Décima edición dun evento que reúne ao mellor do deporte negreirés a quen o concelleiro de Deportes, Novas Tecnoloxías e Participación Cidadá, Iván Guardado Porto deu a benvida: “Temos a oportunidade de recuperar o recoñecemento ao traballo dos nosos deportistas e clubes para poner en valor todo o esforzo que realizan”, salientou o responsable da área deportiva municipal.

A Gala do Deporte recoñeceu o labor d@s nos@s deportistas, clubes e persoas e entidades que tanto contribúen a levar o noso deporte ás máis altas cotas a nivel autonómico e nacional:

- Mellor club: Club Atletismo Negreira

- Colaborador: José Antonio Suárez Otero

- Mellor promesa masculino: Jun Sieira Gerpe

- Mellor promesa feminina: Margarita García Tatis

- Traxectoria club: Club Petanca Negreira

- Mellor traxectoria: Ainhoa Rodríguez Fernández

- Recoñecemento especial: Andrés Domínguez Silva

- Mellor deportista 2021: Alba Pérez Nieto

Mención especial á presenza do padriño da Gala, Ezequiel Mosquera, ex-ciclista profesional e impulsor de O Gran Camiño Cycling, quen foi obsequiado polo alcalde de Negreira, Manuel Ángel Leis Míguez. Agradecemos tamén a presenza de Blas García, deputado de Promoción Económica da Deputación da Coruña e alcalde de Ames; de Isidoro Hornillos Baz, presidente da Federación Galega de Atletismo, así como da alcaldesa de Santa Comba, María Pose Rodríguez; do alcalde de A Baña, Andrés García Cardeso, e do alcalde de Brión, Pablo Lago Sanmartín, así como concelleir@s de Deportes dos citados concellos veciños pola súa asistencia.

Imaxe: ABRAHAM FOTÓGRAFAS

Debido aos traballos de ampliación e mellora do trazado que a Deputación da Coruña está a realizar na estrada provincial DP-5602 de Negreira a Pontenafonso, infórmase á veciñanza en xeral, que se procederá a un corte de tráfico necesario para continuar ditas obras, no treito entre Reibó (punto quilométrico 7+000), e a ponte de Barbazán (punto quilométrico 9+500); comprendido entre o xoves 17 de febreiro, e o 13 de agosto do ano en curso, habilitándose un desvío alternativo para vehículos de dimensións reducidas.

• O desvío en dirección Pontenafonso faráse desde Reibó (Liñaio), a través de Bellalta, Vilar de Ordoeste e Pedralonga, ata conectar novamente coa DP-5602.

• En dirección Negreira dende Lueiro, Barbazán, Xallas, Romarís e Porqueira; a través da DP-5602 por Pedralonga, Vilar de Ordoeste, Bellalta e até Reibó (Liñaio).

Pregamos desculpen as molestias que se poidan ocasionar, pero trátase dun corte necesario para o bo desenvolvemento dos traballos planificados pola empresa adxudicataria.

O Alcalde de Negreira, Manuel Ángel Leis Míguez, en nome da Corporación Municipal, quere expresar as máis profundas condolencias e o fondo pesar polo triste pasamento de Jesús Andrade Patiño, quen fora concelleiro do PSdG-PSOE entre os anos 1987 e 1999 sendo primeiro tenente de alcalde e concelleiro de Deportes até o ano 1995.

O Concello de Negreira comunica que gardará un minuto de silencio na súa memoria, na vindeira sesión plenaria da Corporación Municipal e quere mostrar o seu pésame a familiares e achegados por tan triste perda.

D.E.P.

Ante as numerosas queixas veciñais e a actitude incívica dalgúns/as propietarios/as de animais no referente as deposicións dos mesmos na vía pública, xardíns, parques infantis, zonas de ocio ou incluso instalacións deportivas, recordamos a veciñanza a obriga de recollelos e limpar inmediatamente a zona afectada, incluindo farolas maceteiros, portais de vivendas ou de locais comerciais, ( artigo 11, REGULAMENTO DE MEDIO AMBIENTE, DE LIMPEZA PÚBLICA E RECOLLIDA DO LIXO do CONCELLO DE NEGREIRA):

· Os animais deben percorrer a vía pública e outros espazos, atados e con bozal si é o caso, dependendo da normativa ó respeto.
· A identificación do animal mediante microchip é obrigatoria nos primeiros tres meses de vida ou un mes despois da súa adquisición.
· O propietario/a ten a obriga de ter sempre a disposición todo o material necesario para a recollida das deposicións, incluida auga para limpar a zona usada.
· A exposición á veciñanza de ditos excrementos, pode xerar un risco para a saúde, polo que compre evitalo.
· As infraccións leves, como neste caso, poderán ser sancionadas con apercibimento e multa de ata 750 euros.

Polo tanto apelamos unha vez máis a colaboración da veciñanza para manter un pobo limpo, tendo así unha mellor convivencia en Negreira.

Para iso comezaremos cunha campaña de control e vixilancia por parte da Policía Local nos vindeiros días.

O servizo de telefonía móbil 5G de nova xeración na banda de 700 Mhz comeza a prestarse no concello de Negreira polas principais operadoras de telefonía móbil do mercado nacional. A través dunha fase inicial, as operadoras verificarán a calidade do servizo que mellorará a cobertura tanto en interiores coma en exteriores, ademais dunha mellora sustancial na velocidade de conexión a Internet, e servizos de TV, vídeo e música baixo demanda.

A mellora coa prestación deste servizo segundo trasladaron desde Llega700 ao Concello de Negreira, conlevará a aparición de determinadas afectacións na recepción do sinal de Televisión Dixital Terrestre (TDT) para os usuarios, xa que esta frecuencia de 700 Mhz empregábase anteriormente para o servizo de TDT.

No caso de chegarse a producir afectacións na recepoción do sinal televisivo, as operadoras móbiles habilitaron Llega700, para solventar as incidencias a través do número de teléfono gratuito: 900 833 999.

Trala notificación da afectación ao sinal de recepción da TDT por parte da veciñanza, un técnico desprazarase ao domicilio para realizar as comprobacións oportunas e o acondicionamento para solucionar a incidencia, sen coste algún.

Este sábado 26 de febreiro, as rúas da capital do Val de Barcala recuperan o ambiente festivo co gran desfile de comparsas, carrozas e grupos do Entroido 2022 que comezará ás 18:00 horas coa saída dende o Campo da Feira, onde os participantes deberán concentrarse a partir das 17:00 horas. O percorrido do desfile será o seguinte: Carreira de San Mauro; rúa da Cachurra; avenida das Brañas; rúa Rosalía de Castro; rúa de Castelao e remate diante da Casa do Concello.

Un amplo dispositivo de seguridade formado polos axentes da Policía Local, e voluntarios de Protección Civil encargarase de velar polo correcto desenvolvemento do evento, que obrigará a cortar o tráfico ao longo do percorrido antes mencionado. Recoméndase non usar os vehículos entre as 18:00 e as 21:00 horas do sábado.

Ao remate do desfile, comezará a actuación musical da orquestra Miramar na carpa municipal da Praza do Concello, amenizando o Entroido para logo entregar os premios do concurso nas súas diferentes categorías, tralo fallo do xurado encargado de valorar aos participantes no desfile.

Nesta edición contamos cunha vintena de participantes: dez na categoría de individuais e parellas; catro, na de grupos; e sete agrupacións en comparsas con cadansúa carroza. Os seus lugares de procedencia: unha ducia de Negreira; A Baña; Vilagarcía de Arousa; Soutomaior; Arteixo; Ordes; Porto do Son, e Noia.

Pregón

O domingo 27 a partir das 13.00 horas contaremos coa presenza de Tonhito de Poi e Alberto Piñeiro, na carpa municipal da Praza do Concello.

Concurso infantil

O luns 28 de febreiro teremos o baile e concurso de disfraces infantil, na carpa da Praza do Concello, coa concentración a partir das 17:00 horas e comezo da actividade a partir das seis da tarde. A rapazada interesada deberá anotarse antes do concurso na propia praza.

O concurso de disfraces infantil contará con dúas categorías: nenos/as de 1 a 6 anos e, nenos/as de 7 a 16 anos; cos seguintes premios:

Grupo A (1 a 6 anos)

1º Cheque agasallo (valor 150 €)
2º Lote de xogos didácticos
3º Lote libro

Grupo B (7 a 16 anos)
1º Cheque agasallo (valor 150 €)
2º Tablet
3º Reloxo intelixente

As rúas de Negreira ateigáronse de xente este sábado de Entroido para vivir o día grande destas festas paganas nas que o humor e a diversión mestúranse con todo tipo de caracterizacións e disfraces, e tamén para repasar a crónica social e política do ano anterior.

O Concello de Negreira fixo unha firme aposta pola recuperación dun desfile-concurso convertido dende fai moito tempo nunha das grandes referencias na provincia de A Coruña e en Galicia, con máis de 4.400 euros en premios e unha participación que superou as expectativas tras un ano marcado pola pandemia da covid-19, no que se ben é certo que houbo menos comparsas grandes ca antes da pandemia, os participantes superaron en total a vintena, algo moi de agradecer a todxs polo seu traballo e esforzo para sacar adiante as súas temáticas.

Aquí deixámosvos o resultado final segundo o dictame do xurado formado por concelleiras de Ames, Brión e A Baña, e un representante do Concello de Outes:

COMPARSAS

1º premio (1.000€)- Os gaitistas de Hamelín (Ordes)
2º premio (500€) – Os Remolóns (Vilagarcía)
3º premio (200€) – Nicravisión
4º premio (100€) – Tarde, mal e arrastro (Porto do Son)
Accésit 1 (60€)– El gran circo italiano
Accésit 2 (60€) – Galiza profunda (A Baña)

CARROZAS

1º PREMIO (1.000€) – Le damos colorín al amor y al festín (Vilagarcía)
2º premio (500€) – Nicravisión
3º premio (200€) – Galiza profunda
4º premio (100€) – Exército do Arco Iris (Porto do Son)
Accésit 1 (60€) – Sirkvetran (Negreira)
Accésit 2 (60€) – Barcala descalada

GRUPOS

1º premio (200€) – Fantasía rural (As sojras)
2º premio (150€) – As teixugueiras (Outes)
3º premio (100€) – Capeando o temporal (Negreira)
INDIVIDUAIS/PARELLAS
1º premio (100€)– Mundo máxico de Pinocho (Negreira)
2º premio (80€) – Xan e pericán
3º premio (50€) – A nosa maxia
Premio simpatía “Juan Varela Areoso”
Barcala descalada (60€)

Imaxes: ABRAHAM FOTÓGRAFAS

A carpa municipal da praza do Concello encheuse este luns de Entroido de rapazada disposta a pasar unha tarde moi divertida coa festa infantil de disfraces que resultou todo un éxito de participación. Arredor desta celebración, que estivo acompañada polo bo tempo, desenvolvéronse unha serie de actividades de animación con música e baile, ademais de obradoiros de pintura, ou inchables para pasalo en grande.

O concurso de disfraces deparou o seguinte resultado:

Grupo A (1 a 6 anos)

1º premio (cheque agasallo 150€)
Izan e Enzo Nieto Rey – Cultura invit
2º premio (lote de xogos didácticos)
Alba Plata Piñeiro – Aina diosa celta
3º premio (lote libros)
Vega Vieito Cancela – Cindy Lou Crincys

Grupo B (7 a 16 anos)

1º premio (cheque agasallo 150€)
Iria Serrano Mayo - Beyoncé
2º premio (tablet)
Sabela Rivas Leis – Dama Amiga
3º premio (reloxo intelixente)
Sandra Hermo Blanco – Raiña do mal

Imaxes: ABRAHAM FOTÓGRAFAS

O Ministerio para a Transición Ecolóxica subvenciona con 1,68 millóns de euros a renovación e mellora da eficiencia enerxética do alumeado público do municipio de Negreira, segundo salientou hoxe o delegado do Goberno en Galicia, José Miñones, durante unha visita ao noso concello, onde salientou a aposta do Concello por incorporar neste proxecto un sistema de xestión integral do mapa lumínico “que o sitúa á vangarda dos municipios de toda Galicia”.

Así, o delegado presentou hoxe en Negreira as liñas de axudas dispoñibéis para as entidades locais e habitantes dos municipios de reto demográfico, que financia o Plan de Recuperación do Goberno Central. E así o fai en Negreira, onde, a través de distintos Ministerios, “traballa na mellora das condicións ambientais e na dotación de servizos da internet de alta velocidade”, detallou Miñones, quen foi recibido polo alcalde negreirés, Manuel Ángel Leis Míguez e membros da Corporación municipal. O delegado estivo acompañado pola subdelegada do Goberno na Coruña, María Rivas.

O delegado destacou que o Ministerio para a Transición Ecolóxica financia con 1,68 millóns de euros a renovación integral da iluminación pública municipal de Negreira, o 80% do custo total do proxecto. O Concello de Negreira asumirá o 20% restante ata sumar un investimento de 2,1 millóns de euros. Neste momento, o goberno local está a contratar a redacción do proxecto previo ao comezo da obra.

Esta actuación inclúe a renovación das 2.764 luminarias do municipio para a tecnoloxía Led e a renovación dos cadros de mando. José Miñones destacou que “grazas a estas actuacións o Concello de Negreira aforrará 125.000 euros anuais de factura da luz, ata un 70%, que poderá dedicar a outros servizos públicos, e reducirá o seu consumo enerxético nun 61%”.

José Miñones tamén anunciou que Negreira benefíciase da primeira convocatoria do Programa ÚNICO do Ministerio de Asuntos Económicos e Avance Dixital para a extensión da banda ancha, “unha importante aposta do Goberno para que a conexión a internet de alta velocidade chegue de verdade a todo o territorio galego en igualdade”.

En recoñecemento ao seu traballo no ámbito científico e o seu labor de divulgación, o Concello de Negreira entregou este martes 8M o distintivo á investigadora nun acto celebrado no Auditorio Centro Sociocultural diante da veciñanza negreiresa.

Minia Manteiga Outeiro é a primeira muller catedrática de Astrofísica en Galicia e cuarta académica numeraria da Real Academia Galega dás Ciencias. É pioneira e referente feminino no ámbito científico.

Ao evento asistiron o alcalde de Negreira, Manuel Ángel Leis Míguez, a concelleira de Servizos Sociais, Muller e Igualdade, María del Mar García Vidal, o portavoz do Partido Popular, Rubén Suárez Carballo; a directora e avogada do CIM, Rosa Fuentes Cambeiro, a psicóloga do CIM, María Eyo. No evento destacouse o traballo pioneiro que levou a cabo Minia Manteiga no ámbito científico, así como o seu labor de divulgación a todos os niveis, que é fonte de inspiración para as investigadoras do futuro.

Nada en Negreira, Minia Manteiga pasou os seus primeiros anos de vida entre Caracas, en Venezuela, e A Coruña. Ela mesma sinala que se interesou pola ciencia desde que era unha nena, sentindo curiosidade pola botánica, a bioquímica e todo o relacionado coa investigación espacial. Licenciouse en Ciencias Físicas na Universidade de Santiago de Compostela (USC) nunha etapa na que a presenza feminina nun campo como este era escasa.

Co Premio 8 de Marzo, o Concello de Negreira recoñece o traballo e o papel das mulleres negreiresas ao longo da historia. Un galardón que neste 2022 celebra xa a súa sexta edición e consolídase como un dos actos centrais nas reivindicacións polo Día da Muller.

O acto rematou cunhas palabras da homenaxeada, e maila actuación das alumnas da Escola Municipal de Pandeireta.