Dende o Concello quérese agradecer á cidadanía de Negreira a responsabilidade e cumprimento das medidas de prevención para reducir o número de contaxios da Covid-19, e que a día de hoxe, venres 11 de setembro, sitúanse en 21 casos activos, logo de comezar a presente semana con 27 casos, segundo a información facilitada polas autoridades sanitarias.

Lembramos que seguen vixentes as medidas de prevención que, con carácter xeral, se estableceron no acordo do Consello da Xunta de Galicia do 12 de xuño de 2020, de cara a facer fronte á crise sanitaria desatada pola nova enfermidade, polo que cómpre seguir nesta mesma liña de responsabilidade, prevención e moita prudencia no noso día a día.

Dende a Alcaldía, Manuel Ángel Leis Míguez apela á "responsabilidade e sentidiño á hora de facer as cousas", recalcando que a situación "é a que é, e isto non rematou, polo que temos que aprender a convivir co virus", manifestou o alcalde.

As obras, en fase de licitación, suporán un investimento de 187.741,51 euros, con cargo ao Plan Único (POS+2019) da Deputación da Coruña, coa renovación do firme en agomerado en quente das avenidas de Barcala e As Brañas, no centro urbano.

As obras, en fase de licitación ata o vindeiro 5 de outubro, permitirán renovar o firme actualmente deteriorado destas céntricas rúas cunha capa de aglomerado en quente de 6 centímetros de espesor e rego de adherencia, o que mellorará a seguridade do tráfico.

Ademáis da renovación do pavimento, o proxecto incluirá o pintado das marcas viais e cebreados e a renovación da sinalización horizontal e vertical.

O Concello de Negreira está a preparar o inicio do curso 2020/2021 das Escolas Deportivas e Culturais, que debido á pandemia da Covid-19 non poderá comezar nos prazos habituais.

A Delegación de Cultura e Deportes xa conta dende o mes de agosto dun protocolo de reapertura das instalacións deportivas e culturais, pero está á espera que a Xunta de Galicia envíe o protocolo específico para as actividades culturais e deportivas.

A intención do Concello de Negreira é a de iniciar as actividades o luns 2 novembro, sempre e cando a situación epidemiolóxica sexa favorable.

Os prazos para anotarse nas actividades irá dende o 23 de setembro ata o 23 de outubro, e faránse prioritariamente de forma telemática na web municipal.

Un Bando de Alcaldía comunica á veciñanza que a partir do martes día 22 de setembro, abriranse ao público os parques infantís, as instalacións deportivas municipais e mailo Centro Sociocultural, que por precaución e ante o repunte de contaxios de coronavirus foran pechados a finais do mes de agosto.

Vista a boa evolución da situación epidemiolóxica no noso concello, queremos lembrar que é imprescindible cumprir coas recomendacións das autoridades sanitarias para previr e evitar a transmisión da Covid-19, polo que apelamos á responsabilidade individual e colectiva para o cumprimento das medidas de prevención.

Dende o Concello de Negreira infórmase ás familias que temos aberto o prazo para inscribir á rapazada no programa "Negreira Concilia Merendas", que está dirixido aos nenos e nenas cuxos titores e titoras estean traballando.

O horario é de 15:30 a 18:30 horas, e contaremos coas medidas de seguridade e prevención ante a Covid-19 e materase vixente sempre que as circunstancias o permitan.

Para anotarse tedes de prazo ata o vindeiro día 29 de setembro. Lembrade que as prazas son limitadas, tendo preferencia as persoas empadroadas no noso concello. Máis información e inscricións no Centro de Información á Muller, na pranta baixa da Casa do Concello, na rúa do Carme, 3, ou nos seguintes números de teléfono: 981 88 63 20 / 662 37 04 48.

Dende o venres 25 de setembro ata o 4 de outubro, as canchas de tenis do Complexo Deportivo Municipal de Pedra Mámoa acollen a disputa da terceira edición do Open "Vila de Negreira", de tenis, despois de que tivese que ser aprazado polas restricións debido a pandemia da Covid19.

A competición bota a andar este venres 25 de setembro coa fase previa da categoría absoluta masculina. Este ano, a pesar de non contar coa participación do gañador das dúas primeiras edicións, o asturiano Roberto Menéndez, pódese dicir que é a edición de maior nivel de xogadores, xa que todos os tenistas que entraron no cadro final atópanse entre os 450 mellores de España, entre os que se atopa o actual subcampión galego, Pedro Ecenarro; o número 1 do cadro, David Cao, así como o incombustible Tomás Currás, ou Iago Dominguez, sobriño da xogadora de Grand Slam, Lourdes Domínguez.

O terceiro Open "Vila de Negreira", conta con xóvenes tenistas en ascenso como é o caso de Ánder Tarrío ou o amiense Saúl Berdullas, veciño de Pontemaceira, quen xa participou na última edición e que o pasado ano pertencendo á categoría infantil proclamouse por partida dobre, campión galego infantil e cadete.

No cadro feminino hai un total de 16 xogadoras, contando entre elas con participantes asturianas.

O torneo complétase coas categorias +35 onde participarán os locais Jesús Mariño e Juan José Mesejo, ambos do Club de Tenis Negreira; e na categoría cadete cóntase coa participación de xóvenes tenistas que adestran nas instalacións de Pedra Mámoa como Ian Rodríguez ou Yeray Quian.

Este xoves 1 de outubro bota a andar o novo curso académico 2020/2021 coas máximas garantías de seguridade cun exhaustivo protocolo que lle foi entregado ás familias. A Escola Municipal de Música que dirixe Raúl Martín Niñerola, inicia o novo curso con 98 alumnos e alumnas matriculados, ofrecendo a maioría de clases individuais, agás as de Linguaxe musical, Iniciación, música en movemento e coro, así como conxuntos de vento e percusión, cordas, acordeóns e gaitas.

O director, Raúl Martín Niñerola, adiantou ás familias, as medidas e os protocolos que se van a implantar para evitar os posibles contaxios e a propagación da Covid-19.

O Concello de Negreira está a facer unha forte aposta por manter as actividades culturais e deportivas para a veciñanza e no caso da Escola Municipal de Música, se adoptan unha serie de medidas como que o acceso do alumnado farase polo Centro Sociocultural, ata cuxa entrada os pais e nais poderán acompañar aos seus fillos, pero non poderán acceder nin ó edificio nin ás aulas, para garantir que se cumplan todos os protocolos de seguridade. Todos os alumnos deberán acoder con máscara que só poderán quitala cando estén tocando instrumentos, agás os percusionistas, pianistas, violinistas e guitarristas que deberán levala en todo momento.

A Escola Municipal de Música de Negreira elaborou unha circular informativa sobre as entradas e saídas do centro, así como un protocolo a seguir durante o presente curso.

O Servizo de Voluntariado do Concello de Negreira lanza unha campaña de recollida de ordenadores portátiles. Se tes un ordeandor portátil obsoleto ou adquiriches un novo recentemente, doa o antigo para a formación de nenos/as de familias en risco de exclusión social, ou con fins educativos.

Para maior información sobre a campaña ou doar un equipo informático, podes achegarte á oficina do Voluntariado Social, sita na pranta baixa da casa do Concello, na rúa do Carme, 3, ou ben chamando ó número de teléfono: 664 074 674.

Dende o xoves día 1 de outubro, só en horario de tarde, o acceso do público en xeral ás instalacións e locais do Centro Sociocultural e maila Casa da Cultura, farase pola entrada do Centro Sociocultural.

O horario de apertura das instalacións culturais vai continuar sendo de 16:00 a 23:00 horas, pero a entrada farase polo Centro Sociocultural, dentro das novas normas de seguridade establecidas polo Concello de Negreira ante a pandemia da Covid-19.

No caso do alumnado e profesorado da Escola Municipal de Música de Negreira (EMMN), o acceso ás aulas e locais, xa estaba previsto a través do Centro Sociocultural, non podendo acceder os familiares quenes deberán deixar aos alumnos en dita entrada, na cal serán recollidos polo seus profesores.

A Casa da Cultura acolleu hoxe a presentación do Programa de emprego Mocidade 2020, para persoas mozas incluídas no ficheiro do Sistema Nacional de Garantía Xuvenil (SNGX), o cal terá unha vixencia de 12 meses e que comeza a súa andaina dende mañá día 1 de outubro, sendo o Concello de Negreira o seu promotor, coa colaboración dos Concellos da Baña, Santa Comba e Val do Dubra. O proxecto conta cunha achega da Consellería de Economía, Emprego e Industria, da Xunta de Galicia, que ascende a 369.492,32 euros, coa referedida finalidade de formación e aprendizaxe de 16 alumnos/as-traballadores/as.

Esta axuda enmárcase dentro do Programa Operativo de Emprego Xuvenil, Eixe prioritario 5, Prioridade de investimento 8.2, obxectivo específico 8.2.2, estando confinanciado pola Iniciativa de Emprego Xuvenil e o Fondo Social Europeo para o período 2014-2020, nunha porcentaxe do 91,89%.

O Programa de emprego "Mocidade 2020", contará con dúas especialidades formativas: Fábricas de albanelería e Actividades auxiliares en viveiros, xardíns e centros de xardinería.

O acto de presentación contou coa participación do alcalde de Negreira, Manuel Ángel Leis Míguez; o rexedor da Baña, José Antonio Pereira Gil, e mailo alcalde de Santa Comba, David Barbeira. Tamén participaron na presentación, a directora de Mocidade 2020, Alicia Blanco Sande, e maila axente de Desenvolvento Local do Concello de Negreira, Sonia Ponte Esturao.