O Concello de Negreira vén de proceder a distribuír os espazos dispoñibles para que as diferentes persoas e entidades que o solicitaron poidan montar un posto ou cantina na XI Feira do Románico.

Desta volta, tan só se conta con catro casetas do pazo do Cotón, que serán utilizadas pola Asociación Cultural Afonso Eanes, a Comisión de Festas de Aro, a SD Negreira e a agrupación local do BNG. Pola súa banda, tamén disporán dun espazo na rúa a Asociación de Amas de Casa, a Comisión de Festas de Viceso e o Agrón CF.

Tal e como indicou o alcalde na reunión celebrada este luns, á hora do reparto déuselle prioridade ás asociacións fronte aos particulares. Ademais, tívose en conta a data de solicitude, a antigüidade en canto a participación na feira e a vontade colaborativa co Concello ao longo do ano.

No encontro insistiuse no cumprimento dos horarios de apertura, especialmente o venres pola tarde, para evitar que haxa postos aínda sen montar cando xa comezou a feira. Así mesmo, ao proceder á lectura de normas, recordouse entre outras cuestións que tanto os postos como as persoas que traballan neles deben seguir unhas pautas estéticas acordes coa recreación histórica na que se basea esta festa. 

A XI Feira do Románico arrincará este venres a partir das seis da tarde con postos de artesanía, representacións teatrais, exhibicións de cetrería e música durante de toda a fin de semana.

Máis sobre a XI Feira do Romanico.

O sábado, 16 de setembro, celebrarase na nosa vila a 11ª edición do Día da Bicicleta, organizado polo Concello e o Club Ciclista Negreira.

As persoas participanetes concentraranse ás dez da maña xunto á explanada do instituto Xulián Magariños. Media hora máis tarde terá lugar a saída infantil, cun percorrido de 1,2km, e ás once sairán os adultos, que percorrerán unha distancia de 10km.

Trátase, polo tanto, dunha actividade dirixida a todas as idades na que ademais haberá un agasallo e un refrixerio para cada participante. Iso si: o uso de casco será obrigatorio.

Así mesmo, coincidindo con este evento, sortearanse dúas mountain bike cedidas por Motos Antelo e Comercial Vigo, dúas das entidades colaboradoras.

As persoas interesadas poden anotarse na Delegación de Cultura e Deportes, na 1ª planta da Casa da Cultura, ou ben a través do teléfono 981885886.

Este venres, 1 de setembro, arrinca a XI Feira do Románico de Negreira con múltiples propostas que inclúen representacións teatrais, obradoiros infantís, exhibicións de cetrería, animación de rúa e espectáculos musicais, ademais do tradicional mercado medieval.

A contorna da Carreira de San Mauro e do Pazo do Cotón acollerá este evento, cun programa de actividades que dará comezo o venres arredor das 18h. Ese primeiro día haberá músicos e bufóns percorrendo a feira, unha exhibición de voio e un espectáculo de acrobacia e lume.

A inauguración oficial por parte das autoridadades e da corporación local será o sábado ás 12 do mediodía. Nesa xornada principal volverá haber animación de rúa e exhibicións de cetrería xa dende pola mañá, así como obradoiros infantís. Para as 13:30h está prevista unha representación teatral da man da Escola de Teatro de Negreira na zona da praza do Cotón, coa peza 'A lenda de Xenoveva e Barbante'.

 As actividades continúan pola tarde e pola noite, destacando un espectáculo de lume ás 23h e outro pirotécnico á medianoite, seguido dun concerto do grupo Wyrdamur.

Xa o domingo actuarán grupos coma Os Monifates, que se suman ás intervencións musicais dos Gascones, Losinfuste, Fire Dragons e Wyrdamur, presentes durante  os tres días de feira. A cita pecharase cun novo espectáculo da Troula Animación, que desta volta substitúe o seu 'Errantes' pola proposta 'Subumbra'.

Pódese consultar o programa completo na seguin ligazón:

Folleto XI Feira do Románico

Cortes de tráfico

Lembramos que con motivo desta celebración o tráfico estará cortado na zona da Carreira de San Mauro xa dende o xoves pola tarde e ata o domingo á noite.

Dende este luns pode visitarse na sala de exposicións do Centro Sociocultural, unha mostra de pinturas e gravados dos artistas noieses Jesús Costa, Rosana Calvo e Nacho C. Beiro.

Compoñen esta exposición un total de 24 obras realizadas mediante técnicas coma o gravado ou a acuarela.

Pódese visitar ata o vindeiro 30 de setembro, en horario de 9h a 15h e de 16h a 21h. Os diferentes cadros están ademais á venda para aquelas persoas que queiran adquirir algún deles.

O Concello de Negreira oferta máis de 30 actividades para nenos/as e adultos/as no novo curso das Escolas Deportivas e Culturais municipais.

Entre as actividades culturais inclúese informática, teatro, pintura e gravado, danza tradicional e pandeireta.

Dentro das escolas deportivas ofértanse para nenos e nenas actividades polideportivas, atletismo, baloncesto, balonmán, ciclismo, fútbol sala masculino e feminino, judo, kárate, multideporte, patinaxe, tenis, voleibol, xadrez e ximnasia rítmica.

Para as persoas adultas haberá aerobic, atletismo, ioga, pádel, patinaxe, tenis, tenis de mesa, ximnasia de mantemento e ximnasia para maiores.

As clases, polo xeral, comezan na primeira semana de outubro, aínda que hai algunhas excepcións.

As persoas interesadas deben anotarse na Delegación de Cultura e Deportes antes do 11 de outubro. Nalgúns casos as prazas son limitadas e iranse cubrindo por orde de anotación.

O prezo estándar por curso é de 40€, con descontos para familias ou persoas que participan en máis dunha escola.

Pódese consultar toda a información a través desta ligazón:

https://escolasdeportivasmunicipais.blogspot.com.es/

Isabel Risco e Fran Rei traerán o espectáculo cómico Dous no Camiño este sábado á nosa vila.

A cita, con entrada libre, está fixada para 20h na explanada que está xunto ao instituto Xulián Magariños.

Trátase dunha montaxe dirixida por Avelino González, con texto de Roi Vidal e Xurxo Barcala, que foi creada especificamente para a programación  do Xacobeo Vive o Camiño 2017.

Isabel Risco e Fran Rei son dúas caras ben coñecidas no mundo do humor e da interpretación en Galicia. Desta volta transfórmanse en camiñantes para ofrecernos unha proposta de circo e clown que conquistará as risas do público.

Achéganse as festas de Santa Margarida cuns días ateigados de propostas no noso Concello.

Mañá celebrarase a XI edición do Día da Bicicleta, que arrincará ás 10h da mañá dende a explanada xunto ao instituto. A esa hora concentraranse as persoas participantes. Sairán primeiro os máis pequenos, que lle darán ao pedal durante 1,2 quilómetros, e despois, ás 11h, os adultos, con 10 quilómetros.

Pola tade, máis deporte, co torneo de baloncesto que vai haber no parque do Coto a partir das 16:30. Nel enfrontaranse os equipos de benxamíns de Negreira e Porto do Son, de cadete feminino do Pio XII e do Porto do Son e de cadete masculino do Rosalía de Castro e do Porto do Son.

Despois, cita importante co humor co espectáculo 'Dous no Camiño' da man de Isabel Risco e Fran Rei. Trátase dunha montaxe para todos os públicos que foi creada especificamente para a programación do Xacobeo Vive o Camiño 2017. Poderase ver ás 20h na explanada que hai xunto ao instituto.

Tamén mañá nova proxección de cine na rúa, co filme Os Minions na praza das Brañas ás 22:30h.

Alí, o domingo pola mañá inaugurarase a nova pista de petanca, coa celebración dun torneo a partir das 10h. Nel participarán xogadores de Negreira, así como do C. P. Ensino, do C.P. A Bandeira e da selección galega.

Xa pola tarde, Festival de Bandas ás 18h na praza do Concello, coas bandas de Boiro, de Brión e a Ateneo de Negreira. Pola noite toca verbena a cargo da orquestra New York, xunto coa disco móbil EME Music e o Dj Marcos Magán.

O luns a charanga Os Celtas poralle música ás rúas ao longo da mañá. Ás 12 do mediodía haberá misa solemne na honra de Santa Margarida na igrexa parroquial. Deseguido, sesión vermú cos Celtas e o Trío Alborada, que repite pola noite amenizando a verbena que lle porá o broche final a estas celebracións.

No mes de outubro comeza unha nova tempada dos programas lúdicos de encontro Avelaíños e Rebuldeiros, a cargo do Servizo de Normalización Lingüística do Agrupamento Negreira-A Baña.

Avelaíños

Para familias con nenos e nenas de 0 a 3 anos, todos os martes, primeiros e terceiros de mes, de 16.30 a 18.30 horas, na Bebeteca da Casa da Cultura.

Rebuldeiros

Para familias con nenos e nenas de 3 a 6 anos, todos os martes, segundos e cuartos de mes, de 16.30 a 18.30 horas, na Bebeteca da Casa da Cultura.

Anótate no número de teléfono 607 153 604. Terán preferencia as familias empadroadas no Concello de Negreira ata completar un máximo de 15 prazas en cada programa lúdico de encontro. 

Trátase dos de Punto de cruz e Técnicas de bordado, así como o de Informática para adultos, todos eles de balde, e con preferencia para  veciñas e veciños empadroados no Concello de Negreira.

O primeiro taller en botar a andar vai ser o de Informática para adultos, cuxo comezo está fixado para o venres 29 de setembro, no Telecentro do Centro Sociocultural, en horario de 19 a 20.30 horas. Terá unha periodicidade semanal.

En canto aos de Punto de cruz e Técnicas de bordado, informa o Voluntariado Social que o seu inicio programouse para o luns 2 de outubro. Ambolos dous vánse desenvolver todos os luns, en horario de 10.00 a 12.00 horas, no Centro Multifuncional, sito na avenida das Brañas.

Para máis información e inscricións, na oficina do Voluntariado Social, na pranta baixa da Casa do Concello, en horario de mañá, ou ben chamando ao número de teléfono: 664 074 674. Trátase dunha oferta con prazas limitadas. 

A 10ª edición da Andaina Popular «Negreira no Camiño de Fisterra» celébrase o sábado día 30 de setembro, cunha camiñada de 25 quilómetros, cunha dificultade media, a través da Ruta dos Tres Pazos (O Cotón, Baladrón e Albariña), duns 16 quilómetros, e co engadido de nove máis unha vez chegados ó punto de partida, polo Camiño de Fisterra, na súa saída de Negreira polo Corpachón ata Zas, e dende alí, por un sendeiro, no que os participantes regresarán a Negreira polo paseo fluvial do río Barcala.

Con esta iniciativa preténdese potenciar e dinamizar o Camiño de Fisterra e Muxía, ao seu paso polo noso concello. 

Para facer efectiva a inscrición, podes chamar ó número de teléfono 981 885 886 ou enviar os datos a: Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo.. A inscrición é de balde. Os datos a cumprimentar son os seguintes: DNI, nome e apelidos; data nacemento; localidade e teléfono de contacto.

A data límite para facer efectiva a inscrición é o xoves 28 de setembro as 14:00 h.