Todo está xa preparado para a recepción dos Reis Magos e a cabalgata que durante a tarde de hoxe venres 5 de xaneiro discurrirá polas rúas da vila.

O desfile arrincará si o tempo o permite ás 5 da tarde dende o Campo da Feira, e está previsto que neste ano o percorrido sexa máis amplo que en anteriores ocasións.

Pasarán pola Carreira de San Mauro, avenida de Santiago, Rúa Fonte do Carme, Castelao, Rosalía de Castro, Teresa Fabeiro, rúa X.M. Ardeiro, avenida das Brañas, Cachurra, Rúa do Carme, Camiño Vello e Rúa do Corzán ata chegar ao pavillón do Colexio O Coto que estará engalanado para a recepción. No traxecto estarán acompañados por un grupo de música tradicional galega.

Durante o percorrido da cabalgata, vaise a cortar ao tráfico as rúas afectadas, polo que prégase a colaboración veciñal.

Os nenos e nenas que visiten aos Reis Magos durante a festa no pavillón escolar, recibirán un agasallo e poderán divertirse con tódalas actividades programadas polo Concello de Negreira.

O Concello de Negreira presentou a súa programación das festas de Entroido 2024 que o sábado, día 10 de febreiro, vivirán o seu día grande co Desfile e concurso de carrozas e comparsas. A concentración será a partir das 16:00 horas no Campo da Feira, e o comezo do desfile está fixado para as 17:00 horas, a través da Carreira de San Mauro, rúa da Cachurra, avenida das Brañas, rúa Rosalía de Castro, rúa de Castelao e remate, na rúa do Carme, diante da Casa do Concello.

A agrupación musical Tíralle do aire abrirá o desfile e unha vez rematado, comezará a actuación musical do grupo Unión y Fuerza, na carpa da praza do Concello, lugar para a posterior entrega de 5.000 euros en premios. O prazo de inscrición permanece aberto ata o xoves, día 8 de febreiro, na Oficina de Cultura (Casa da Cultura).

Festa infantil

A segunda parada das festas terá lugar o luns, día 12 de febreiro, a partir das 17:30 horas no pavillón do colexio O Coto, coa Festa infantil de disfraces. Non faltará a animación musical, os xogos inchables, talleres de maquillaxe e un sorteo de agasallos entre toda a rapazada disfrazada.

Consulta as bases do concurso:  

Convocatoria de sesión extraordinaria do Pleno da Corporación municipal do Concello de Negreira, o luns, día 22 de xaneiro de 2024 ás 14.00 horas, de acordo coa seguinte orde do día:

Punto único.- Sorteo para a formación das Mesas Electorais a constituir con ocasión das Eleccións ao Parlamento de Galicia que se celebrarán con data de 18 de febreiro de 2024.

Convocada a sesión extraordinaria e urxente do Pleno da Corporación municipal do Concello de Negreira, o mércores, día 7 de febreiro de 2024 ás 20:00 horas, de acordo á seguinte orde do día:

- Primeiro.- Xustificación da urxencia da convocatoria

- Segundo.- Plan provincial de cooperación ás obras e servizos de competencia municipal (Plan Único de Concellos) “POS+ 2024”

- Terceiro.- Plan provincial de cooperación ás obras e servizos de competencia municipal (Plan Único de Concellos) “POS+ ADICIONAL 1/2024 Gastos sociais extraordinarios do exercicio 2024”.

- Cuarto.- Aprobación, se procede, do informe de auditoría do Plan de Acción polo Clima e a enerxía sostíbel.

A Escola de familias do instituto Xulián Magariños celebrou o pasado venres 2 de febreiro, unha charla sobre: Condutas de risco online e ciberdelincuencia, a cargo do experto en ciberseguridade, José Torres, responsable do Equipo de Investigación Tecnolóxica da Policía Xudicial da Guardia Civil de Pontevedra.

Esta acción foi promovida polo servizo de Orientación do centro, en colaboración coa asociación de nais e pais A Barcalesa e mailo Concello de Negreira, asistindo á mesma a concelleira de Educación, María del Mar García Vidal.

Ao encontro asistiron preto de 50 nais e pais. Entre os asuntos abordados, de máximo interese para as familias, a seguridade nos dispositivos móbiles e protección da información, a xeolocalización e redes wifi, e mesmo a mensaxería instantánea móbil como whatsapp ou telegram. A temática tamén abordou o ciberacoso, desde os tipos, o tratamento e a prevención, así como a protección da intimidade e da privacidade, redes sociais, videoxogos, o metaverso e maila intelixencia artificial.

José Torres é experto universitario en investigación da ciberdelincuencia. É diplomado polo Instituto Nacional de Ciberseguridade (INCIBE) como especialista en privacidade e seguridade nas RRSS. Tamén é diplomado polo Centro Nacional de Excelencia en Ciberseguridade (CNEC) como especialista na análise de evidencias dixitais. Ademais, foi membro do Consello Asesor do estudo de Unicerf sobre o impacto da tecnoloxía na adoslescencia.

O Pleno extraordinario e urxente da Corporación municipal aprobou este mércores, o Plan provincial de cooperación ás obras e servizos de competencia municipal (Plan único de concellos), por un importe de 560.557€ para o POS+2024. Tamén se aprobou o Plan complementario e o plan para financiar gastos sociais extraordinarios. Este último reserva unha partida de 88.617€.

O goberno municipal decidiu repartir os fondos do Plan de Obras e Servizos, que financia a Deputación da Coruña en dúas partidas. A primeira, de 310.162 euros está destinada a gastos correntes e, unha segunda para financiar obras dun importe de 240.534€, cos votos favorables de todos os representantes políticos. Os proxectos que se inclúen son: Aglomerado de vial municipal dende a estrada AC-447 ata Portor, por 151.575 euros, e Rede de saneamento e estación de bombeo de augas residuais no lugar de A Abeanca, por 88.958 euros.

Na sesión plenaria, tamén por unanimidade, aprobáronse os proxectos do Plan complementario 2024: Aglomerado vía de Aro a Pedralonga (142.864€); aglomerado vías en A Chancela, avenida de Santiago e vial en Cobas (52.553€); humanización rúa do Carme (323.960); aglomerado vía pública de A Chancela á estrada DP-1302 (74.375); aglomerado vía dende Pesadoira a límite con Mazaricos (105.703); rede de saneamento no lugar de Cobas (161.122€), e o proxecto de construcción de beirarrúa dende Negreiroa ao cemiterio novo.

E co voto favorable do PSdeG-PSOE e o concelleiro do BNG, e coa abstención do Partido Popular, aprobouse o informe de auditoría do Plan de Acción polo Clima e a enerxía sostíbel.

Este domingo, día 18 de febreiro, celébranse as Eleccións ó Parlamento de Galicia en que a cidadanía de Negreira poderá exercer o seu dereito ao voto nun total de once mesas distribuidas en oito colexios electorais, e que albergarán as urnas para depositar o seu voto, entre as 09:00 e as 20:00 horas.

A única novidade recae en que as persoas con dereito ó voto censadas na parroquia de Portor, deberán facelo no colexio electoral do Centro Sociocultural de Negreira, e non coma nas últimas eleccións que fixérono no Teleclub da Chancela. Exercerán o voto na Sección 001, sendo na mesa A para os apelidos da A-L e na mesa B, da M-Z.

Locais electorais

- Centro Sociocultural (4 mesas)

- Teleclub da Chancela (Logrosa)

- Local social de Aro (Aro e Broño)

- Local social de Gonte (Gonte, Zas e Cobas)

- Teleclub de Landeira (Landeira e A Pena)

- Local social de Romarís (Arzón, Lueiro e Xallas)

- Teleclub de Liñaio (Liñaio)

- Escola de Pesadoira (Alvite, Campolongo e Bugallido)

Ofrecémoslles os resultados acadados polas cinco principais forzas políticas nas Eleccións ó Parlamento de Galicia deste domingo, 18 de febreiro, nas once mesas distribuidas en nove colexios electorais no concello de Negreira.

O Partido Popular (PP) foi a candidatura máis votada con 2.097 apoios (+226), seguida da do Bloque Nacionalista Galego (BNG), con 1.056 votos (+434). A terceira candidatura máis votada en Negreira foi a do Partido Socialista de Galicia (PSdeG), con 537 apoios (-171). A continuación, aparece a candidatura de Vox, con 80 votos (+41), e Sumar Galicia ocupa a quinta posición, con 35 votos.

En total votaron este domingo en Negreira 3.902 persoas, un 68,95% do censo de votantes fronte ao 60,12% que o fixeron no ano 2020. A abstención foi de 1.757 persoas (31,04%), sobre un censo total de 5.659 persoas con dereito ó voto nas eleccións celebradas onte.

O Concello de Negreira Negreira desenvolverá unha completa programación de actividades para conmemorar o 8M, Día Internacional da Muller. A concelleira de Servizos Sociais, Muller e Igualdade, Teresa Duro Leis, cando á directora do Centro de Información á Muller, Rosa Fuentes Cambeiro, e maila psicóloga, Natalia Suárez, foron as encargadas de presentala este martes 27 de febreiro en Radio Negreira.

As actividades deron comezo ao longo do mes de febreiro, cando o alumnado de 1º de bacharelato do IES Xulián Magariños asistiu a diversos obradoiros de formación fronte ao acoso na rúa, impartidos polo persoal municipal do Concello de Negreira.

Durante o mes de marzo, a planta baixa do Centro Sociocultural acollerá a exposición ‘Destino: Igualdade’, da Fundación Vicente Ferrer. Ademais, este mesmo mes terá lugar a presentación do V Plan de Igualdade do Concello de Negreira.

O xoves, día 7, ás 18:00 horas, a rapazada será a protagonista, xa que poderán gozar, no auditorio da Casa da Cultura, do contacontos musical ‘Cambia o conto’, de Música Miúda. Unha forma orixinal e divertida de achegar o concepto da igualdade ás idades máis temperás.

E a Casa do Concello cubrirase cunha lona e iluminarase de morado para dar visibilidade a esta data tan sinalada no camiño á igualdade. Este mesmo día será o prato forte da programación: a entrega do VIII Premio 8M do Concello de Negreira, que este ano recae en María Moldes Suárez, cooperante e delegada da Fundación Vicente Ferrer en Galicia e Asturias.

Traspasar fronteiras

A galardoada, orixinal e veciña de Negreira, é licenciada en Belas Artes e en Publicidade e Relacións Públicas pola Universidade de Vigo. Como profesora foi quen de traspasar as fronteiras do noso país e transmitir o español en diferentes partes do mundo, como Londres, Roma, e mesmo na India.

Con este premio, desde o Concello de Negreira búscase recoñecer o traballo e o papel das mulleres vinculadas ao municipio ao longo da historia. A gala terá lugar o venres 8 de marzo, ás 20:00 horas, no auditorio Afonso Eanes de Cotón. A entrada será libre e gratuíta.

Por último, o sábado, día 9 de marzo, o auditorio Afonso Eanes do Cotón acollerá, ás 21:00 horas, o monólogo ‘Enredada’, de Leti da Taberna, dirixido a un público adulto.

Desde o CIM Negreira aseguran que “é un pracer poder contar, un ano máis, cunha programación repleta de actividades que nos permiten chegar a todas as idades e seguir avanzando neste camiño no que aínda queda tanto por facer”, ademais, sinalan, “é un orgullo poder seguir promovendo este tipo de iniciativas e poñer o noso grao de area para darlle visibilidade ao papel desenvolto polas mulleres do noso municipio”.

Este 2024 é o ano no que se conmemora o centenario do nacemento do profesor e filólogo negreirés, Xosé Luís Pensado Tomé (Negreira, 1924 - Salamanca, 2000). Xosé Luís Pensado foi o noso intelectual que acadou os máis altos graos no mundo académico das Letras no século XX.

Exerceu como docente na Universidade de Madrid e como catedrático de Filoloxía Románica e de Filoloxía Galaico-Portuguesa, nas Universidades de Oviedo e de Salamanca. Está considerado o máximo especialista mundial na figura do frade sabio e ilustrado do século XVIII, P. Martín Sarmiento.

As publicacións do profesor Pensado, no ámbito da súa especialidade, cóntanse por centos. Dende o Centro Ramón Piñeiro para a Investigación en Humanidades, un centro dependente da Consellería de Cultura e, mailo Concello de Negreira, conmemórase esta efeméride coa celebración dun Simposio de conferencias dedicado á súa vida e obra, a celebrarse entre Santiago de Compostela e Negreira, o venres, día 15 de marzo de 2024.

Programa de actos

MAÑÁ

Lugar: Aula Co1 da Facultade de Filoloxía da Universidade de Santiago de Compostela.

- 9:30 horas - Apertura do Simposio, con representantes da Universidade de Santiago de Compostela, a Real Academia Galega, da Secretaría Xeral de Política Lingüística, do Concello de Negreira e da organización do simposio.

- 10:00 horas – Conferencia: “A contribución de Xosé Luís Pensado ao coñecemento do Padre Sarmiento”, por Henrique Monteagudo Romero.

- 11:00 horas – Conferencia: “Unha visión de Pensado na Universidade de Salamanca”, a cargo de Alexandre Guerra.

- 11:30 – Pausa

- 12:15 horas – Conferencia: “X. L. Pensado e as súas ideas sobre a gueada”, a cargo de Ramón Lorenzo Vázquez.

- 13:00 horas – Conferencia: “A obra de Xosé Luís Pensado Tomé (1924-2000), na constitución da lingüística galega moderna: datos, reflexións e lembranzas”, por Xesús Alonso Montero.

TARDE

Lugar: Auditorio da Casa da Cultura (Negreira)

- 17:30 horas – Conferencia: No centenario do nacemento de Xosé Luís Pensado Tomé”, por X. Amancio Liñares Giraut.

- 18:15 horas - PAUSA

- 18:45 horas – Conferencia: “D. Xosé Luís Pensado Tomé: Galicia desde Salamanca”, por Xosé Luís Axeitos.

- 20:00 horas – DESCUBERTA dunha placa conmemorativa na casa natal do profesor Xosé Luís Pensado Tomé, na rúa do Carme.

Nota: Haberá un servizo gratuíto de autobús para os desprazamentos: Santiago – Negreira – Santiago.