O Campamento Urbano Respira, a desenvolverse durante os meses de xullo e agosto, nas instalacións do CEIP O Coto, está dirixido a familias con menores de 3 anos (escolarizados) a 12 anos, e a oferta de prazas é limitada. O prezo por usuario/a, é de 100 € ao mes, e 50 € á quincena. O segundo irmán terá un desconto do 50%.

Requisitos de acceso ó servizo (poderán acceder ó mesmo sempre que cumpra os dous requisitos) :

- Familias empadroadas no concello de Negreira.

- Familias nas que ambos proxenitores ou titores legais estean traballando ou en situación de busca activa de emprego ou formación laboral.

Para a adxudicación das prazas terase en conta a orde dos seguintes criterios recollidos no Regulamento do “Programa Negreira Concilia (Madrugadores e Merendas), Diververán (BOP 8 de marzo de 2022, núm. 45):
1º criterio.- Familias que aporten Informe Social que indique a necesidade do servizo en base a circunstancias socioeconómicas e familiares.

2º criterio.- Familias con fillas/os de mulleres vítimas da violencia de xénero.

3º criterio.-Familias monoparentais.

4º criterio.- Familias numerosas.

5º criterio.- Familias nas que algún das/os proxenitores teñan o seu posto de traballo no concello de Negreira.

6º criterio.- Calquer usuario/a.

O campamento abarca desde o 1 de xullo ata o 31 de agosto, podendo as familias elexir as quendas que necesiten, quedando distribuídas da seguinte maneira co seu correspondente prezo público recollido na ordenanza (11 de marzo de 2022):

1ª QUENDA: DO 1 AO 15 DE XULLO

2ª QUENDA: DO 16 AO 31 DE XULLO

3ª QUENDA: DO 1 AO 15 DE AGOSTO

4ª QUENDA: DO 16 AO 31 DE AGOSTO

Documentación:

- Modelo normalizado de ficha de inscrición

- DNI dos responsables do menor

- Libro de familia, sentenza ou resolución administrativa que acredite a relación xurídica entre ambos

- Tarxeta sanitaria do/a menor

- Declaración do IRPF e no caso de non presentala certificación negativa

- Xustificante bancario de ingreso do prezo público

- Xustificante da situación de emprego (Informe vida laboral, última nómina, pago último recibo de autónomos).

- Xustificante da necesidade do servizo por incompatibilidade horaria( certificado de demandante de emprego, xustificante de realizar unha busca activa de emprego, xustificante de asistencia a accións de formación laboral).

O horario do campamento será de 8:30 a 14:30 horas. As familias poderán facer uso do servizo en función das súas necesidades permitindo a entrada e saídas flexibles. Para o bo desenvolvemento das actividades programadas, recoméndase a aquelas familias que non vaian a facer uso do horario completo do campamento, incorporarse ao mesmo sobre ás 10:00 h. e saída a partir das 13:30h.

Exención e bonificación

Segundo as circunstancias da unidade familiar aplicaranse os seguintes descontos:

1.- Exención: A emisión dun Informe Social do departamento de servizos sociais que indique a necesidade do servizo sen que haxa posibilidades económicas para abonar o custo do mesmo conlevará a exención da cota.

2.- Bonificación: Cando asistan ao mesmo servizo varios irmáns de xeito simultáneo, o segundo irmán e sucesivos terán un desconto dun 50%.

O persoal técnico responsable do servizo poderá requerir outra documentación complementaria ou adicional que se precise.

As solicitudes poden presentarse de xeito telemático, a través da sede electrónica do Concello (https://negreira.sedelectrónica.gal), ou de xeito presencial no Rexistro xeral do Concello de Negreira, en horario de 9:00 h a 14:00 h de luns a venres, desde o 13 ao 25 de maio.

Datos adxuntos:

O Concello de Negreira informa sobre a publicación na web municipal, das listaxes definitivas de admitdos/as e de agarda, da Escola Infantil Municipal para o curso 2022-2023. Lembramos que o prazo de matrícula abrangue do 1 ao 15 de xuño.

O horario de atención para formalizar a matrícula será de 9.00 a 14.00 horas na propia escola con cita previa. O número de teléfono é: 981 88 18 58.

Os premios, cuxas bases xa están publicadas na web www.youtubeiras.gal, repartirán este ano 7.500 euros entre as persoas gañadoras de oito categorías: canle, youtubeira/o, youtubeira/o revelación, vídeo, calidade lingüística, pioneiro, rede e o premio do público. O prazo de inscrición abrirase o 27 de setembro e finalizará o 15 de novembro.

Youtubeiras é unha iniciativa organizada polos servizos de normalización lingüística dos concellos da Baña, Ames, O Grove, Moaña, Negreira, Pontevedra, Rianxo, Ribadeo, Rois, Santiago de Compostela e Teo, das universidades da Coruña, Santiago e Vigo e, co apoio da Deputación da Coruña.

Para rede, a nosa

María López encargouse de desvelar o lema para esta sexta edición: Para rede, a nosa. “Con este lema, forte e enérxico, simbolízase a seguridade e máis o orgullo de termos unha rede de creadoras e creadores que xeran contidos en Youtube, mais tamén noutras plataformas: Twitter, Facebook, Instagram, TikTokou Twitch. Así está a medrar a presenza da nosa lingua nos novos formatos, conectando con novas xeracións e chegando a outros espazos imprescindibles para o futuro”, sinalou López, quen tamén destacou que Youtubeiras actúa como un “elemento normalizador da nosa fala” e de “divulgación da nosa cultura”, engadiu María López.

Os Premios reestruturan, ademais, as súas categorías. Contarase cun total de oito apartados: youtubeira/o, canle, vídeo, youtubeira/o revelación, premio á calidade lingüística, pioneiro, rede e premio do público. As persoas gañadoras dos sete primeiros recibirán 1.000 euros, mentres que no último caso a dotación económica ascenderá aos 500 euros. Así, os Premios Youtubeiras repartirán un total de 7.500 euros. O prazo de inscrición para competir no concurso abrirá o 27 de setembro e finalizará o 25 de novembro.

O Concello de Negreira abriu o procedemento para a solicitude de permisos para a realización das fogueiras na noite de San Xoán, o cal pode facerse efectivo ata as 14:00 horas do martes, día 21 de xuño, na Casa do Concello.

As persoas solicitantes deberán ser maiores de idade. Deberán coidar os arredores e coñecer os números de teléfono de Emerxencias (112), ou Garda Civil (062).

A tramitación dos permisos pódese facer por vía presencial, no Rexistro Xeral do Concello, na rúa do Carme, 3 baixo, ou mediante a Sede electrónica, a través da web: www.concellodenegreira.gal

Normas

En zona urbana, o volume de combustible do lume non deberá superar os 3 metros de perímetro, nen o metro de altura. En zonas rurais, a cacharela non poderá exceder os 6 metros de perímetro nen os 3 metros de altura. A separación entre as fogueiras e os edificios, árbores, vehículos e mobiliario urbano será de coma mínimo 12 metros.

Debe poñerse especial coidado de non situar as cachelas baixo tendidos eléctricos ou telefónicos, así como que nos arredores non exista ningún local no que se almacenen produtos inflamables.

Doutra banda, lembremos que está prohibida a queima de neumáticos, plásticos, escumas de poliuretano, aceites e, de xeito xeral, calquera substancia que ao arder desprenda fume tóxico. En ningún caso se botarán ao lume recipientes que conteñan líquidos inflamables ou gases a presión (aerosois), aínda estando baleiros.

Os organizadores deberán atender as indicacións da Policía Local e dos Bombeiros. Non se aproveitará a cachela para queimar restos domésticos, agrícolas ou forestais.

As familias con crianzas da comarca de Barcala celebrarán a súa Festa do Apego, o programa de socialización das crianzas coa lingua galega dende idades temperás, o venres día 1 de xullo, na área recreativa de Cobas.

As familias con crianzas están chamadas a participar nas actividades promovidas dende o Servizo de Normalización Lingüística do Agrupamento A Baña-Negreira, co apoio da Deputación da Coruña e mailos concellos barcaleses.

Programa

A partir das 17:30 horas teremos unha actuación de contacontos a carón da fiestra con Os Trotaventos, e unha hora despois será a quenda para a actuación de Música Miuda. Completarán o programa festivo os xogos populares a cargo de Biosbardos.

No caso de choiva trasladarase ao Auditorio de Negreira.

Co obxectivo de dar a coñecer dun xeito ameno e didáctico a música feita en galego, presentouse a xira Os Camiños das Músicas Galegas que ofrecerá A Duendeneta, unha orixinal music truck que percorrerá o Camiño de Fisterra e Muxía, o francés e a Vía da Prata durante os meses de xuño e xullo.

Trátase dun proxecto de difusión cultural que naceu o ano pasado e que percorre concellos do Camiño de Santiago co obxectivo de dar a coñecer a música galega e feita en galego. Nesta nova edición, a furgoneta móbil viaxará ao longo do meses de xuño e xullo por diversas prazas e vilas, ofrecendo ata 32 sesións musicais de carácter didáctico, que mostrará a historia da música da nosa comunidade.

O encargado de exercer como DJ de esta iniciativa é o xornalista Carlos Crespo, quen estará a cargo das sesións musicais, cunha duración aproximada de hora e media ou dúas horas de duración, coas que achega a música de galegos e en galego aos peregrinos que percorren o Camiño, cunha selección musical coa que percorrerá toda a historia musical galega, desde Andrés Dobarro ata as Tanxugueiras.

A Duendeneta percorrerá os concellos de Fisterra, Muxía, Corcubión, Cee, Negreira no Camiño de Fisterra, o que permitirá que a veciñanza de Negreira poida desfrutar desta orixinal discoteca móbil vintage, mesturándose durante as sesións cos propios peregrinos.

De cara a divulgar información sobre o parque eólico de Alvite, o Concello de Negreira programou unha xuntanza informativa para o martes, día 21 de xuño, ás nove da noite, no Local social de Pesadoira, na parroquia de Alvite.

A solicitude de autorización administrativa previa, a declaración de utilidade pública, xunto coa necesidade da urxente ocupación dos terreos, e a autorización administrativa de construcción; e mailo estudo de impacto ambiental, e o proxecto sectorial, atópanse en prazo de exposición pública para presentar alegacións por un periodo de 30 días hábiles, contados dende o venres, día 10 de xuño.

Trátase dun novo proxecto eólico promovido pola madrileña Green Capital Power en Negreira e arredores. Afecta a fincas dos concellos de Negreira, Mazaricos e Santa Comba. Toda a documentación atópase exposta nos tres concellos, e maila Xefatura Territorial de Economía, Empresa e Innovación, así como na rede.

O parque eólico de Alvite prevé que se instalen 12 aeroxeradores de 3,45 megawatios de potencia unitaria. Conta cun orzamento de execución de 32.587.955 euros.

Toda a documentación pódese comprobar premando na seguinte ligazón da publicación no Diario Oficial de Galicia (DOG), número 110 de 2022, con data do xoves 9 de xuño: 

O Servizo Municipal de Augas do Concello de Negreira, a través da empresa concesionaria Espina e Delfín, informa que procederá a efectuar un corte de subministración que afectará a toda a rede de abastecemento de Negreira, debido aos traballos de limpeza anual do depósito xeral.

Devandito corte terá lugar dende as 23:00 horas do mércores 22 de xuño ata as 06:00 horas do xoves 23 de xuño.

Debido a estes traballos, a rede considérase en presión a tódolos efectos. Para calquera dúbida ou aclaración ao respecto, poden chamar aos números seguintes: 981 881 569 ou 626 986 941.

A Escola Municipal de Música de Negreira (EMMN), presenta o horario das materias grupais do curso 2022-2023 e os días en que están na escola os profesores de instrumento para as clases individuais.

O horario exacto das clases de instrumento darase o venres, día 16 de setembro, ás 18:00 horas, na data fixada para a presentación do curso no Auditorio do Centro Sociocultural.
Matrícula novo alumnado

O prazo de matrícula para novo alumnado da Escola Municipal de Música comprende dende o día 1 de xullo ata o 9 de setembro de 2022. De forma presencial no Rexistro Xeral do Concello, e de forma telemática, a través da sede electrónica.

Catro días completan o programa da semana grande do verán na vila de Negreira, do xoves 7 ao domingo 10 de xullo, cun dos mellores programas que se lembran, e promovido pola Asociación de Festexos de Negreira coa colaboración do Concello de Negreira.

Xoves 7.- Verbena amenizada pola orquestra Olympus de Negreira, e maila formación New York, a partir das 11 da noite na praza do Concello.
Venres 8.– Pasacalles coa charanga Tíralle do aire e pola noite, espectacular verbena coas orquestras París de Noia e Finisterre.
Sábado 9.- Pasacalles cos Gaiteiros da Baña, quenes acompañarán a procesión motorizada que inclúe concentración no campo da feira, ás 11:30 horas, e misa solemne ás 12 horas na capela do Cotón, e a partir das 13:30 horas o comezo da procesión polas principais rúas da vila.

A partir das 15:00 horas sesión vermú co dúo Rosán, no Refuxio de Cobas, seguida do xantar de confraternidade, con xogos inchables, festa da escuma e toro mecánico. Organizado pola Asociación de Transportistas de Negreira.

E ás 15:30 horas, no campo de fútbol Jesús García Calvo terémola proba da Liga Autonómica de Agility, mentres que pola noite haberá o concerto do grupo De Vacas na praza do Concello, seguido da disco móbil Chocolate.

Domingo 10.- Ás 9:30 horas comezo da segunda xornada da Liga Autonómica de Agility no campo Jesús García Calvo, e celebración do Día do Neno nas atraccións da festa (prezos reducidos). Ás 19:30 horas chega o fin de festa co concerto na praza do Concello a cargo da Banda de Música Ateneo de Negreira.