O pasado 30 de setembro botaba a andar o Programa de emprego mocidade 2020, promovido polo Concello de Negreira en colaboración cos concellos da Baña, Santa Comba e Val do Dubra. Con 45 actuacións previstas nos catro concellos participantes e combinando cos módulos de formación teórica e práctica de ambos certificados de profesionalidade, as actuacións avanzan favorablemente.

Así, o equipo de Fábricas de albanelería rematou en Negreira as prácticas de formigón e tabicado no campo de fútbol Jesús García Calvo; un acceso para persoas discapacitadas no local social de Portor e a colocación de bancos e mesas de pedra nunha parcela tamén no lugar de Santa María de Portor. Durante este mes de xaneiro, están a traballar no baixo da cuberta do centro social e da terceira idade de San Vicenzo da Baña. Está previsto que a primeiros de febreiro actúen en Bembibre, coa ampliación da Biblioteca Municipal do Concello de Val do Dubra.

Ao mesmo tempo, o equipo de Actividades auxiliares en viveiros, xardíns e centros de xardinería xa renovou por completo o invernadoiro e os bancais con plantacións de inverno no terreo da rúa Tedelle da Baña, xunto con traballos de mantemento nas zonas verdes de San Vicenzo. Antes do Nadal, comezaron en Negreira coa limpeza e mantemento da zona axardinada da avenida de Santiago e destaca a importante renovación feita diante do Centro de Saúde e o Parque do Coto.

Renovación diante do Centro de Saúde

Esta especialidade tamén tivo a oportunidade de facer unha visita formativa ao Centro de Formación e Experimentación de Guísamo, onde se procuraba que acadasen un coñecemento maior da diferente maquinaria que se emprega en xardinería, e outra a un viveiro en Valga (Pontevedra). Durante este mes de xaneiro de 2021, continúan os traballos de poda e mantemento nos catro concellos xunto coa creación de viveiros para a obtención de planta de tempada que se utilizarán para os diferentes axardinamentos que figuran no proxecto.

Dende a dirección do Programa de emprego mocidade 2020 queren sinalar e agradecer que ambas especialidades están a contar co apoio, para o desempeño das súas tarefas, das brigadas dos concellos participantes, co servizo de mantemento de alumeados públicos da Mancomunidade de Concellos do Tambre e con Protección Civil.

 Arranxo invernadoiro na Baña

Neste primeiro trimestre, no proxecto impartiuse xa parte da formación complementaria que determina o Servizo Público de Emprego como foron as materias de alfabetización informática (30h), sensibilización ambiental (9h) e prevención de riscos laborais (60h). Tamén están a traballar, ata o mes de marzo, co módulo de sensibilización en igualdade de oportunidades entre mulleres e homes que se fai coincidir con días sinalados como foi o 25 de novembro (Día Internacional da Eliminación da Violencia contra a Muller), a publicidade sexista en campañas de Nadal ou para conmemorar, o 8 de marzo, o Día Internacional da Muller. O alumnado traballador, durante todo o proceso formativo, recibe orientación, asesoramento, información profesional e formación empresarial.

O Programa de emprego mocidade 2020 está subvencionado pola Consellería de Economía, Emprego e Industria, cofinanciado polo pola Unión Europea, a través do Fondo Social Europeo, Programa operativo de emprego xuvenil.

A Xunta de Galicia estableceu, que con data do xoves 21 de xaneiro, que o noso concello pase a nivel de restrición máximo. Este novo cambio supón:

- Hostalería aberta ata as 18:00 horas, e só co 50% de aforo na terraza. Pódese server comida para levar ata as 21:30 horas e o servizo de reparto ata as 00:00 horas

- Agrupacións de máximo 4 persoas non conviventes

- Feche establecementos comerciais ás 21:30 horas

- Restrinxida a mobilidade nocturna de 22:00 a 6:00 horas

- O territorio municipal queda fechado perimetralmente estando prohibido saír sen causa xustificada (laboral, escolar, administrativa, sanitaria...).

- As limitacións entran en vigor ás 00:00 do día 21 de xaneiro

Podes consultar as medidas que afectan ao nivel de restrición máximo en: www.coronavirus.sergas.gal

Dende o Concello de Negreira lémbrase á cidadanía a importancia de seguir as recomendacións das autoridades sanitarias de cara a minimizar a interacción social, realizar só as actividades esenciais e ter moi presentes as medidas como o uso correcto da máscara ou o lavado frecuente de mans.

O alcalde de Negreira, Manuel Ángel Leis Míguez, comunica a través dun Bando de Alcaldía, que se tomou a decisión de suspender temporalmente a feira dominical, ante a incidencia de casos producidos nos últimos 14 días pola Covid19 no noso concello, e trala xuntanza mantida coa Consellería de Sanidade, o pase a restricións de nivel MÁXIMO levou a suspendela.

Ademáis, lémbrase que seguen en vigor outras medidas adoptadas dende o pasado 17 de decembro de 2020:

- Suspensión de todas as actividades culturais e deportivas

- Suspendidas todas as escolas deportivas e culturais

- Seguen pechadas as instalacións deportivas

Solicitamos a toda a veciñanza que siga colaborando para facer fronte común ó virus, seguindo as recomendacións do Ministerio de Sanidade, da Consellería de Sanidade e do Concello de Negreira.

O departamento municipal de Servizos Sociais comunica que ata o día 26 de febreiro, a veciñanza pode solicitar a participación no programa de fisioterapia e podoloxía, con atención gratuita nos domicilios dos beneficiarios, estando dirixido a persoas maiores dependentes ou con discapacidade (recoñecida pola Xunta), e con mobilidade reducida.

Máis información e solicitudes, no departamento municipal de Servizos Sociais. Teléfono de atención: 981 885 381. O comezo está previsto para o 8 de marzo.

Este programa de fisioterapia e podoloxía a domicilio para persoas maiores dependentes, ou con discapacidade, ou mobilidade reducida do noso concello, está subvencionado pola Deputación da Coruña e mailo Concello de Negreira.

A partir da medianoite do mércores 27 de xaneiro entran en vigor as novas restricións que afectarán ao conxunto da comunidade galega coma mínimo ata o 17 de febreiro. Todos os concellos quedan con feche perimetral e só se poderá sair por cuestións laborais, educativas ou sanitarias, tal e como decidiu o goberno da Xunta de Galicia.

A mobilidade restrinxirase por tanto ao municipio en que se resida. Prohíbense tamén as reunións de non conviventes. Só se poderá saír á rúa e estar con quen se conviva.

Pecha toda a hostalaría. Bares, cafeterías e restaurantes non poderán atender na terraza. Só poderán abrir para servir produto para levar ou para entrega a domicilio. E en canto á actividade comercial, aqueles que non sexan esenciais teñen que fechar ás seis da tarde. A medida afecta tamén aos establecementos de beleza coma as peruquerrías.

Aqueles servizos esenciais, coma farmacias, talleres e supermercados, manterán o seu horario máximo de apertura ata as nove e media da noite, media hora antes do toque de recollida xeral para toda a poboación.

No relativo á práctica deportiva federada e non federada, ésta deberá ser sempre individual e ao aire libre, e sempre con máscara, incluso para correr ao aire libre. O deporte sempre no concello no que se resida. Pechan os ximnasios e centros deportivos; unha medida que afecta á Piscina Climatizada de Pedra Mámoa que non terá actividade.

Outras medidas afectan ao feche de bibliotecas, museos e espectáculos. E seguirán interrompidas as visitas ós doentes, agás menores ou dependentes.
Lembramos ca no noso concello seguen en vigor outras medidas a nivel municipal como o fechamento das instalacións deportivas municipais, a suspensión de toda actividade deportiva e cultural do concello, e maila suspensión temporal da feira dominical.

De cara a solucionar os graves problemas de inundacións en garaxes e desviar as augas pluviais recollidas da praza das Brañas cara cotas máis baixas, este luns 25 de xaneiro comezaron os agardados traballos que executa o Concello de Negreira na rúa Teresa Fabeiro. Tamén se van a solventar os problemas na deficiente rede de saneamento de augas residuais que afectan ao CEIP O Coto.

Os traballos que rematarán co reasfaltado da capa de rodadura con aglomerado en quente, contan cun orzamento de 191.406 euros con financiación da Deputación da Coruña e o Concello, obrigan a unha serie de restricións do tráfico rodado que afectan a toda a rúa que permanecerá cortada á circulación, agás residentes e servizos, e está prohibido estacionar na marxe esquerda. As obras tamén afectan á rúa entre o instituto Xulián Magariños e o colexio do Coto.

O Concello de Negreira prega á cidadanía desculpe as molestias que estas alteracións lles poidan ocasionar. O prazo de execución das obras é dun mes.

O alcalde de Negreira, Manuel Ángel Leis Míguez, comunica a través dun novo Bando de Alcaldía, que se tomou a decisión de incrementar as restricións por mor da pandemia sanitaria no ámbito municipal, polo que ás anteriores limitacións vén de sumar dúas novas como consecuencia da entrada en vigor das novas restricións dictadas pola Xunta de Galicia.

Ademáis, lémbrase que seguen en vigor outras medidas adoptadas con datas anteriores:

1ª Suspensión de todas as actividades culturais e deportivas
2ª Suspendidas todas as escolas deportivas e culturais
3ª Pechadas as instalacións deportivas
4ª Suspéndese temporalmente a feira dominical
5ª Suspéndense as clases presenciais da Escola Municipal de Música
6ª Suspéndese o uso das instalacións culturais: Biblioteca e Aula de estudo

Solicitamos a toda a veciñanza que siga colaborando para facer fronte común ó virus, seguindo as recomendacións do Ministerio de Sanidade, da Consellería de Sanidade e do Concello de Negreira.

Infórmase que a Corporación Municipal de Negreira celebrará un Pleno de carácter extraordinario, o luns, día 1 de febreiro, ás 19:30 horas, no Salón de Plenos da Casa do Concello, coa seguinte orde do día:

1º.- Plan provincial de cooperación ás obras e servizos de competencia municipal (Plan Único de Concellos) “POS+ 2021”
2º.- Plan provincial de cooperación ás obras e servizos de competencia municipal (Plan Único de Concellos) “POS+ ADICIONAL 1/2021”.
3º.- Aprobación inicial, se procede, das Bases para a convocatoria de axudas municipais de emerxencia para cubrir as necesidades básicas como consecuencia da situación de vulnerabilidade provocada pola crise económica da COVID-19.
4º.- Expediente de recoñecemento extraxudicial de crédito.

A Deputación Provincial da Coruña avanza que licitará en febreiro a segunda fase das obras de ampliación e mellora da estrada provincial DP 5602 de Negreira a Pontenafonso, ao tempo que encargará un estudo técnico para determinar a mellor solución técnica e económica para ampliar a ponte de Barbazán ou construír un novo viaducto que garanta un ancho suficiente en toda a estrada.

Así, o acordaron o presidente da Deputación, Valentín González Formoso, e mailo alcalde de Negreira, Manuel Ángel Leis Míguez, na reunión que mantiveron na sede da Deputación para abordar distintos proxectos de colaboración entre ambas administracións.

A ampliación da estrada Negreira-Pontenafonso, cun orzamento de 1,4 millóns de euros, é un dos investimentos máis importantes programados para este ano pola área de Vías e Obras da Deputación, co que cumpre o compromiso do Goberno provincial de dar continuidade ao ensache e mellora do trazado realizado nos primeiros seis quilómetros da estrada e que supuxeron unha notable mellora da seguridade.

A previsión é que os traballos podan comezar a executarse este mesmo verán. Nesta segunda fase, as obras contemplan a ampliación da plataforma da estrada nun tramo de 2,5 quilómetros que vai dende o PK 6+105 ao 8+630, preto da ponte Barbazán, dotando ao vial dunha calzada de 7 metros de ancho e arcéns de 0,5 metros naqueles puntos nos que a liña de planeamento o permita. Levaranse a cabo tamén traballos de corrección de trazado nas curvas máis perigosas, acondicionamento de drenaxe lonxitudinal e transversal da vía e sinalización.

As obras rematarán moi preto da ponte de Barbazán, onde se estreita notablemente a calzada, o que ocasiona un problema de seguridade para o que o departamento provincial de Vías e Obras buscará a mellor solución encargando un estudo técnico que determine a mellor opción para ampliar anchear o vial neste punto.

Dende a Delegación de Cultura e Deportes do Concello de Negreirra queremos anunciar a suspensión de todas as actividades do Entroido 2021, debido á actual situación de pandemia sanitaria pola Covid19 na que nos atopamos. A súa mala evolución obríganos a anunciar a cancelación da programación prevista para a semana do 12 ao 15 de febreiro.

É unha decisión tomada con responsabilidade institucional e informamos que se traballa nun programa de actos alternativos na rede, adaptado ás restricións vixentes durante os días de Entroido.

Estamos convencidos que o vindeiro ano poderemos celebrar unha festa das más importantes do noso concello e dende logo da comarca. Queremos recordar a todas as formacións que participaron no Entroido de Negreira, sobre todo ás que viñan de lugares tan lonxanos como de Portas, Vilagarcía de Arousa, Muros, Arzúa, Salceda de Caselas ou de municipios vecinos como a Baña, Teo, Santiago, Brión, Mazaricos, Outes, etc...

Non podemos esquecernos, como non, das asociacións de Negreira que todos os anos nos representan por toda Galicia con espectaculares carrozas e vistosas comparsas.

Grazas a todos e todas e, voltaremos a desfrutar do Entroido barcalés!!