Teatro do Noroeste é unha compañía profesional galega fundada no 1987, e que polo tanto cumpre o seu trinta aniversario sobre os escenarios. Na súa dilatada traxectoria ten producido e distribuído unha grande cantidade de espectáculos.

Este sábado 6 de maio desembarca no Ciclo de Teatro de Negreira co seu espectáculo teatral Palabras malditas, baixo a dirección de Eduardo Alonso, a partir das 21:00 horas no Auditorio do Centro Sociocultural. Con entrada de balde.

Sipnóse

Un perseguido profesor experto en poesía francesa e unha prostituta coinciden nunha sórdida pensión da Coruña, nos anos corenta, en plena época de represión e asasinatos. Malia as aparentes diferenzas que os separan, aférranse o un ao outro como á única táboa de salvación no inmenso océano da soidade. E entre os dous formarán un tándem pletórico de inspiración.

Reparto

Miquel Insua, no papel de Vicente; Manuela Varela, no papel de Clara; Luma Gómez, no papel de Ermitas, e Ima António, en papel de camareira e axudante de dirección.

Xénero: Teatro contemporáneo

Duración: 100 minutos

Público: + 18 anos

Idioma: Galego

O Concello de Negreira celebrou como cada primeiro sábado do mes de maio, o seu encontro anual dos maiores coa participación dunhas setecentas persoas no xantar popular que tivo lugar baixo a carpa montada no campo dá feira. Durante a festa entregáronse os galardóns á veciña e veciño de maior idade participantes. No caso da primeira recaeu en Pilar Mayo Brantuas, natural da parroquia de San Mamede da Pena, de 101 anos de idade. O varón de maior idade foi Jesús Dourino Forján Mayo, natural da parroquia de San Estevo de Landeira, e de 98 anos de idade.

A celebración estivo acompañada de animación musical a cargo da Banda Municipal de Negreira e mailo dúo Meigas Son, encargadas de amenizar o baile de tarde como colofón a un evento que contou coa presenza do alcalde, Manuel Ángel Leis Míguez, xunto coa concelleira de Servizos Sociais, María Jesús Veiga Hortas, e mailos concelleiros de Deportes, José Daniel Casal Leis, e de Cultura, Flora Grille Novío. Por parte do grupo municipal do Partido Popular, acoderon os concelleiros Juan Rey Maceira, Manuel Hombre Porto e María José Carballo Villar.

O Pavillón Municipal de Pedra Mámoa acolleu onte a xornada de clausura da tempada 2016-17 das Escolas Deportivas Municipais cunha mostra dun bo número de disciplinas deportivas que son impartidas para os rapaces e rapazas do noso concello, entre os meses de outubro e maio, e nas cales participaron máis de 400 alumnos/as.

Fútbol sala, patinaxe, baloncesto, kárate, tenis, ciclismo, atletismo e ximnasia rítmica, xunto coas actividades de predeporte e multideporte que se imparten no CEIP O Coto, así como as de ximnasia de mantemento, conforman a ampla variedade de disciplinas que oferta anualmente o Concello de Negreira.

O acto de clausura contou coa participación do alcalde, Manuel Ángel Leis Míguez, e mailo concelleiro de Deportes, José Daniel Casal Leis, xunto cos monitores/as das diferentes escolas deportivas que realizaron exhibicións sobre a pista de xogo e cunha bancada ateigada de xente que desfrutou coas demostracións levadas a cabo ao longo de toda a tarde.

Os alumnos/as recibiron un agasallo do Concello de Negreira unha vez que foron rematando as súas exhibicións.

O alcalde do Concello de Negreira, Manuel Ángel Leis Míguez, asinou este luns na sé da Deputación da Coruña, o convenio para o financiamento da Rede Cultural 2017 que comprende 16 actuacións no presente ano no noso concello, e un orzamento total de 48.697 euros, dos que 29.218 euros son aportados pola Deputación da Coruña.

No acto participaron o presidente provincial, Valentín González Formoso, e maila vicepresidenta e responsable da área de Cultura da Deputación, Goretti Sanmartín.

Case tres millóns de euros move este ano a Rede Cultural, dos que 2.261.234 irán destinados á programación dos concellos da provincia.  A esta cantidade aínda haberá que sumar o que a Deputación destina ás solicitudes das entidades sen ánimo de lucro, que ascenderá a 457.724 euros.

Valentín González Formoso salientou que por primeira vez aceptáronse tódalas solicitudes presentadas polos concellos da provincia.

A Banda Ateneo de Negreira e maila Escola de pandeireta e baile do Obradoiro de Cultural Tradicional Ultreia, de Compostela, presentan un espectáculo conxunto este domingo 21 de maio, ás 19:00 horas, no Auditorio de Negreira, conmemorando a semana das Letras Galegas promovida polo Concello de Negreira.

A irmandade entre as dúas agrupacións pretende reivindicar a riqueza da música tradicional galega, así como a pervivencia da nosa lírica popular a través dos cantos e cantigas. O repertorio escollido inclúe tanto pezas de composición coma pezas de recollidas polo Obradoiro de Cultural Tradicional Ultreia, nas zonas de Avión, Mangüeiro, Cervantes ou Gargamala, entre os anos 1990-2000.

As pezas foron arranxadas para a banda por Raúl Martín Niñerola, director da Banda Ateneo. Alén das pandereteiras da escola de Ultreia interpretaren vocalmente os cantos, xotas e muñeiras destas zonas, os bailadores ilustrarán ao público asistente coa execución dalgúns dos bailes máis representativos.

O Concello de Negreira decidiu ampliar unha semana máis, os servizos de atención á veciñanza no Punto de información catastral instalado na Casa da Cultura (Aula de informática). Os días en que prestarase atención ó público van selos seguintes: Martes 23; xoves 25 e venres 26 de maio, de 9 a 14 horas, e de 16 a 18 horas.

O duodécimo certame de pintura ¨Negreira en cor¨, promovido polo Concello de Negreira, e co patrocinio da Fundación Feiraco, foron entregados este venres durante o acto de clausura das actividades da Escola de Pintura e Gravado, en que entregáronse os diplomas aos preto de setenta participantes. Neste acto participaron a primeira tenente de alcalde, María Jesús Veiga Hortas e mailo concelleiro, Jorge Tuñas Caamaño.

Na modalidade de 13 a 18 anos do Certame de pintura ¨Negreira en cor¨, o xurado elixiu as seguintes obras:

1º) A mirada da guerra, de Pedro Gronzo Aniceto (Brión). Agasallo dunha consola 3DS.

2º) Tiroriro, de Julián Rey Temes (Negreira). Agasallo dun equipo de son.

3º) A dama, de Rosalía Rey Couso (Santiago). Agasallo dun MP5.

Na modalidade de 6 a 12 anos do Certame de pintura ¨Negreira en cor¨, o xurado elixiu as seguintes obras:

1º) 3 peixes de estanque, de Laura Rodríguez Capeáns (Negreira). Agasallo dunha consola 3DS.

2º) Pavo real, de Andrea Rial Canosa (Ponte do Porto). Agasallo dun equipo de son.

3º) O gato arcoíris, de Lidia García Cerviño (Negreira). Agasallo dun MP5.

Tanto a Presidencia do Goberno de España coma a Federación Española de Municipios e Provincias (FEMP), convidan hoxe  a gardar un minuto de silencio, ás 12.00 horas, ás portas de tódalas Dependencias Oficiais, en manifestación de duelo polo atentado ocorrido en Manchester na noite de onte, e como mostra da repulsa dos españois á violencia de calquera clase.

A violencia contra os cidadáns non ten xamais unha xustificación, e moito menos cando se trata de persoas tan novas. Na nosa sociedade non teñen cabida estes actos nin ningún outro que conleve manifestacións violentas, actos execrables e condenables contra os que debemos loitar, tamén desde os Gobernos Locais, porque atentan directamente contra a nosa xente, contra o corazón das nosas cidades e os nosos pobos, segundo o comunicado remitido ao Concello de Negreira pola Federación Española de Municipios e Provincias.

Trescentos sesenta rapaces e rapazas dos 93 concellos da provincia da Coruña, entre eles Negreira, participarán este verán en Culleredo nos campamentos deportivos da Deputación da Coruña, cuxo prazo de inscrición está aberto até o vindeiro 17 de xuño na Delegación de Cultura e Deportes, na Casa da Cultura.

Os campamentos están destinados a nenos e nenas de entre 9 e 14 anos de idade e desenvolveranse no Centro Residencial Docente de Culleredo (antiga Universidade Laboral) en dúas quendas, do 19 ao 25 de agosto e do 26 de agosto ao 1 de setembro. O prezo do campamento é de 85 euros, que inclúe transporte, estadía e manutención.

Durante a súa estadía, os rapaces contarán cun amplo programa de activades que inclúe dende a práctica da equitación, a natación, o tenis, o sendeirismo ou deportes naúticos ata xornadas de praia, obradoiros, actividades e visitas culturais á Torre de Hércules, o castelo de San Antón, a Casa das Ciencias, o Aquiarium Finisterrae, o xardín de San Carlos ou o mosteiro de Caaveiro, nas Fragas do Eume.

O programa cultural complétase con veladas nocturnas nas que os nenos desenvolverán actividades e xogos que fomenten a convivencia e o intercambio de experiencias.

En cada quenda participarán un total de 180 rapaces, que estarán supervisados en todo momento por 18 monitores titulados e o un director de campamento.

Os rapaces/as de Negreira participarán na 2ª quenda, do 26 de agosto ao 1 de setembro, xunto cos de Ames, A Baña, Boiro, Brión, Cabana de Bergantiños, Camariñas, Carballo, Carnota, Cee, Corcubión, Coristanco, A Coruña, Dodro, Dumbría, Fisterra, A Laracha, Laxe, Lousame, Malpica, Mazaricos, Muros, Muxía,  Noia, Outes, Padrón, A Pobra, Ponteceso, Porto do Son, Rianxo, Ribeira, Rois, Santa Comba, Santiago, Teo, Touro, Trazo, Val do Dubra, Vedra, Vimianzo e Zas.

Máis información en: www.dacoruna.gal/deportes

Abriuse a 1ª fase de presentación de solicitudes do Programa de Turismo Social do Imserso 2017-2018: do 9 de maio ao 7 de xuño de 2017 no departamento de Servizos Sociais, na pranta baixa da Casa do Concello.

Consulta toda a información no seguinte enlace.