A Delegación de Cultura programou as actividades das Letras Galegas 2021 con especial fincapé no apartado da música coma o agardado regreso das actuacións ao vivo da Banda de Música Ateneo de Negreira, baixo a dirección do mestre Raúl Martín Niñerola, na que vai sela primeira actuación dende que comezou a pandemia en marzo do ano pasado. A cita vai selo sábado 15 dende as 19:00 horas na carpa instalada na Praza do Concello, con aforo limitado e medidas de control sanitario pola covid-19.

Ao día seguinte, o domingo, regresa o programa #Feireando cunha nova entrega no mesmo escenario de sempre, na carpa da Praza do Concello, onde a partir do mediodía sucederánse as actuacións da Escola Municipal de Pandeireta e inmediatamente despois, e a modo de sesión vermú, a agrupación Faíscas dá Pontraga.

Faíscas dá Pontraga fundouse en xullo de 2002, tras unirse catro amigos para participar nun concurso de cuartetos tradicionais. Esta primeira reunión deveu noutras e permitiu a incorporación de novos integrantes e instrumentos ata constituírse na “charanga tradicional” que son. En decembro de 2015 gravan o seu primeiro traballo discográfico chamado “ Velaí vén!”, que sae á luz en abril de 2016. Este disco gravouse co pretexto de seguir divulgando a cultura tradicional e sobre todo deixar constancia do seu traballo nun soporte que asegure a súa supervivencia co paso do tempo.

Aínda que Faíscas dá Pontraga son un grupo que fai música de corte tradicional, con gusto pola investigación e recuperación de temas populares recollidos a través da trasmisión oral, que logo expoñen en concerto cunha presenza principalmente instrumental e vocal, aderezan os seus directos cunha pequena mostra de baile tradicional. Recuperan e manteñen sons e melodías que nos transportan no tempo, que non no espazo, pois a súa raíz é inconfundible. Atrévesen incluso cunha cumbia.

O exército das Paxariñas

O martes 18 de maio, a partir das 18:00 horas contaremos no Centro Sociocultural da vila coa actuación de narración oral de Soraya Lema e música en directo interpretada por Adela Dios. Trátase do espectaculo "O exército das Paxariñas", recomendado para o público familiar, a partir dos catro anos. É necesario facer a reserva de praza no número: 607 153 604.

Entrega do libro "Teimas dun ninguén"

O xoves 20 de maio, ás 11:00 horas e coa presenza do alcalde de Negreira, Manuel Ángel Leis Míguez; o director xeral de Políticas Culturais, Anxo M. Lorenzo, e o presidente do xurado do noveno Certame de Poesía "Xosé M. López Ardeiro, José Antonio Ponte Far, faráse entrega da edición do poemario ao gañador da edición do ano 2020, Roberto Rodríguez González. Neste acto a celebrarse no Auditorio do Centro Sociocultural contarase coa presenza de alumnado do IES Xulián Magariños, coa lectura de poemas e a actuación musical do grupo As Maianas.

Entre outras actividades desenvolvidas pola festividade das Letras Galegas salientamos a celebración dunha charla divulgativa sobre a figura de Xela Arias, a escritora, poetisa e tradutora homenaxeada neste 2021, promovida dende o Departamento de Galego do IES Xulián Magariños, a cargo do profesor Carlos Negro, escritor e poeta, de cuxa autoría é o libro: Xela Arias, quedás en nós, editado por Edicións Xerais, no ano 2004. Cando a esta actividade, dende o Departamento de Galego levouse a cabo unha lectura radiofónica de poemas de Xela Arias e unha entrevista con Carlos Negro, emitidas a través dun especial cos estudantes en Radio Negreira, o mércores 12 de maio.

Os alcaldes de Negreira, Manuel Ángel Leis Míguez e de Ames, Blas García, reunironse hoxe cando aos técnicos municipais de ambos concellos, de cara a estudar a viabilidade do saneamento ás vivendas de A Ponte Maceira sitas no lado negreirés.

Para levar a bo porto a conexión á rede de recollida e tratamento existente no lado de Ames, estanse barallando diversas opcións como conectar as augas residuais da parte de Negreira co sistema de bombeo situado na parte amesá da Ponte Maceira mediante un topo dirixido baixo as augas do río Tambre, ou mediante unha canalización ao longo do río Tambre ata a zona próxima á depuradora que ten o Concello de Ames, en Agrón, recuperando un antigo proxecto feito con Augas de Galicia e a Dirección Xeral de Patrimonio.

Deste xeito, estanse valorando as distintas alternativas. A máis viable e menos custosa sería mediante unha conexión por debaixo do leito fluvial para conectar os dous pozos de bombeo, en ambas marxes da Ponte Vella. Agora, o Concello de Negreira elaborará o proxecto técnico para a realización do saneamento na súa parte, toda vez que a de Ames xa conta coa recollida de augas residuais.

O alcalde de Negreira, Manuel Ángel Leis Míguez, agradeceu a colaboración do Concello de Ames para solucionar o grave problema que ten a veciñanza da zona nun lugar designado como un de Los pueblos más bonitos de España.

O Concello de Negreira ante a documentación recibida no Departamento de Urbanismo referente á tramitación por parte da empresa Green Capital Power dun proxecto para instalar o parque eólico da Armada, e da empresa Norvento, da liña de evacuación de enerxía LAT66 Outes - Noia, convoca á veciñanza da parroquia de Xallas a unha reunión veciñal este sábado día 22 de maio, a partir das 19:30 horas diante do Local social.

Neste encontro aportarase información relativa a ambos proxectos con afectación na parroquia de San Pedro de Xallas e, intentarase resolver as dúbidas que poidan xurdir entre a veciñanza.

Unha persoa por casa

Debido a actual situación pola pandemia sanitaria da covid-19 prégase na medida do posible, que acoda un representante por cada casa, así como extremar as medidas de protección o máximo posible.

O Concello de Negreira e maila Dirección Xeral de Cultura aumentarán a coantía económica dos premios do Certame de poesía "Xosé M. López Ardeiro", que pasará de 1.000 a 3.000 euros no seu décimo aniversario, cuxa edición foi presentada hoxe mediante un acto no Auditorio que contou coa presenza do secretario xeral de Cultura, da Xunta de Galicia, Anxo M. Lorenzo.

Trátase dunha firme aposta por reforzar o certame na súa décima edición, a deste ano, a cal foi presentada hoxe. A Consellería de Cultura seguirá aportando a edición de 300 exemplares da obra gañadora como viña facendo dende a súa creación, e a maiores, porá unha cantidade en metálico para engadir aos mil euros (700 e 300) que viña aportando o Concello coma premio para os dous finalistas do certame.

O secretario xeral de Cultura cando ao alcalde de Negreira, Manuel Ángel Leis Míguez, presidiron o acto de entrega da edición do poemario gañador da última edición pola obra Teimas dun ninguén, cuxo autor é Roberto Rodríguez, baixo a edición de Medulia Editorial....e que como aconteceu durante o fallo do premio no pasado mes de marzo, non o puido recoller en persoa, pois atópase traballando en Tenerife, polo que faránselle chegar os exemplares.

O autor premiado sí agradeceu o premio a través dun vídeo durante o acto no que se leron poemas de Xela Arias, a autora homenaxeada neste 2021 polas Letras Galegas, a cargo de estudantes da ESO do instituto Xulián Magariños, asistindo un grupo deles ao acto, e cando a actuación das pandereteiras As Maianas, de Ames.

A Unidade Móbil 03 de Inspección Técnica de Agrícolas desplazarase ao concello de Negreira nas seguintes datas:

1 – Do 21 ó 23 de xullo, en Pesadoira (Alvite)
2 – Do 26 ó 29 de xullo, no aparcadoiro do Campo da Feira (Negreira)

O horario de atención será de 09:00 a 13:30 horas pola mañá, e de 15.15 a 18:00 horas, pola tarde, agás o día 23 e mailo 29 que será só en horario de mañá.

Para solicitar cita previa, pódese chamar por teléfono ó 902 30 90 00, ou ben a través da web: www.sycitv.com, no apartado de cita previa.

NOTA: A admisión de vehículos con características particulares estará condicionada á posibilidade de realizar as operacións de inspección regulamentarias.

 Dende o Concello de Negreira sumámonos ás mostras de pésame e fondo pesar polo recente pasamento de Xerardo Moscoso Caamaño; xinecólogo, actor, productor, cantautor, director de cinema e teatro, e activista, cuxa nai, Matilde Caamaño, era oriunda de Negreira, onde Xerardo pasaba as súas vacacións de verán sendo neno.

Licenciado en Medicina e especializado en Xinecoloxía pola Universidade de Santiago de Compostela, era director da Escola de Artes Escénicas da Universidade Autónoma de Coahuila (México), estado onde residía. Nos últimos anos traballou para a Secretaría de Cultura de México. Foi un dos fundadores da Nova Canción Galega e de Voces Ceibes (movemento contra o réxime franquista), sendo expulsado de España nove anos despois. Tivo unha longa e fructífera traxectoria no ámbito do cinema e o teatro na cidade de México, onde tivo a oportunidade de traballar cos mellores actores da súa xeración. Gañou o prestixioso Premio Xavier Villaurrutia que se entrega ás persoas que lograron desenvolver unha actividade importante no mundo do teatro.

O seu falecemento deixa un baleiro imposible de encher na difícil tarefa da promoción cultural, dos dereitos humanos e da difusión das artes.

A Delegación de Cultura presenta un avance dos artistas e datas confirmadas do Verán Cultural 2021 do Concello de Negreira, coa colaboración da Rede Cultural da Deputación da Coruña:

Andrea Pousa (sábado 10 de xullo). A cantante e actriz Andrea Pousa, nacida en Tomiño, abrirá os concertos do Verán Cultural. Con máis de 15 anos de experiencia, Andrea Pousa presenta en Negreira o seu segundo álbum en solitario titulado Retorno. Neste traballo destaca a canción “Camiñares”, cuxo vídeo promocional gravouse en localizacións do Camiño de Santiago, entre elas, a paraxe natural de A Ponte Maceira.

Sés (venres 16 de xullo).- Chega a Negreira o fenómeno musical dos últimos anos na escea galega. Liberar as arterias é o seu sétimo traballo discográfico co que segue evolucionando o seu particular son que a consagrou no máis alto, e no que se inclúe unha selección de cancións con letra e música composta pola propia cantautora coruñesa. En 2020 cruzou o charco nunha xira que a levou a Arxentina, Uruguai, Paraguai e O Salvador.

Luar na Lubre (sábado 21 de agosto).- Chega de novo a Negreira a banda máis internacional de Galicia. Levan percorrido boa parte do mundo, dende Palestina a Canadá, ou dende Arxentina a Francia. A Negreira veñen a presentar o sue último traballo: Vieiras e vieiros, historias de peregrinos, o 19 traballo discográfico da banda coruñesa, nun álbum que visualiza a pegada artística, cultural e natural do Camiño de Santiago, a través das historias de quen percorre os sendeiros: os peregrinos.

Dirixido a familias con menores de 3 anos (escolarizados) a 12 anos, o Campamento Urbano Respira que se levará a cabo durante os meses de xullo e agosto, en horario de mañá, abre a súa inscrición con prazas limitadas.

Para a adxudicación das prazas terase en conta a orde dos seguintes criterios recollidos no Regulamento do Campamento Urbano Respira (BOP 7 de maio de 2021):

1º . Familias con menores empadroados no concello de Negreira
2º. Familias que aporten informe social que indique a necesidade do servizo en base a circunstancias socioeconómicas e familiares.
3º. Familias numerosas
4º . Familias monoparentais
5º. Familias con fillas/os de mulleres vítimas de violencia de xénero
6º. Familias nas que algún das/os proxenitores teñen o eu posto de traballo no concello de Negreira

O campamento abarca desde o 1 de xullo ao 31 de agosto, podendo as familias elixir as quendas que necesiten, quedando distribuídas da seguinte maneira co seu correspondente prezo público recollido na ordenanza (BOP 19 de maio de 2021):

1ª quenda: 1 ao 15 de xullo
2ª quenda: 16 ao 31 de xullo
3ª quenda: 1 ao 15 de agosto
4ª quenda: 16 ao 31 de agosto

Prezo público

-80€/mes
-40€/quincena
-5€/día

O horario do campamento será de 8:30 a 14:30 horas. Exención e bonificación.

Segundo as circunstancias da unidade familiar aplicaranse os seguintes descontos:

1.- Exención: A emisión dun Informe Social do departamento de servizos sociais que indique a necesidade do servizo sen que haxa posibilidades económicas para abonar o custo do mesmo conlevará a exención da cota.

2.- Reducción por irmáns: Cando asistan ao mesmo servizo varios irmáns de xeito simultáneo, o segundo irmán e sucesivos terán un desconto dun 50%.

Documentación a aportar:

- Modelo normalizado de ficha de inscrición.
- DNI dos responsables do menor.
- Libro de Familia, sentenza ou resolución administrativa que acredite a relación xurídica entre ambos.

- Tarxeta sanitaria do/a menor.
- Declaración IRPF e no caso de non presentala certificación negativa.

- Xustificante bancario de ingreso do prezo público.

O persoal técnico responsable do servizo poderá requerir outra documentación complementaria ou adicional que se precise.

O desenvolvemento do campamento estará suxeito en todo momento á evolución da situación epidemiolóxica por mor do COVID-19.

As solicitudes poden presentarse no Rexistro Xeral do Concello de Negreira, na rúa do Carme, 3 baixo. Pode solicitar máis información no Centro de Información ás Mulleres de Negreira (C.I.M), solicitando cita previa no número de teléfono 981 886320/662 370 448, en horario de 9:00 h a 14:00 h de luns a venres, dende o 28 de maio ao 7 de xuño.

Dependente do Ministerio de Asuntos Económicos e Transformación Dixital, a Plataforma de Intermediación de Datos constitúe o leito natural de intercambio de datos entre as Administracións Públicas, que debe servir para liberar aos cidadáns de trámites administrativos innecesarios.

Atoparás nos adxuntos a esta información un documento sobre como acceder á información dispoñible de prestacións que constan no Rexistro de Prestacións Sociais Públicas, así como dos subsidios de incapacidade temporal, nacemento e coidado de menor.

Así mesmo, o Instituto Nacional da Seguridade Social (NSS), ofrece outros servizos que poden axilizar os trámites dos Gobernos Locais, poñendo en coñecemento dos cidadáns o modo de obter certificados de prestacións ou unha certificación negativa de pensionistas, sen saír de casa, vía SMS ou accedendo á seguinte dirección na Sede electrónica da Seguridade Social.

Os Premios Youtubeiras, organizados polos servizos de normalización lingüística de dez concellos, entre eles e dende esta edición, o Concello de Negreira; das tres universidades e da Deputación da Coruña, lanzan a súa quinta edición cos obxectivos de fomentar a creación e mantemento de canles en Youtube, así como de afondar na formación técnica para as persoas creadoras de contidos en lingua galega na Rede. Baixo o lema Magnetismo en liña, a iniciativa volverá repartir un total de 7.500 euros en premios nas doce categorías nas que se divide o certame. O concurso estará aberto a todas as persoas maiores de 14 anos con canles de Youtube en galego, autoproducidas e que teñan polo menos cinco vídeos publicados con data posterior ao 23 de outubro de 2020. O prazo de inscrición abrirase o 10 de setembro e as bases deste ano pódense consultar xa na web: www.youtubeiras.gal.

Os Premios Youtubeiras, que teñen como finalidade ser acicate da creación en Youtube con temáticas e formatos diversos, así como promover e visibilizar as/os youtubeiras/os en galego, ofrecerán unha serie de sesións formativas para procurar a mellora da calidade técnica dos vídeos por unha banda e, pola outra, para dotar as persoas creadoras de ferramentas globais para a súa actividade. Deste xeito, a formación será nesta quinta edición máis especializada que en anos anteriores.

O primeiro dos cursos en liña chegará o vindeiro 18 de xuño e correrá a cargo de Xoán Escudero, técnico de son e realizador audiovisual, que compartirá co alumnado diferentes mecanismos para perfeccionar a técnica sonora e as gravacións dos vídeos no Youtube. Ademais, ao longo do ano realizaranse outras sesións nas que se abordarán cuestións de diferente índole, como son os aspectos legais e os dereitos de propiedade intelectual ou de posicionamento da creación dixital nesta rede. A inscrición para a sesión de Son e Youtube, xa está aberta a través do formulario que se atopa na web www.youtubeiras.gal. Os cursos terán as prazas limitadas e impartiranse de forma telemática para adaptarse á situación sanitaria.

Primar as canles

Nesta quinta edición dos Premios Youtubeiras, a organización quere fomentar a creación e o mantemento de canles, polo que neste 2021 só se poderán presentar canles e non vídeos illados como en anos anteriores. Esa será a gran novidade nas bases destes V Premios Youtubeiras que, por segundo ano consecutivo, se dividen en 12 categorías: canle, vídeo, youtubeir@, calidade lingüística, impacto, calidade técnica, comunicación, creatividade, musical, didáctico, pioneiro e premio do público. Os tres primeiros acompañaranse cunha dotación económica de 1.000 euros, mentres que os nove restantes chegarán aos 500 euros.

Un xurado profesional escollerá as propostas premiadas, agás no caso do premio do público. Neste apartado, os/as seguidores/as serán quen propoñan os seus vídeos preferidos para concorrer neste apartado. As suxestións poderanse facer só a través do formulario habilitado na páxina web do proxecto Youtubeir@s>, cumprirán cos mesmos requirimentos das bases xerais e realizaranse antes do 22 de outubro de 2021.