A presente convocatoria ten por obxecto a concesión dos premios do IX Concurso de relatos curtos e cartaces gráficos ¨Loita contra a violencia de xénero¨, promovido dende o Concello de Negreira, a través do Centro de Información ás Mulleres (C.I.M.), co fin de sensibilizar á veciñanza sobor desta lacra social.

 

O prazo de presentación de traballos é o comprendido dende o 21 de outubro até o 21 de novembro, e no certame poden participar tódalas persoas menores de 18 anos, e os traballos presentados deberán entregarse no Centro de Información ás Mulleres, nun sobre pechado, facendo constar un número de teléfono de contacto e en ningún caso deberá aparecer o nome da persoa participante. A identificación do autor/a levarase a cabo mediante o uso dun pseudónimo.

 

Entre tódolos traballos recibidos, un xurado independente seleccionará os gañadores de cada modalidade e concederá os seguintes premios:

 

- Premio ó mellor relato curto: Vale agasallo por importe de 100 euros a utilizar nunha tenda de Negreira.

- Premio ó mellor cartaz gráfico: Vale agasallo por importe de 100 euros a utilizar nunha tenda de Negreira.

 

Entrega de premios

O sábado día 23 de novembro ao remate da oitava Andaina ¨Negreira camiña contra a violencia de xénero¨, no Centro Sociocultural.

 

A organización contactará previamente cos premiados/as por teléfono para que asistan ó acto de entrega e recollan o seu agasallo persoalmente.

 

Pódense consultar as bases do concurso premando aquí:

 

O pleno da Deputación da Coruña aprobou, cos votos favorables de PSdeG-PSOE, BNG, Marea Atlántica e Alternativa dos Veciños e abstención do PP, as bases reguladoras do Plan Único do vindeiro ano (POS+2020), que distribuirá inicialmente 47,2 millóns de euros entre os concellos da provincia.

 

Ao concello de Negreira correspóndenlle inicialmente, unha cantidade de 594.624 euros, pois trátase da achega inicial do Plan Único 2020, que como todos os anos irá incrementándose progresivamente ao longo do exercicio coa incorporación de remanentes, pero que permite aos 93 concellos da provincia planificar os seus orzamentos municipais e investimentos de cara ao vindeiro ano, ao contar dende xa cunha previsión mínima de ingresos por parte da Deputación que poderán destinar, en función das súas necesidades, á execución de obras, ao financiamento de parte do gasto corrente dos seus servizos básicos, ou a sanear as economías municipais amortizando débeda con provedores ou entidades bancarias.

 

Dentro da programación de Dinamización Lingüística do programa "Falaredes", da Xunta de Galicia, este domingo 3 de novembro, ás 13:00 horas, o Auditorio do Centro Sociocultural acolle a representación da obra: Rosa caramelo e outras historias, a cargo da compañía Talía Teatro. Trátase dun espectáculo para nenas e nenos onde se lle dá a volta a roles e estereotipos de xénero.

 

Sinopse

Illada nun xardín, Margarita é a única elefanta do grupo que non consigue que a súa pel sexa de color rosa caramelo. Cando os seus pais desisten desa idea descubrirá o significado da liberdade, e abrirá o camiño da igualdade para as súas compañeiras.

 

Nesta montaxe composta de catro historias nas que combínase a palabra e a música en directo, créase unha atmosfera adecuada para desmontar unha serie de ideas impostas e simplificadas, pero fortemente asumidas, sobre actitudes e aptitudes das mulleres e dos homes.

 

Ficha artística

Autora: Adela Turín

Dirección: Paula Carballeira

Elenco: Artur Trillo e Fernando Fraga

Idioma: Galego

Duración: 45 minutos

Xénero: Comedia infantil

 

O director técnico da empresa Inforhouse, Luís Barreiro González, fixo entrega de oito equipos informáticos, ademáis dunha impresora e unha fotocopiadora, un equipamento destinado á aula de informática do centro ocupacional das Brañas que xestiona a Fundación para a Protección de Discapacitados Psíquicos da Comarca de Barcala.

 

Ao acto de entrega asistiron o presidente da Fundación e alcalde do Concello de Negreira, Manuel Ángel Leis Míguez, e mailo vicepresidente e alcalde do Concello da Baña, José Antonio Pereira Gil, e dous membros do padroado e concelleiros de Compromiso por Galicia da Baña, David Gontán Varela e César Ramos Domínguez, a quenes a Fundación agradeceu a súa disposición para poñerse en contacto coa firma Inforhouse.

 

 

Ademáis, este xoves vaise a asinar o convenio de colaboración anual coa Fundación María Esperanza Rubido Romero para a posta en marcha do programa de benestar persoal e social dirixido aos usuarios e usuarias da Fundación, e que concede unha achega económica de 6.000 euros.

 

A Escola Municipal de Teatro convídanos este venres 1 de novembro, a disfrutar dunha noite terrorífica coa representación teatralizada: ¨Cea de defuntos¨, no Auditorio do Centro Sociocultural, a través de seis funcións de microteatro para grupos de non máis de 20 persoas, e maiores de 12 anos.

 

Os pases de cada sesión serán nos seguintes horarios: 20:00; 20:20; 20:40; 21:00; 21:20 e 21:40 horas.

 

Sandra Lesta, a directora da Escola, avanza que o fío condutor da terceira proposta sobre esta temática terrorífica na que participan 27 actores e actrices da escola, xira arredor dunha antiga mansión onde sucederon «cousas» que é adquirida por unha rica familia «e onde o público asistirá a unha cea no día de defuntos e veremos que cousas se lle presentan a través dunha medium que contrata a familia», sinalou.

A Fundación María Esperanza Rubido Romero vén de conceder unha subvención de 6.000 euros á Fundación para a Protección de Discapacitados Psíquicos Comarca de Barcala para levar a cabo o programa Mellora do benestar persoal e social dos usuarios/as da Fundación. Un programa que leva funcionando dende o pasado mes xuño ata o mes de decembro de 2019.

 

A sinatura do convenio tivo lugar hoxe xoves 31 de outubro, no Salón de Plenos do Concello de Negreira, por parte do presidente do padroado da Fundación para a Protección, e alcalde do Concello de Negreira, Manuel Ángel Leis Míguez, e maila presidenta da Fundación Mª Esperanza Rubido Romero, María Jesús Forján Vieito, acompañados polo secretario, José Manuel Forján Vieito, xunto co vicepresidente da Fundación de Discapacitados, José Antonio Pereira Gil, alcalde do Concello da Baña, e de César Ramos Domínguez, actuando de vogal.

 

A Fundación Mª Esperanza Rubido Romero vén axudando no desenvolvemento de dito programa dende o ano 2010 coas súas aportacións anuais para levar a cabo os programas de autonomía persoal e de mellora do benestar persoal e social, de aí, o agradecemento.

 

Os obxectivos xerais do programa:

Desenvolver as habilidades emocionais

Mellorar as relación interpersoais

Aumentar a autonomía persoal dos/as usuarios/as da Fundación

 

As áreas que se traballan no programa:

Área de vida no fogar Area de educación emocional,

Área de vida na comunidade

Integración na comunidade.

Área de formación laboral

 

A Asociación Forestal de Galicia está levando a cabo un amplo programa formativo en diversas localizacións da comunidade, dirixido a mellorar coñecementos sobre silvicultura, xestión de montes veciñais, a praga do nematodo ou a certificación forestal. Trátase de cursos que contan co financiamento da Axencia Galega da Industria Forestal da Xunta de Galicia e son gratuítos para os participantes.

 

O venres 8 e mailo sábado 9 de novembro, impartirase en Negreira un curso de silvicultura de coníferas para a produción de madeira de alto valor, que terá lugar na Casa da Cultura, o venres 8 de 17,30 a 21,00 horas e, o sábado 9 con prácticas en montes da contorna.

 

As actividades van dirixidas aos propietarios e propietarias forestais (particulares e comunidades de montes veciñais en man común), técnicos e propietarios forestais particulares, así como comuneiros e comuneiras interesados na xestión do monte.

 

A Asociación Forestal de Galicia considera que este labor contribuirá a mellorar a xestión dos nosos montes e a incrementar a prevención dos incendios.

 

A inscrición é gratuíta pero obrigatoria, nos teléfonos 981 564 011 e 618 752 214 ou no enderezo electrónico Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo.

 

Cada día os hospitais galegos precisan entre 400 e 500 doazóns de sangue para realizar o seu intenso labor asistencial. Grazas á colaboración dos doadores e doadoras, é posible realizar unha media de 500 intervencións cirúrxicas, atender unhas 2.700 urxencias e realizar tres transplantes de órganos e tecidos, a diario nos hospitais galegos.

 

En Negreira queremos contribuir coa Axencia de Doazón de Órganos e Sangue (ADOS), a conseguir o maior número de doazóns na visita que este mércores 6 de novembro levará a cabo á nosa vila, unha unidade móbil que permanecerá estacionada diante do Centro de Saúde, na rúa de Castelao, en horario de 16:00 a 21:00 horas.

 

E lembramos que para doar sangue despois de xantar é necesario agardar dúas horas.

A Deputación da Coruña promociona en Londres na World Travel Market (WTM), unha das feiras de turismo máis importes de Europa, onde se amosan as novidades e plataformas de promoción do sector turístico, as rutas xacobeas do Camiño de Fisterra-Muxía, e mailo Camiño Inglés.

 

É a primeira vez, que a Deputación da Coruña participa nesta importante feira turística cun stand propio, especialmente dedicado ao Camiño de Santiago, especificamente ao Camiño de Fisterra e Muxía, e mailo Camiño Inglés, ao parecer co obxectivo de fomentar o coñecemento dos mesmos e posibilitar que maior numero de peregrinos e turistas se animen a percorrer estas rutas situadas na provincia da Coruña.

 

O deputado de Economía e Facenda, Antonio Leira, participa estes días na capital británica en diversos actos e reunións incluídas no programa do evento. Este luns mesmo, trala inauguración do stand, a delegación da Coruña recibiu a visita da ministra en funcións de Industria, Comercio e Turismo, Reyes Maroto, que se interesou pola promoción do Camiño Inglés e polo sistema de colaboración articulado por concellos e Deputación.

 

Durante esta semana, os milleiros de visitantes que acolle a WTM de Londres poderán coñecer material promocional da provincia e, en concreto, destes dous itinerarios xacobeos que discorren íntegramente pola provincia da Coruña.

Este domingo 10 celébrase o maior evento deportivo de Negreira, polo cal precisamos do apoio e a colaboración de toda a veciñanza para que a Carreira Popular poida desenvolverse coas máximas garantías de seguridade dos corredores/as inscritas nas seis probas da gran festa do deporte na rúa.

 

Para iso é necesario respetar as prohibicións de estacionamento e circulación de vehículos nas rúas e estradas polas que transita o circuito homologado pola Federación Española de Atletismo (FGA). Sempre seguindo as indicacións dos corpos de seguridade, dígase Garda Civil de Tráfico, Garda Civil, Policía Local, Protección Civil, así como os voluntarios que colaboran para o normal desenvolvemento do evento.

 

O Concello de Negreira lembra que dende a tarde do sábado quedará restrinxido o estacionamento en toda a rúa do Carme e maila rúa de Castelao, zona onde está situada a liña de saída e meta da Carreira Popular. Prégase aos residentes e visitantes, que retiren os seus vehículos antes da medianoite do domingo, pois avisarase ao guindastre para proceder a súa retirada.

 

 

Horarios e percorridos

1ª Carreira: 5.000 metros (1 volta)

Saída: 10:00 horas

Percorrido: Rúa de Castelao; Teresa Fabeiro; Rosalía de Castro; avenida das Brañas; Xanín; rotonda de Ceilán; Comprexo deportivo de Pedra Mámoa; Parque Empresarial; avenida de Barcala; rúa da Cachurra; rúa do Carme e META na rúa Castelao.

Peche de control: 10:50 horas

 

2ª Carreira: 10.000 metros (2 voltas)

Saída: 10:50 horas

Percorrido: Rúa de Castelao; Teresa Fabeiro; Rosalía de Castro; avenida das Brañas; Xanín; rotonda de Ceilán; comprexo deportivo de Pedra Mámoa; Parque Empresarial; avenida de Barcala; rúa da Cachurra; rúa do Carme e META na rúa Castelao.

Peche de control: 12:05 horas

 

3ª Carreira: 1.200 metros. Categorías: Alevín e Infantil

Saída: 12:05 horas

Percorrido: Rúa de Castelao; Teresa Fabeiro; Rosalía de Castro, avda das Brañas; rúa da Cachurra; rúa do Carme e META na rúa Castelao.

 

4ª Carreira: 1.200 metros. Categoría Benxamín

Saída: 12:25 horas

Percorrido: Rúa de Castelao; Teresa Fabeiro; Rosalía de Castro, avda das Brañas; rúa da Cachurra; rúa do Carme e META na rúa Castelao.

 

5ª Carreira: 250 metros. Categoría Prebenxamín

Saída: 12:35 horas

Percorrido: Rúa do Carme e META rúa Castelao.

 

6ª Carreira 200 metros. Categoría Chupetes

Saída: 13:00 horas

Percorrido: Rúa de Castelao e META.