Negreira e 1 equipo do IES de Cacheiras de Teo.

Xornada de formación práctica

A actividade desenvolvida en xaneiro centrouse en formar e preparar os equipos para o certame en técnicas de expresión oral e habilidades sociais e comunicativas. Tamén se deron a coñecer as normas, tempos, estrutura… da dinámica de funcionamento do certame, co obxectivo de favorecer a posta en situación por parte dos equipos participantes. A maiores diso, abordáronse técnicas de busca de información, preparación de argumentos e roles, posicionamentos a favor e en contra...

A xornada de rematou cunha simulación de debate por equipos. Nesa simulación, os equipos prepararon en pouco tempo e defenderon nun animado debate argumentos a favor e en contra sobre a idoneidade ou non dos deberes escolares.

Os dous equipos gañadores deste primeiro enfrontamento participarán, xunto cos gañadores das outras zonas, na fase final do Club de Debate, a cal terá lugar o vindeiro día 30 de abril, en Pontevedra. O tema da final galega será: En galego, hai un mundo de cousas boas.

O alcalde de Negreira, Jorge Tuñas Caamaño, e mailo deputado de Cooperación cos Concellos, Xosé Regueira, asinaron hoxe un convenio polo que a Deputación da Coruña achega 144.623,74 euros para a realización do proxecto de mellora de infraestructuras públicas da obra de aglomerado en quente e formación da rede de saneamento de augas pluviais, na rúa Nelson Mandela e en Vilachán, así como aglomerado nun treito da rúa Rosalía de Castro. A achega da Deputación supón o 80% do total  de 180.779,67 €.

O proxecto Apego, vén de ampliar horizontes. Impulsado pola Coordinadora de Traballadores e Traballadoras de Normalización da Lingua (CTNL), nel, dende a firma do convenio de colaboración en marzo do 2015, participaban até o de agora os concellos de A Baña, Carballo, Carnota, Ferrol, Narón, Negreira, Ourense, Pontevedra, Redondela, Rois, Santiago e Vigo.

Este sábado, no Centro Ágora de A Coruña, rubricouse a adhesión de once novos municipios: Ponteceso, Vimianzo, A Coruña, Ames, Mazaricos, Moaña, Muros, Oleiros, Rianxo, Ribadeo e Teo. Serán así 23 concellos e as actividades, cun amplo seguimento e éxito, chegarán a máis dun milleiro de habitantes.

O programa Apego está centrado na promoción e a transmisión da lingua galega aos máis pequenos. Na xornada do sábado actuaron Xabier Díaz e Guillerme Díaz, nun acto que contou coa asistencia do alcalde do Concello de Negreira, Jorge Tuñas Caamaño, e maila concelleira de Educación, María Jesús Veiga Hortas, xunto coa técnica de Normalización Lingüística da Agrupación A Baña-Negreira, Carme Pereiro.