O Concello de Negreira súmase ao loito oficial polas persoas falecidas como consecuencia da pandemia da Covid-19, decretado polo Goberno de España, amosando o noso máis sincero respeto. Este loito oficial polas vítimas da pandemia comeza hoxe e vaise prolongar ata a medianoite do vindeiro día 6 de xuño.

Por este motivo, as bandeiras oficiais da Casa do Concello e maila Casa da Cultura, continuarán ondeando a media asta en sinal de loito, mentres que hoxe 27 de maio, ao mediodía, gardouse un minuto de silencio decretado a nivel nacional, en memoria e lembranza de todas as vítimas da pandemia sanitaria, e coa participación do alcalde, Manuel Ángel Leis Míguez, así como concelleiros e concelleiras da Corporación, axentes da Policía Local e traballadores municipais.

A Consellería de Infraestructuras e Mobilidade, a través de Augas de Galicia, está a executar os traballos de limpeza nos leitos fluviais dos treitos interurbanos do río Barcala e mailo rego de Duomes, tal e como solicitoulle o Concello de Negreira, nun tramo de tres quilómetros de lonxitude, que coincide co percorrido fluvial polas parroquias de Cobas e Negreira.

 

Esta acción enmárcase no programa de mantemento e conservación que realiza Augas de Galicia no dominio público hidráulico da bacía Galicia-Costa, no ámbito territorial da zona Galicia-Centro.

 

A principal actuación consiste na retirada das numerosas árbores caídas aos cauces fluviais e que en moitos casos foron arrastradas pola forza da auga durante os pasados invernos.

O Nicrarock e a Noite Folk aprázanse para o 2021

A Delegación de Cultura e Deportes do Concello de Negreira, debido a situación sanitaria da Covid-19, vese na obriga de cancelar as dúas principais actividades musicais do programa Verán Cultural coma son os festivais Nicrarock, no mes de xullo e, a Noite Folk, en agosto.

 

A difícil situación que atravesamos, impide levar a cabo con garantías dous eventos cun gran número de asistentes nos ultimos anos, polo que despois de valorar todas as posibilidades, e despois dun exercicio de responsabilidade e sentido común, tomouse a decisión de adiar ata o 2021 os dous festivais.

 

Sabedores da difícil situación que atravesa o sector cultural, e en concreto o musical, esgotáronse todos os prazos e baralláronse distintos escenarios, chegando a conclusión de que non se podía garantir estes dous eventos nas mellores condicións.

 

Para apoiar aos grupos, comprometémonos en manter as actuacións confirmadas nesta edición para o 2021.

 

Nicrarock

Este festival que con protagonismo dos grupos galegos tiña para este ano, un cartel de luxo con SÉS, MONOLIOUS DOP E GRILO, prometía una xornada festiva no mes de xullo co selo 100% en galego.

 

Noite Folk

Despois do rotundo éxito da pasada edición, o Concello de Negreira apostaba forte por este festival coa presenza de Luar na Lubre, Treixadura e TNT.

 

O Refuxio de pescadores de Covas, terá que agardar ao vindeiro ano para desfrutar das mellores formacións do país.

 

O Concello de Negreira agradece a comprensión da veciñanza e do público, e tratará de programar para os meses estivais actividades cun formato máis pequeno que garanta actuacións coas debidas medidas sanitarias.

 

Confiamos en que o ano que vén se poidan celebrar con normalidade estes dous referentes musicais da comarca.

Poden solicitarse ata o día 11 de xuño dentro do Plan de Emprego Local (PEL) e están convocadas pola Deputación da Coruña e dirixidas a autónomos e pequenas e medianas empresas. Na liña PEL-PEMES, a Deputación financia ata o 70% do salario dun traballador/a contratado durante un período de un ano. Na liña PEL-Emprende subvenciona novos investimentos en empresas de menos de cinco anos con ata 17.500 euros.

 

O prazo de solicitudes, que fora suspendido en marzo debido ao estado de alarma, retómase de novo a partir de hoxe luns e estará aberto ata o vindeiro 11 de xuño.

 

A liña PEL-PEMES subvencionará ás pequenas empresas e autónomos con sede nos concellos de menos de 20.000 habitantes da provincia da Coruña para a contratación laboral dunha persoa en situación de desemprego durante un período de 12 meses. A Deputación financiará o 70% do soldo e a Seguridade Social do traballador contratado, ata un máximo de 15.400 euros anuais.

 

Habilítase tamén unha liña PEL-PEMES Mantemento, coa que a Deputación subvenciona o mantemento das contratacións laborais indefinidas da convocatoria anterior do programa durante un ano máis. Deste xeito, as empresas poden optar a unha nova axuda para manter o posto de traballo creado en 2019 durante 12 meses máis. Nestes casos, a Deputación financiará o 50% do soldo e Seguridade Social do traballador cun importe máximo de 11.000 euros anuais. Estes contratos son sempre de carácter indefinido.

O Concello vén de incorporar ao seu parque móbil unha retroexcavadora mixta totalmente nova, con martillo picador e unha barredora, entre outros equipamentos para realizar os traballos da Brigada Municipal de Obras.

 

 

A nova retroexcavadora foille entregada este luns 1 de xuño ao Concello mediante a subministración do contrato por un importe de 91.454 euros, a través da súa adxudicación pública no Plan POS + 2019  (Plan de Obras e Servizos), na súa anualidade de 2019.

 

Este novo equipamento vén a suprir a antiga retroexcavadora municipal con moitos anos de servizo as súas costas e pretende reforzar o traballo que desenvolve a diario a Brigada Municipal de Obras na mellora e conservación da rede viaria municipal ou, en traballos específicos para a que sexa requerida.

 

A Asociación para o Desenvolmento Rural GDR Terras de Compostela, organiza o luns 8 de xuño en Negreira, un taller formativo sobre medidas hixiénico - sanitarias fronte a Covid-19 dirixido ao sector turístico, e que pretende ofrecer os coñecementos para a posterior implantación de protocolos que eliminen ou reduzan ao máximo, o risco de contaxio por parte de hóspedes, clientes e traballadores.

 

Esta formación é de carácter gratuíto e levarase a cabo o luns 8 de xuño, de 16:30 a 19:00 horas, no Auditorio da Casa da Cultura (Carreira de San Mauro, nº 11), con aforo limitado, polo que é necesario realizar a reserva de praza por orde de inscrición.

 

As inscricións pódense realizar a través do Servizo Local de Emprego (881 035 150 / 881 035 162), ou a través da Asociación Terras de Compostela no seguinte email: Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo..

 

A Asociación Terras de Compostela informa que emitirase un certificado acreditando a asistencia á formación de medidas hixiénico - sanitarias fronte á Covid_19.

Os cidadáns que desexen acudir a algunha oficina do Catastro deberán obter con antelación, unha cita previa para ser atendidos. Pódense obter a través da Sede Electrónica (ww.sedecatastro.gob.es), o na liña directa do Catastro 902 37 36 35 / 91 387 45 50). A súa obtención é imprescindible para acudir a unha xerencia do Catastro para obter información catastral, presentar documentos ou expedientes, realizar consultas, obter notificacións, ou realizar calquera outro trámite relacionado co Catastro.

 

A implantación de esta medida resulta imprescindible para garantir o cumprimento das medidas e protocolos de seguridade dictadas polas autoridades sanitarias en relación coa Covid-19.

A Sociedade Folclórica Veiga do Cotón non se deu por vencida coa obrigada suspensión da vinteoito edición do Día da Muiñeira, que debía celebrarse este primeiro sábado do mes de xuño, atraendo ata a nosa vila, a agrupacións folclóricas de toda a provincia da Coruña como vén sendo habitual no final da primavera. Como queira que as restriccións do estado de alarma non permitían a súa celebración física, é polo que dende Veiga do Cotón e mailo Concello de Negreira, decidiuse celebrala de forma virtual este sábado.

 

O evento poderá seguirse dende a páxina de Facebook do Concello de Negreira, este sábado día 6 de xuño, a partir das seis da tarde.

 

A organización agradece a colaboración do grupo anfitrión Veiga do Cotón, así como os grupos: Terra de Ames; Churía de Zas; Rosalía de Castro, de Padrón; o ex compoñentes do grupo Eidos, da Coruña, ou a agrupación Xilbarbeira, de Boiro, entre outros grupos participantes.

Convócasen para o ano 2020, en réxime de concorrencia non competitiva, as subvencións destinadas á renovación de electrodomésticos e á instalación de domótica enerxética en vivendas situadas en Galicia por parte de persoas físicas, para promover actuacións que fomenten o aforro e eficiencia enerxética.

 

Persoas beneficiarias

As persoas físicas que realicen algunha das actuacións establecidas no artigo 3 nunha vivenda sita na CA de Galicia. Para ser beneficiario terá que tramitar a súa solicitude a través dalgunha das entidades colaboradoras adheridas que figuren na listaxe que se publique na páxina web do Inega, www.inega.gal 

 

Vixencia do plan

Do 26 de maio ao 30 de setembro de 2020 ou cando se esgoten os fondos.

 

Actuacións que se subvencionan e contía máxima das axudas

 

a) Actuación 1. Plan Renove de electrodomésticos.

É subvencionable a renovación de electrodomésticos das tipoloxías indicadas na seguinte táboa por outros novos da mesma tipoloxía e con etiqueta de clasificación enerxética A+++. No caso das placas é subvencionable a substitución da placa preexistente de calquera tecnoloxía por outra nova de indución total. Para acceder á subvención hai que entregar o electrodoméstico retirado a un xestor autorizado.

 

Un beneficiario só poderá recibir axuda pola substitución dun único electrodoméstico de cada unha das tipoloxías de equipamentos incluídos e cun máximo de dous electrodomésticos por beneficiario.

 

A cantidade da subvención non poderá ser superior ao 25 % do prezo do electrodoméstico para un consumidor xeral, do 50 % para consumidores vulnerables e do 75 % para consumidores vulnerables severos.

 

Para os efectos desta convocatoria considéranse consumidores vulnerables e vulnerables severos os que cumpran os requisitos establecidos no Real decreto 897/2017, do 6 de outubro, polo que se regulan a figura do consumidor vulnerable, o bono social e outras medidas de protección para os consumidores domésticos de enerxía eléctrica e sexan beneficiarios do bono social eléctrico (desconto do 25 % para consumidores vulnerables e de 40 % para consumidores vulnerables severos), o que deberá acreditarse mediante a presentación dunha factura de enerxía eléctrica cunha antigüidade máxima de 3 meses anteriores á data en que se presenta a solicitude de reserva de fondos.

 

b) Actuación 2. Instalacións domóticas enerxéticas.

Son subvencionables as novas instalacións de elementos domóticos enerxéticos citados na seguinte táboa e a adaptación das instalacións existentes para a súa integración efectiva:

 

• Monitorización térmica da vivenda (sensores de humidade, temperatura, CO2 e/ou radon e termóstatos comunicados cun equipamento centralizado): 500 €

• Monitorización eléctrica da vivenda (medidores de consumo, racionalizadores de potencia, actuadores para a programación de acendidos e fotocélulas comunicados cun equipamento centralizado): 500 €

 

A cantidade da subvención non poderá ser superior ao 50 % do prezo da instalación, porcentaxe que sobe ata o 65 % para consumidores vulnerables e ata o 80 % para consumidores vulnerables severos.

 

Incompatibilidade das subvencións

Estas subvencións serán incompatibles con outras axudas, subvencións ou recursos destinados á mesma finalidade, procedentes de calquera Administración ou entes públicos ou privados, nacionais, da Unión Europea ou de organismos internacionais.

 

Forma de presentación de solicitudes (IN414C)

As solicitudes subscribiranas directamente as entidades colaboradoras.

 

Na páxina web do Inega (www.inega.gal) estará dispoñible unha listaxe de entidades colaboradoras adheridas a esta convocatoria de axudas.

 

Prazo de presentación

 • Solicitudes de adhesión das entidades colaboradoras: do 26 de maio ao 30 de xullo de 2020. Para solicitar a súa adhesión a entidade colaboradora terá que cubrir e confirmar o formulario de adhesión (anexo II).

 • Solicitudes de axuda: comezará o 1 de xullo de 2020 ás 9.00 horas para a actuación 1 e o día 2 de xullo de 2020 ás 9.00 horas para a actuación 2 e rematará o 30 de setembro de 2020 ou cando se esgoten os fondos.

 

Información ás persoas interesadas

Sobre este procedemento administrativo poderase obter documentación normalizada ou información adicional a través dos seguintes medios:

1. Na páxina web do Inega e no correo electrónico Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo.

2. No teléfono 981 54 15 00.

3. Presencialmente, no Inega (rúa Avelino Pousa Antelo, 5, San Lázaro, 15703 Santiago de Compostela), con cita previa no teléfono 981 54 15 00.

 

Tras ampliar o prazo para a presentación de obras para o Certame de pintura "Negreira en cor", convocado polo Concello de Negreira, ata finais de maio, o xurado decidiu os seguintes premios no apartado de 6 a 12 anos:

 

1º Premio dotado de 200€ - "Fermoso atardecer", de Andrea Pais Souto (11 anos), de Negreira.

 

2º Premio dotado de 100€ - "Cor esperanza", de Lidia Núñez Forján (7 anos), de Luaña-Brión.

 

 

3º Premio dotado de 50€ - "A danza infinita", de Ayla Amigo Agra (11 anos), de Milladoiro-Ames.

  

 

O apartado de 13 a 18 anos, quedou deserto pola baixa participación, ao igual que o certame de contos "Cóntame un conto".

 

Dende a Delegación de Cultura agradecemos a vosa participación e vos emprazamos ao vindeiro ano 2021. Os premios serán entregados nunha próxima data por determinar, a cal será comunicada ás gañadoras.