A Fundación Mª Esperanza Rubido Romero efectúa unha achega de 3.000 euros para a contratación dunha profesional para levar a cabo o Programa de mellora de benestar persoal e social neste ano que estivo adaptado á actual situación sociosanitaria por mor da pandemia sanitaria da Covid19.

 

Os obxectivos deste programa foron mellorar as habilidades na área de vida no fogar, aumentar a autonomía persoal das persoas usuarias da fundación, así como identificar e expresar as emocións.

 

Dende a Fundación para a Protección de Discapacitados Psíquicos "Comarca de Barcala", agradecen a colaboración da Fundación Mª Esperanza Rubido Romero debido a que a súa situación é preocupante, xa que levan acarreando problemas económicos durante estes últimos anos.

 

No acto de sinatura participaron hoxe, o alcalde de Negreira, Manuel Ángel Leis Míguez, en calidade de presidente do Padroado da Fundación para a Protección de Discapacitados Psíquicos Comarca de Barcala, xunto con José María Varela Rial, preesidente da Fundación Mª Esperanza Rubido Romero, e mailo vicepresidente da Fundación e alcalde do Concello da Baña, José Antonio Pereira Gil.

 

Manuel Ángel Leis agradeceu esta colaboración anual, dada a importancia que ten para a Fundación "pola situación económica que está atravesando nos últimos anos, e sobre todo, a colaboración que estamos prestando os concellos de Negreira e A Baña" para manter a actividade.

 

Pola súa banda, José María Varela sinalou que a entidade barcalesa "ten preferencia fronte a outras posibles axudas que poidamos dar".

 

O Concello de Negreira vén de facer público o cadro de honra de gañadores do Concurso de decoración de Nadal, tanto na categoría de Particulares coma na de Establecementos.

 

Co obxectivo de contribuír a dinamizar e engalanar o municipio negreirés, o Concello organizou o Concurso de decoración de Nadal con dúas categorías diferenciadas: Particulares, para todo tipo de vivendas, e Establecementos, na que podían participar todo tipo de negocios abertos no territorio de Negreira. Os gañadores déronse a coñecer o venres, 18 de decembro trala valoración dos membros do xurado.

 

O xurado con dereito a voto estivo formado exclusivamente por representantes convidados das corporacións dos concellos veciños de A Baña, Ames e Brión, garantindo deste xeito a imparcialidade. Os criterios de valoración foron 3: Creatividade, Orixinalidade e Apreciación de elementos locais, con 10 puntos de máximo por cada un dos criterios.

 

Na categoría de Establecementos, os gañadores son os seguintes, con imaxes con parte das decoracións expostas:

 

1º) Las Cosas de Lía

 

 

2º) Abraham Fotógrafas

 

 

3º) A Nosa Taberna

 

 

Na categoría de Particulares, as persoas gañadoras son as seguintes, con imaxes con parte da decoración realizada:

 

1º) Uxía Pérez Ponte

 

 

2º) Silvia Fernández Blanco

 

 

3º) Mónica Romero Castro

 

 

O xurado valorou de forma moi positiva a calidade nas decoracións cunha grande creatividade e orixinalidade como factor máis común, e con moitos elementos feitos de xeito artesanal e reciclados. O apartado máis diferencial do concurso foi o de Apreciación de elementos locais, xa que non todas as persoas participantes lle deron protagonismo a este criterio.

 

O establecemento gañador, Las Cosas de Lía (Rúa do Carme, 19), destaca cunha decoración co Pazo do Cotón como protagonista do conxunto, ao que acompaña unha coidada vila de Nadal, cun pequeno tren con movemento rodeando unha fervenza con auga natural. A decoración complétase con luces e outros elementos característicos do Nadal, e unha árbore branca no fondo.

 

A vivenda gañadora, de Uxía Pérez, amósanos un conxunto ben coidado e escollido. Ademais dunhas luces de Nadal, podemos ver unha fiestra con decoración vexetal, campás, lazo e estrelas; outros motivos vexetais na entrada e unha pequena árbore e unha xesta decoradas flanqueando a fiestra máis destacada. Aquí atopamos un pequeno Belén ou Nacemento, representado na Ponte Maceira, a cal foi diferencial pola puntuación como elemento local do noso Concello.

 

Os premios entréganse este venres 18 de decembro, con 400 € para o primeiro dos establecementos, 150 € para o segundo e unha cesta de regalos cortesía de Gadis para o terceiro. Para os particulares, o primeiro levará unha tarxeta regalo (para gastar en establecementos de Negreira) de 100 €, o segundo outra tarxeta regalo (para gastar en establecementos de Negreira) de 60 €, e o terceiro unha cesta de regalos cortesía de Gadis.

 

As decoracións poderán contemplarse en establecementos e vivendas ata o 7 de xaneiro de 2021, e iranse publicando na páxina de facebook “Descubre Negreira”.

O Alcalde-Presidente do Concello de Negreira, Manuel Ángel Leis Míguez, quere mandarvos unha forte aperta nestas datas tan especiais e desexarvos a todas e todos, unhas boas festas en nome de toda a Corporación municipal.

 

Estimados veciñ@s. Aproveito para felicitarvos este Nadal e desexarvos unhas felices festas e un próspero ano novo. Darvos as gracias por todo o esforzo que fixechedes dende aquel 13 de marzo, e animarvos a que seguidades loitando xa que moi pronto, poderemos volver a facer unha vida normal e segura, abrazar os nosos seres queridos e facer todo aquel proxecto que por mor deste virus tivemos que suspender.

 

Foi un ano dificil, duro, na que perdemos a seres queridos, ilusions e a veces a esperanza era moi efímera. Por iso, estas verbas son para darvos forza, animarvos a non perder a ilusion e que recuperedes da mellor maneira posible, a alegria nestas festas.

 

Polo tanto, dende aquí, pedirvos unha vez máis precaución, responsabilidade, e bo facer. Un último esforzo para que pronto poidamos volver a nova normalidade, renacer con mais ilusión que nunca, deixando que o 2020 quede o mais alonxado posible das nosas mentes e corazón. Saúde e sorte para tod@s.

 

Felices festas!

Á vista da solicitude de tódolos Concelleiros integrantes do Grupo Municipal do Partido Popular que cumpre co disposto na normativa de aplicación e dando cumprimento ao disposto no artigo 46.2 da Lei 7/1985, de 2 de abril, Reguladora das bases do réxime, convócase un Pleno Extraordinario da Corporación Municipal de Negreira a celebrarse o vindeiro martes, día 5 de xaneiro de 2021, ás 14:00 horas no Salón de Plenos da Casa do Concello, conforme á seguinte orde do día:

1º.- Modificación da ordenanza fiscal reguladora do Imposto de Bens Inmobles do Concello de Negreira, reducindo o tipo de gravame ao 0,4%

2º.- Modificación da ordenanza fiscal reguladora sobre o Imposto de vehículos de tracción mecánica.

3º.- Modificación da ordenanza fiscal reguladora sobre Construccións e Instalacións de Obras.

4º.- Derrogación da ordenanza fiscal reguladora pola licenza de apertura de establecementos ou pola actividade de control posterior daquelas actividades sometidas a comunicación previa ou declaración responsable.

5º.- Modificación da taxa de recollida de lixo.

6º.- Modificación da taxa pola entrada de vehículos a través de beirarrúas e reservas da vía pública para aparcamento exclusivo, parada de vehículos, carga e descarga de mercadorías de calqueira clase.

7º.- Derrogación da taxa pola expedición de documentos administrativos.

 

 

 

As nenas e nenos do Concello de Negreira están convidadas e convidados, á recepción oficial que as súas Maxestades os Reis Magos de Oriente ofrecerán este martes 5 de xaneiro, no polideportivo do CEIP O Coto, en horario de 16:00 a 20:00 horas; de forma segura e evitando que se formen aglomeracións, baixo todas as medidas de seguridade.

 

Infórmase á veciñanza que o acceso ó pavillón efectuarase a través da rúa Rosalía de Castro, xusto á altura da súa confluencia coa rúa do Corzán, a través do portal de acceso do profesorado e mediante un circuito de entrada e saída, perfectamente marcado para respetar a distancia de seguridade, e sendo obrigatorio o uso de máscara de protección. Tamén se estableceu un punto de control de temperatura e desifección de mans.

 

Para velar polo correcto e normal desenvolvemento da xornada, tanto persoal voluntario de Protección Civil como axentes da Policía Local, vanse a encargar de velar pola seguridade e o cumprimento das normas, para que a recepción se desenvolva con normalidade nunha tarde de alegría e maxia para a cativada de Negreira.

 

Pregamos ás familias de Negreira que prestedes atención a todas as indicacións do persoal.

 

Infórmase á veciñanza de Negreira quedende o día 1 de xaneiro de 2021, a renovación da demanda de emprego deixa de ser automática. Para renovar dita demanda, están habilitadas as seguintes canles:

 

1. Presencialmente, nas oficinas do Concello, o cal se lle enviará a tráves de Emprego Galicia un PIN persoal e intransferible por mensaxe ou correo electrónico. No caso de non recibilo, poderán renovar mediante pegada dactilar. Disporán da colaboración de persoal do Concello, en horario de 8:00 a 15:00 horas.

 

2. Por vía telemática, na ligazón: emprego.xunta.gal

 

A renovación debe efectuarse con PIN e unha vez renovada, mandarase un xustificante ó correo electrónico que estea rexistrado na demanda de emprego, a través da aplicación Mobem para dispositivos móbiles.

 

Por último, salientar que aquelas persoas que teñan que renovar entre o 1 e o 10 de xaneiro, poderán facelo ata o día 15 deste mes.

 

A Dirección Xeral da Policía Nacional comunicou ao Concello de Negreira, as datas do ano 2021 nas que o Equipo Móvil da Comisaría da Policía Nacional de Santiago de Compostela se desprazará a Negreira para a renovación do Documento Nacional de Identidade (D.N.I.), e que son as seguintes:

 

 

A listaxe para cada renovación sempre está aberta ata chegar ao límite de prazas, que son 45 por cada día de realización do documento, e que para apuntarse é necesario chamar ao Concello: Tlf. 981 885 250

 

O horario de atención é de 09:00 a 12:30 horas.

O lugar de expedición é a planta baixa do Centro Sociocultural.

O Servizo de Voluntariado do Concello de Negreira rematou a súa campaña solidaria de agasallos de Reis, para que ningún neno e nena do noso concello quedase sen o seu xoguete e agasallo pola festividade de Reis, baixo o lema: "Por un Nadal sen diferenzas".

 

A participación nesta campaña é anónima, polo que as persoas participantes recibiron unha carta na que unha nena ou un neno, pedía varios agasallos, mercando só un deles, dun valor igual ou inferior a 30 euros.

 

Segundo informou a coordenadora do Voluntariado, Laura Platas, a resposta da veciñanza foi "moito mellor do agardado", pois cubríronse todas as demandas "dun total de 38 rapaces e rapazas de ata 14 anos de idade" de familias con menos recursos.

 

Na recepción dos agasallos, que incluiron non só xoguetes, pois tamén a rapazada solicitou prendas de roupa e de deportes, ou mesmo libros; participou a concelleira de Servizos Sociais, María del Mar García Vidal, quen agradeceu "o importante e bonito xesto solidario feito polos adultos participantes na campaña", ao tempo que felicitou aos catro voluntarios e voluntarias que colaboraron na campaña.

Dende o Concello de Negreira queremos agradecer unha vez máis a colaboración solidaria da asociación de Amas de Casa, quen entregou ao departamento municipal de Servizos Sociais que dirixe a concelleira, María del Mar García Vidal, un elevado número de xoguetes usados que foron doados a esta entidade por particulares.

 

Estes xoguetes foron entregados pola presidenta das Amas de Casa, Soledad de la Fuente, a Servizos Sociais, quen a súa vez prevé repartilos durante os cumpreanos da cativada das familias con menos recursos.

 

 

Tamén queremos agradecer a importante labor que por décimo ano consecutivo levou a cabo a asociación de Amas de Casa coa súa campaña solidaria de recollida de alimentos polo Nadal. A achega a Servizos Sociais rolda os catro mil quilos de víveres, grazas á recepción de alimentos aportados por particulares e sobre todo por negocios locais como Carnicerías Suso, que aporta en dúas quendas, un total de catrocentos quilos de carne; a cooperativa Clun, que aportou trescentos litros de leite; ou Cáritas de Santiago, quen entregou 1.500 quilos de patacas e medio cento de polos, así como Distribucións Fagín Lama SL, que aportou alimentos á campaña. 

A Xerencia da Área Sanitaria de Santiago-Barbanza programou para este domingo 17 de xaneiro, e a petición do Concello de Negreira, un cribado sanitario mediante probas PCR para un total de 775 persoas de sectores económicos coma comercio, hostalaría, talleres, e todo tipo de servizos, así como traballadores municipais.

 

O cribado levarase a cabo en horario de 9:00 a 20:30 horas, nas consultas de enfermeiría do Centro de Saúde (primeira planta), a través de dous equipos de enfermeiría desprazados a Negreira.

 

Todas as persoas anotadas previamente recibirán un SMS citándoas a unha hora concreta. Para unha mellor organización do dispositivo prégase á veciñanza que acuda á hora citada ou como máximo cinco minutos antes para evitar aglomeracións na entrada ás dependencias sanitarias.

 

Actualización de datos

Dende o Concello de Negreira queremos enviar unha mensaxe de ánimo e desexarlle unha pronta e boa recuperación, a aqueles veciños e veciñas que actualmente están diagnósticados coa enfermidade. Cómpre sinalar que a día de hoxe, venres 15 de xaneiro, son 26 os casos activos en Negreira, segundo informan as autoridades sanitarias. Na incidencia acumulada dos últimos 14 días, o Servizo Galego de Saúde (Sergas), informa hoxe de 28 contaxios detectados mediante Probas Diagnósticas de Infección Activa (PDIA).