O campo da feira acolleu o pasado sábado 4 de maio, a edición número vinte e catro do Encontro dos maiores de Negreira, na que foi a despedida do alcalde, Jorge Tuñas Caamaño; e tamén da concelleira de Servizos Sociais e Educación, María Jesús Veiga Hortas, e do ex alcalde, Juan Rey Maceira, pois ningún deles concorrerá aos comicios municipais do 26 de maio.

Os irmáns Victorina e Jesús Dourino Forján Mayo, de 102 e 100 anos, respetivamente, foron homenaxeados coma os máis lonxevos entre os setecentos participantes, recibindo sendos agasallos de mans do alcalde Jorge Tuñas, e mailo primeiro tenente de alcalde, Manuel Ángel Leis Míguez. O evento incluíu un baile final amenizado polo dúo Matices.

O Concello de Negreira clausura este sábado 11 de maio, a partir das 15:30 horas e no Pavillón Municipal de Pedra Mámoa, a tempada de Escolas Deportivas 2018/2019 con exhibicións e partidos das diferentes disciplinas deportivas que teñen cabida na ampla oferta deportiva do Concello.

Como colofón á xornada, a partir das 19:30 horas terán lugar os partidos polo terceiro posto, seguido da gran final, da Copa de Fútbol Sala 2019 dos concellos de Santa Comba e Negreira.

Negreira acolleu o sábado 4 de maio a terceira fase do II Torneo Interescolas de Ximnasia Rítmica, onde compre salientar o primeiro posto en conxuntos cadete e un terceiro posto en conxuntos infantil, da Escola Municipal de Ximnasia Rítmica de Negreira, que tamén participa neste torneo cun conxunto alevín.

En categoría cadete, o conxunto de Negreira obtivo a máxima nota con 11,70 seguidas do Cadete B do Rítmica Compostela (11,35), e do Club Maniotas con 11,20 de nota final.

En categoría infantil, as de Negreira lograron a medalla de bronce cunha nota de 10,90, por detrás da Escola de Ximnasia Porta Norte (11,30), e do Colexio Internacional Eiris, cunha nota final de 12,00.

En categoría alevín venceu o Colexio Internacional Eiris, seguidas do Ximnasia Oroso e Ximnasia Coruña.

A cuarta fase e final do II Torneo Interescolas de Ximnasia Rítmica celebraráse en O Carballiño o un de xuño.

Actas dos torneos:

Fotos: Difusión ProSport

Un petisco elaborado a base de churrasco, con pataca panadeira, grelos e pan de broa, resultou ser a gañadora da exitosa oitava edición do roteiro de tapas de Negreira celebrada do 3 ao 5 de maio, nunha ducia de establecementos da vila.

A tapa da cervexaría A Esmorga obtivo o maior número de votos entre os tapeadores, seguida do polo en salsa de tomate con pure de patacas, do bar Oriel; e os boliños de bacallau con base de alioli e toque de pemento picante dá Vera, que foi presentado polo restaurante Os Arcos.

Este venres 10 de maio, ás nove da noite, entregarase a peza de artesanía en cera que simboliza o premio ao gañador, así como o sorteo dun bono viaxe entre quenes selaron a totalidade dos seus tapaportes. Dita entrega terá lugar na cervexaría A Esmorga.

Mañá sábado ten lugar a fase final do Club de Debate no Pazo da Cultura de Pontevedra.

A xornada comezará co enfrontamento entre o CPI Eusebio Lorenzo Baleirón contra o equipo do IES Ames preto das dez da mañá.

Un equipo do IES Xulián Magariños de Negreira acadou esta fase final pasando de primeiro na fase de zona na que foron os anfitrións o pasado 5 de abril. O equipo formado por Carolina Cunqueiro, Lorena Golán, Lara López, Andrea Losada, Iria Sánchez, Pablo Suárez, Diego Suárez e Inés Tuñez.

Xunto ca súa coordinadora María José García Merino, profesora do departamento de galego no centro, e a súa prepraradora Sara Porrit Marchena farán o seu debú na gran final ó redor das doce e dez debatindo contra o equipo do IES Mendiño, e o farán coa postura “a favor”.

Xa na xornada da tarde, ás 15:50 o equipo negreirés enfrontaráse ao equipo do IES de Milladoiro, defendendo unha postura “en contra”.

O anuncio dos gañadores, asi como a entrega de premios, será a partir das seis menos dez.

A temática elexida para esta fase final é “Falamos na lingua que escollemos” como parte do debate, se debaterá sobre a liberdade de escolla á hora de falar en galego, por exemplo, ou non e, ademáis, se a diversidade de linguas nunha mesma zona territorial é beneficioso ou non.

As reservas dos grupos sanguíneos Cero positivo (0+), Cero negativo(0-) e A positivo (A+) permanecen en nivel baixo en Galicia, mentres que as da negativo (A-) atópanse en nivel normal, segundo a información facilitada este xoves pola Axencia de Doazón de Órganos e Sangue ( ADOS).

ADOS lembra que para poder atender as necesidades dos centros sanitarios galegos son necesarias 500 doazóns de sangue cada día, polo que subliña a importancia de acudir a doar de todos os grupos sanguíneos.

Co fin de facilitar a doazón, este luns, 13 de maio, ADOS desprazará unidades móbiles a varios municipios galegos, entre eles, Negreira, que estará diante do Centro de Saúde pola tarde, de 15:30 a 21:00.

A nosa noraboa ao equipo do IES Xulián Magariños que por cuarta vez, gañou a fase final da competición do Club de Debate, promovida polos equipos de normalización lingüística de diferentes concellos galegos, entre eles o Concello de Negreira que segue apostando forte no eido educativo e de formación.

O Pazo da Cultura de Pontevedra foi testemuña o pasado sábado, dunha xornada novamente enriquecedora para o grupo de mozos e mozas do IES Xulián Magariños que representando ao Concello de Negreira, gañaron por cuarta vez, a final da competición do Club de Debate en Galicia, na cal, todos os equipos debateron sobre: “Falamos a lingua que escollemos”. Final con maiúsculas, con todos os elementos dunha.

Nervos, rivalidade sá, tensión e emoción foron as claves desta final na que se impuxero os integrantes do equipo do instituto Xulian Magariños, formado por Carolina Cunqueiro, Lorena Golán, Lara López, Andrea Losada, Iria Sánchez, Pablo Suárez, Diego Suárez e Inés Tuñez, quenes estiveron acompañados pola súa coordinadora, María José García Merino, profesora do departamento de galego; e a súa preparadora Sara Porrit Marchena, ademáis da concelleira de Educación do Concello de Negreira, María Jesús Veiga Hortas e maila directora do centro, Clara Rodríguez, así como pais e nais dos estudantes.

No seu primeiro debate, tomaron a palabra Lara López expresando as refutacións e Pablo Suárez expoñendo a presentación e a conclusión, ambos na súa postura "a favor". Xa pola tarde, na quenda do equipo negreirés, as portavoces foron Inés Túñez coa presentación e conclusión, e Iria Sánchez, coas refutacións.

Non seria ata última hora, pasadas as seis e media da tarde, que o xurado acabou coas deliberacións e posterior anuncio dos resultados, onde o equipo do IES Xulián Magariños, acadaría a máxima puntuación.

O sábado, pechando a xornada de Clausura das Escolas Deportivas, tiveron lugar os partidos da fase final da Copa de Fútbol Sala dos concellos de Santa Comba e Negreira.

Enfrontábanse polo terceiro e cuarto posto os equipos de Autoescola Antonio e a Autoescola Alvespa, o partido rematou nun empate a tres, e a quenda de penaltis decidiu que o equipo negreirés, Autoescola Antonio, se quedase co terceiro posto.

Acto seguido, tivo lugar a gran final, entre os equipos de Covas FT e Autoescola Mata, unha final rifada que acabou cun empate a catro tantos. De novo, foi a quenda de penaltis a que decidiu ao vencedor. Nesta, impúxose o negreirés equipo de Covas FT ante o maior atino baixo paos do seu porteiro.

A entrega dos trofeos realizárona o alcalde de Negreira, Jorge Tuñas Caamaño e a técnica de Deportes de Santa Comba, Elisa Capelo.

A programación da Primavera Deportiva e Cultural do Concello de Negreira achega este venres 17 de maio, festividade das Letras Galegas, o espectáculo Raigame, a cargo da Agrupación de Folclóre Galego Ximiela, de Louro (Muros). A cita é a partir das 21:00 horas no Auditorio do Centro Sociocultural e as entradas pódense retirar en venda anticipada por 3 euros na Delegación de Cultura, en horario de mañás.

Raigame é un espectáculo de 2 horas de duración, no que participan 64 músicos e bailaríns, ademais de dous actores e catro técnicos. Está baseado nunha das historias que marcou a Galicia nos dous últimos séculos, a emigración. A montaxe divídese nun total de 15 actos, cada un co seu correspondente vestiario, que tratan de mergullar ao espectador nunha historia contada en primeira persoa e que marcou a Galicia nos dous últimos séculos, a emigración.

Cada un dos seus quince actos conta co seu correspondente atrezzo, e sumerxen aos espectadores nunha historia contada de primeira man, na que a emoción e a veracidade coa que os actores a representan, fan que máis dunha vágoa se vise no teatro. Recollen o sufrimento dos máis de un millón de galegos e galegas, e todas as súas familias, que sufriron, e sofren, a soidade da emigración.

A Corporación Municipal de Negreira aprobou os orzamentos municipais para o exercicio 2019 na última sesión ordinaria do pleno celebrada este luns 13 de maio. Fíxoo cos seis votos dos concelleiros do equipo de goberno do PSOE e mailo voto de calidade do alcalde, desfacendo o empate tras dúas votacións, logo do voto en contra dos cinco concelleiros do Partido Popular e mailo da concelleira de Ciudadanos, e coa ausencia do edil non adscrito, José Manuel López Lago.

Os orzamentos xerais do Concello de Negreira ascenden a 5.040.718,35 euros, tanto no capítulo de ingresos como no de gastos. No primeiro capítulo, o Concello prevé un total de ingresos correntes de 4.693.747 euros e de 346.970 euros de ingresos de capital. As maiores partidas de ingresos corresponden a transferencias correntes (2.412.197); impostos directos (1.628.500), e taxas, prezos públicos e outros ingresos por 614.090 euros.

No capítulo de gastos resérvase para gastos correntes a cantidade de 4.552.347 euros, dos que a maior cuantía é para persoal (2.258.000); gastos correntes e servizos (2.000.908), e investimentos reais con 339.825 euros.

Tanto o Partido Popular como Ciudadanos expresaron o seu rexeitamento aos orzamentos no seu desacordo por ter sido levados a pleno faltando tan pouco para rematar a lexislatura. O PP criticou o feito de que coa previsión de máis ingresos por impostos directos, baixen un 10% os investimentos reais. Ciudadanos mostrou a súa disconformidade por non terse abordado no pleno municipal o gasto do Fondo de Cohesión Social e porque rómpense a estabilidade orzamentaria.

A Corporación Municipal tamén aprobou, por unanimidade, a adhesión do Concello de Negreira, á Asociación ¨Los pueblos más bonitos de España¨, quen propuso incorporar ao núcleo de A Ponte Maceira, a súa listaxe de pobos con esta distinción.