A mellora de servizos básicos é o principal destino dos fondos que recibirá o Concello de Negreira con cargo ao Plan Único (POS+2018).

Dende a súa creación no ano 2017, o Plan Único permite aos concellos unha flexibilidade total á hora de investir os fondos que lles asigna a Deputación da Coruña. «En lugar de propoñer unhas axudas específicas, a Deputación permite aos concellos escoller as súas prioridades», segundo explica o seu presidente, Valentín González Formoso, quen sinalou que a institución provincial «xoga un papel fundamental para axudar aos concellos a ofrecer máis e mellores servizos públicos fundamentais, financiando obras que moitas veces os municipios rurais non poderían acometer por si mesmos».

Neste sentido, o Plan Único permite paliar a carencia de axudas específicas para servizos que os concellos están obrigados a subministrar, coma as redes de sumidoiros ou o acceso aos núcleos de poboación, permitíndolles aos municipios destinar os fondos que estimen necesarios a estas actuacións.

O Concello de Negreira investirá 317.944,04 euros en dous proxectos:

1) Asfaltado e formigonado de pistas en San Vicente e outros.

2) Construcción dunha senda peonil entre A Barquiña e A Chancela.

A Deputación da Coruña destina este ano un total de 7.797,73 € a apoiar á agrupación de Protección Civil de Negreira, dentro das axudas publicadas hoxe no Boletín Oficial da Provincia para un total de dezaito agrupacións de Protección Civil, quenes reciben o apoio da Deputación para dotarse de novos equipamentos, entre aqueles concellos de menos de 20.000 habitantes.

En total, a Deputación da Coruña inviste 110.486 euros en dúas liñas de axudas co obxectivo de “fomentar a importante labor diaria e o gran servizo público que prestan, especialmente no ámbito rural os voluntarios destes servizos”, segundo destacou hoxe o seu presidente, Valentín González Formoso.

O BOP publica hoxe a concesión dunha destas liñas de subvencións, dotada con 81.447,03 euros e que está destinada a financiar investimentos que se realicen durante o ano 2018.

Trece agrupacións de Protección Civil recibirán entre 4.000 e 12.000 euros para a adquisición de equipamentos, equipos e ferramentas necesarias para os rescates e intervencións, elementos de transporte, materiais de comunicacións ou equipamento informático e aplicacións móbiles.

Un grupo duns sesenta camiñantes de Guimarães (Portugal), fixeron parada este domingo na Caseta de Información ó Peregrino para selar as súas credenciais. Tratouse dunha expedición que está a cubrir o Camiño de Fisterra por etapas,  e nesta primeira xornada cubriron os 21 quilómetros da etapa entre a Praza do Obradoiro e a vila de Negreira.

En Negreira, agardábaos un autobús para levalos de volta cara Guimarães. Nun mes agardan voltar ao Val de Barcala para facer a seguinte etapa que lle levará a cubrir o traxecto entre a vila e Olveiroa, xa no municipio de Dumbría.

Este grupo de Portugal foron dos últimos peregrinos en achegarse á Caseta de Información, que hoxe 15 de outubro, pecha as súas portas na presente tempada alta de camiñantes, despois da apertura da atención ao público a comezos do mes de maio, batendo os seus mellores rexistros.

As operadoras de telefonía móbil (Movistar, Vodafone e Orange), comezarán a ofrecer en Negreira servizos sobre a rede 4G na banda 800MHz, o que permitirá á veciñanza gozar de conexións móbiles de alta velocidade sobre tecnoloxía LTE (4G), cunha mellor cobertura no interior dos edificios e maior extensión xeográfica.

Para garantir a compatibilidade da nova tecnoloxía coa Televisión Dixital Terrestre (TDT), os operadores puxeron en marcha Llega800, entidade que é a encargada de solucionar calquera afectación na recepción do sinal de televisión.

Coa chegada do novo 4G a Negreira, continua o proceso de implantación que se está realizando de forma paulatina por toda a xeografía nacional. Para comprobar os concellos onde xa están activos estes servizos pódese consultar no enlace:

O despregue 4G enmárcase no establecido no Real Decreto 805/2014, de 19 de setembro, con data 1 de abril de 2015 na que se procedeu á liberación das frecuencias entre 790MHz e 862MHz (canles de 61 ao 69 de UHF), que ata entón se empregaban para a recepción da Televisión Dixital Terrestre, proceso tamén coñecido como Dividendo Dixital. A partir de entón, ditas frecuencias foron asignadas ás operadoras de telefonía móbil para prestar os seus servizos 4G.

Principais vantaxes

Coa rede 4G abriuse a porta a innovadores servizos e aplicacións, ademais de proporcionar significativas melloras tanto na velocidade de descarga, como de envío de datos, imaxes, música ou contidos audiovisuais de alta definición- ou permitir sacar o máximo partido a aplicacións online, como os videoxogos.

A nova xeración da tecnoloxía 4G tamén facilita a introdución de novos servizos no área empresarial e das administracións públicas, como aplicacións empresariais en movilidade con alto contido multimedia ou o uso da videochamada, entre outros.

Ademais a maior cobertura que alcanza o 4G na banda de 800MHz mellorará o servizo no interior de edificios e será a banda que permita estender xeográficamente o servizo de forma eficiente.

Para garantir esta compatibilidade, Llega800 presta aos cidadáns unha serie de servizos gratuitos que inclúen, por unha banda, unha actuación previa, grazas á cal os cidadáns que residan en zonas de maior afectación recibirán unha comunicación no seu domicilio que lles informará de que a partir dese momento poderán solicitar de forma gratuita a adaptación da antena do seu edificio para evitar posibles incidencias.

E, por outro, un procedemento correctivo, tralo aceso das estacións, polo que Llega800 encargarase de atender aos usuarios afectados xestionando e resolvendo posibles afectacións tamén sen custo algún.

Para xestionar estes servizos, púxose a disposición dos cidadáns un teléfono de atención gratuito:  900  833 999

E unha páxina web: https://www.llega800.es/index.php

O Boletín Oficial da Provincia da Coruña (BOP), publica na súa edición de hoxe venres 19 de outubro, o anuncio relativo ao levantamento de actas previas á ocupación de terreos pola expropiación na estrada DP 5603 Negreira a Marco do Cornado, de cara a execución do proxecto de sendas peonís polo Camiño de Fisterra-Muxía, nos seguintes catro treitos:

1) Punto quilométrico 1+430 ao 2+170

2) Punto quilométrico 7+300 ao 7+820

3) Punto quilométrico 8+750 ao 10+770

4) Punto quilométrico 11+110 ao 12+900

Cabe recordar que o Pleno da Corporación Provincial en sesión celebrada o día 23 de febreiro de 2018 aprobou o Plan de Sendas Peonís, na súa primeira fase, cun proxecto que ascende a 893.378 euros, ascendendo o valor da expropiación a: 119.116 euros.

O citado plan foi exposto ao público mediante anuncio publicado no Boletín Oficial da Provincia, e non téndose formulado reclamación algunha referida a esta obra, e polo que cítase, a fin de proceder ao levantamento das actas previas para determinar os dereitos afectados, o valor destes e os prexuízos determinantes da rápida ocupación, aos titulares dos bens e dereitos afectados, cuxas fincas e superficies totais en metros cadrados afectadas, aparecen na relación de titulares.

O lugar será a Casa da Cultura de Negreira, o o xoves día 8 de novembro de 2018, en horario de 16:30 a 19:00 horas.

Ao devandito acto deberán acudir os titulares afectados, persoalmente ou ben representados pola persoa debidamente autorizada para actuar no seu nome, achegando os documentos acreditativos da súa titularidade: Documento Nacional de Identidade; Tarxeta do Número de Identificación Fiscal e o último recibo do Imposto sobre Bens Inmobles (IBI), podendo facerse acompañar á súa costa, se o estiman oportuno, dos seus peritos e notarios.

Anuncio BOP

O cómico Juan Muñoz, o que fora célebre membro do popular dúo Cruz y Raya, xunto a José Mota, actúa esta noite no Ciclo de monólogos de Negreira para goce de quenes se acheguen ao Auditorio do Centro Sociocultural, a partir das 21:30 horas. As entradas teñen un prezo de doce euros.

Juan Muñoz, quen actualmente dirixe o teatro do hotel Gandía Palace, tamén segue en ruta co seu propio espectáculo, no que mestura humor e música con personaxes como Juan de Díos, ou o morito Juan.

Outra das súas facetas é a de actor de cine e especialista en dobraxes. De entre todos os personaxes de películas de animación, destaca por poñerlle voz ao ogro Shrek.

Onte domingo 21 de outubro, Manuel Federico Quintáns Otero, o zapateiro da Chancela, alcanzaba os 100 anos de vida, nunha xornada na que estivo acompañado dos seus cunha comida e onde non faltaron os parabéns de familiares e veciños por esta espléndida celebración.

Tamén o alcalde de Negreira, Jorge Tuñas Caamaño, achegábase ata o seu domicilio para entregarlle un ramo de flores e un agasallo en nome do Concello de Negreira, felicitándoo en persoa.

Federico, como lle coñecen, ten unha memoria prodixiosa, e lémbrase de moitas anécdotas de Negreira e das familias da contorna. O seu segredo é ler moito e comer ben, segundo él mesmo di, pois non fai dieta algunha, e nunca sufriu doenzas importantes, agás que foi operado nunha ocasión dunha hernia.

Comezou con apenas doce anos a aprender o oficio de zapateiro, e logo da Guerra Civil, onde loitou na Fronte de Asturias, decidiu instalarse pola súa conta na Chancela, casándose máis tarde e tendo unha filla que lle deu dous netos, e agora, dende este ano, tamén é bisavó dunha netiña chamada Ana.

A presente convocatoria ten por obxecto a concesión dos premios do VIII Concurso de relatos curtos e cartaces gráficos ¨Loita contra a violencia de xénero¨, promovido dende o Concello de Negreira, a través do Centro de Información á Muller (CIM), co fin de sensibilizar á veciñanza sobor desta lacra social. O prazo de presentación de traballos é o comprendido entre o 22 de outubro e mailo 22 de novembro.

No concurso poderán participar tódalas persoas menores de 18 anos, e os traballos presentados deberán entregarse no Centro de Información á Muller, nun sobre pechado, facendo constar un número de teléfono de contacto e en ningún caso de verá aparecer o nome da persoa participante. A identificación do autor/a levarase a cabo mediante o uso dun pseudónimo.

Entre tódolos traballos recibidos, un xurado independente seleccionará os gañadores de cada modalidade e concederá os seguintes premios:

-  Premio ó mellor relato curto: Vale agasallo por importe de 100 euros a utilizar nunha tenda de Negreira.

-  Premio ó mellor cartaz gráfico: Vale agasallo por importe de 100 euros a utilizar nunha tenda de Negreira.

Entrega de premios

Terá lugar o sábado día 24 de novembro ao remate da sétima andaina ¨Negreira camiña contra a violencia de xénero¨, no Centro Sociocultural. A organización contactará previamente cos premiados/as por teléfono para que asistan ó acto de entrega e recollan o seu agasallo persoalmente.

Pódense consultar as bases do concurso premando aquí:

O delegado territorial da Xunta na provincia da Coruña, Ovidio Rodeiro, visitou hoxe o parque empresarial de Negreira para comprobar os proxectos de mellora das infraestruturas viarias e da seguridade do mesmo, e que se van realizar nas vindeiras semanas grazas a unha achega da Consellería de Economía, Emprego e Industrial de 172.674 euros, cantidade á que hai que engadirlle a aportación do propio Concello.

O alcalde de Negreira, Jorge Tuñas Caamaño, acompañou ao delegado territorial, xunto ao primeiro tenente de alcalde, Manuel Ángel Leis Míguez, e os concelleiros do grupo municipal do Partido Popular, Juan Rey e María José Carballo, quenes comprobaron que o investimento permitirá dotar ao polígono negreirés dun sistema de videovixilancia e dun aparcadoiro para vehículos pesados.

Esta actuación forma parte da orde de axudas a través da cal a Xunta investirá 395.000 euros para mellorar os parques empresariais da área de Santiago en catro concellos: Negreira; Melide; Ordes e Santa Comba. 

Un grupo de estudantes de 2º de ESO do instituto Xulián Magariños participaron este luns nun roteiro polas igrexas románicas de Santa María de Paramos, en Val do Dubra; Santa Baia de Lañas, na Baña, e a de Santa María de Portor, en Negreira.

A ruta fíxose en autobús e foi guiada polo técnico municipal de Turismo, Eutropio Rodriguez, licenciado en Historia da Arte e en Fotografía Documental polo International Center of Photography de Nova York.

Na viaxe, falouse con gran interese por parte dos rapaces, das principais características do románico visibles en cada unha das igrexas, ademáis de comentar as súas posteriores reformas.

A igrexa de Paramos destaca polo seu románico rural do século XIII, conservando a súa cruz latina na planta e fermosas cruces antefixas, así como algún elemento de oratorios anteriores propios do prerrománico do século X. Por contra, a de Santa Baia de Lañas é un fermoso exemplo do románico da segunda metade do século XII, facilmente datable grazas ó descobremento dun Dolio, aerófono de barro dunha soa nota, recentemente nun dos seus canzorros.