Debido á entrada en vigor do horario de verán, dende este xoves 15 de xuño, as dependencias municipais da Casa do Concello axustaranse ao horario de verán, de 8:00 a 14:00 horas, de luns a venres, inclusive o día 15 de setembro.
Infórmase que o horario de atención ó público nas dependencias municipais da Casa do Concello é o establecido entre as 8:00 e as 14:00 horas, entre o 15 de xuño e mailo 15 de setembro de 2017.
Negreira acollerá este sábado 17 de xuño, os actos de irmandamento coas localidades portuguesas de Marihna Grande e Serzedo, correspondéndolle ó Concello de Negreira selo organizador neste 2017.
A xornada comezará coa recepción aos participantes por parte da Corporación Municipal, ás 10:30 horas, na Casa do Concello, seguido do acto oficial no Auditorio do Centro Sociocultural. E dende as 12:00 vaise desenvolver no Campo Jesús García Calvo, o Torneo Ibérico de Veteranos, cun triangular entre os equipos do Marinha Grande, o Serzedo e mailos Superveteranos do Negreira.
A partir das tres da tarde desenvolverase un xantar de confraternidade, baixo unha carpa instalada na Área recreativa de Cobas, a carón do río Barcala, e que incluirá actuacións musicais e de baile, a partir das seis da tarde.
A Sociedade Cultural e Folclórica Veiga do Cotón e, mailo Concello de Negreira, convidan a participar no XXV Día da Muiñeira e mailo XXI Concurso Folclórico, a celebrarse este sábado 10 de xuño, dende as seis da tarde na praza do Concello. A xornada suporá tamén, a clausura do Obradoiro de Danza tradicional, e do Obradoiro de Pandeireta e canto tradicional.
A organización conta coa participación 25 grupos dunha total de once agrupacións folclóricas chegadas de diferentes puntos da provincia, no 25 aniversario da creación do Día da Muiñeira, onde a muiñeira a bailar será a muiñeira ¨Redonda¨, adaptada en catro puntos e cinco voltas, e bailarase en tres veces con breves descansos.
Os grupos participantes concentraranse ás 17:00 horas no Campo dá Feira, dende onde sairá o desfile ás cinco e media da tarde, o cal percorrerá a Carreira de San Mauro, a rúa do Carme e o Camiño Vello para facer entrada á praza do Concello. Ao remate daráselle aos 300 participantes un refresco e un bocadillo, e farase entrega dun obsequio a tódalas agrupacións participantes.
Ao remate do XXV Día da Muiñeira farase o XXI Concurso Folclórico, onde cada agrupación poderá participar presentando a peza que libremente escolla, cun máximo de 5 minutos no escenario. Establécense os seguintes premios:
1º 400 euros e trofeo
2º 250 euros e trofeo
3º 100 euros e trofeo
Negreira celebrou o 25 aniversario do seu Día da Muiñeira por todo o alto, cunha ducia de agrupacións folclóricas participantes chegadas de toda a provincia, en total preto dos 300 participantes. Tralo desfile polas principais rúas da vila, ás seis da tarde facían a súa entrada nunha praza do Concello onde cotizouse a sombra, polo forte calor da xornada.
Bailouse tres veces a muiñeira Redonda, alternándose coas actuacións do grupo de baile Veiga do Cotón, e do Obradoiro de danza tradicional de Negreira, xunto coas pandereteiras da Escola Municipal, no que foi a clausura da tempada de devanditas escolas municipais, de baile, dirixida por Manuel Figueira, e de pandeireta, por Sonia Nieto.
Rematouse coa entrega de agasallos ás asociacións participantes:
Asociación Cultural e Folclórica Terra de Ames
Asociación Cultural Terra de Sena, de Cee
Escola Municipal de Baile de Brión
Asociación Cultural Rosalía de Castro, de Padrón
Asociación Cultural O Hórreo, de Mazaricos
Asociación Xuvenil Xilbarbeira, de Boiro
Asociación Nosa Señora do Carme, de Fisterra
Escola Municipal de Baile Tradicional de Betanzos
Asociación Folclórica Xirandaina, de Santiago
Escola de Danza Breogán, da Asociación Cultural de Brens, de Cee.
Concurso Folclórico
Finalmente, celebrouse o concurso folclórico onde o primeiro premio foi para o grupo de Xilbarbeira (400 euros e trofeo), con Punteada de Limiñoa; seguido do grupo de Xirandaina, bailando Entroido de Arcos (250 e trofeo), e en terceiro lugar, o grupo Fouliada de Mazaricos, con Xota de San Román, con premio de cen euros e trofeo, e que lles foron entregados polas concelleiras de Cultura, Flora Grille Novío, e de Educación, María Jesús Veiga Hortas, respectivamente.
Os Concellos de Negreira e Ames suman unha vez máis esforzos na súa aposta por poñer en valor a paraxe natural de Pontemaceira, formada polo río Tambre ao seu paso por este encrave turístico e paso dos peregrinos polo Camiño de Fisterra antes da súa chegada á vila de Negreira, fin da primeira etapa dende Compostela.
Por este motivo, o venres 16 de xuño, ás 21:30 horas, vai ter lugar a primeira das citas do presente verán do programa ¨Noites en vela¨, co concerto que ofrecerán, o grupo amesán A Requinta da Maía e mailas pandereteiras As Tanxugueiras, instalándose un escenario sobre os penedos naturais da zona de Ames.
Página 206 de 258
