Os cómicos Fran Rei e Pedro Brandariz estarán novamente en Negreira este venres, 29 de decembro. Desta volta traerannos o espectáculo de clown  'Menú Magnífico'.

Estes dous humoristas, integrantes da compañía 'Os sete magníficos máis un', visitarán o auditorio do Centro Sociocultural para divertir e facer rir ao público. Será ás 8 da tarde con entrada libre e para todos os públicos.

Fran Rei é cofundador, pallaso en activo e coordinador da compañía oficial do Festival Internacional de Clown de Galicia (Festiclown) 'Os sete magníficos máis un', coa que ten participado en máis de dez espectáculos desde o ano 2001. Igualmente, ten traballado noutras compañías de teatro galegas, como Bagunça Teatro, Producións Desaqueloutrdas e Acontrabutaca.

Pedro Brandariz é un dos cómicos galegos máis emerxentes. Actor, clown, monologuista, contacontos, cabareteiro... abeira o humor dende moi diferentes eidos. Procede do mundo do clown, aínda que ten traballado en compañías de teatro máis clásico, teatro infantil, etc. Tamén ten participado en espectáculos de cabaré e sobre todo como monologuista, ademais de formar parte de diversos proxectos audiovisuais.

O Concello de Negreira pón á disposición da veciñanza axudas para sufragar os gastos das vacinas de meninxite B

Están destinadas a menores de 18 anos que leven máis de 6 meses empadroados/as neste municipio. Así mesmo, non poderán superar os ingresos económicos establecidos nas bases reguladoras.

O prazo para a presentación de solicitudes irá do 2 ao 30 de xaneiro de 2018. Para obter máis información débese contactar co Departamento de Servizos Sociais do Concello de Negreira. 

A I Carreira do Turrón foi suspendida por mor do mal tempo. O Concello de Negreira deciciu cancelar este evento debido á meteoroloxía adversa que se agarda para este sábado, tendo en conta ademais que se trata dunha cita á que acoden moitos nenos e nenas.

Dende o Concello valórase moi positivamente a alta participación, xa que había unhas 150 persoas anotadas. Polo de agora a carreira queda adiada, á espera de coñecer se se vai celebrar noutra data. 

A Asociación Deportiva Nicrariense de fútbol base fíxolle entrega hoxe ao Concello de Negreira da axuda solidaria recadada o pasado sábado 23 durante a celebración do seu I Torneo de Nadal de Fútbol 8 en categoría benxamín. A recollida solidaria alcanza os 200 quilos de alimentos non percedeiros que lle foron entregados aos Servizos Sociais para o seu posterior reparto entre as familias con máis necesidades do noso concello.

No acto de entrega, que se levou a cabo nas instalacións do campo municipal de Cepelo, participaron membros da directiva de ADN encabezada polo seu presidente, Luis Arán, e contou coa asistencia do primeiro tenente de alcalde, Manuel Ángel Leis Míguez.

Esta importante axuda súmase á que está a recoller a Asociación de Amas de Casa de Negreira, dentro da súa campaña solidaria que remata o próximo día 5 de xaneiro. As persoas interesadas poden entregar alimentos non perecedeiros e produtos de hixiene e limpeza nos distintos supermercados da vila, así como os martes e os xoves, de 17:30 a 20 horas na sede que a asociación ten no edificio do antigo instituto, na rúa Castelao.

O Concello de Negreira, a través da Delegación de Cultura e Deportes, informa de que non se vai realizar o percorrido polas rúas da Cabalgada de Reis Magos de Oriente, dadas as inclemencias meteorolóxicas previstas.

Os actos serán trasladados ao pavilllón do colexio O Coto, na rúa Rosalía de Castro, onde as Súas Maxestades farán a recepción dos nenos e nenas, así como a entrega de agasallos a partir das 18h da xornada do venres.

O Concello de Negreira fixo entrega dos premios do concurso de escaparates de Nadal, e que nesta ocasión foron, segundo a valoración do xurado, para os seguintes establecementos:

1º - Confeccións Capeáns

2º - Confeccións Castro

3º - Abraham Fotógrafas

Na entrega das súas figuras de cerámica de Sargadelos participaron o alcalde, Jorge Tuñas Caamaño, e maila concelleira de Cultura, Flora Grille Novio, quenes tamén entregaron o premio aos gañadores/as do concurso de cartaces que foi para o debuxo realizado polos nenos/as da aula de 4 anos B do Ceip O Coto, coa súa mestra Mari Paz Tomé, á fronte. 

O desfile a mediodía dos nenos e nenas da Escola Infantil Municipal polas rúas da vila, marcará o pistoletazo de saída o venres 9 de febreiro, aos grandes festexos do popular Entroido 2018 do Concello de Negreira, seguido pola noite da actuación da orquestra Os Satélites, ás 23 horas, na Praza do Concello, onde haberá unha carpa.

Polo que se refire ao gran desfile de carrozas e comparsas, o sábado 10 de febreiro, hoxe mesmo ábrese a inscrición para as agrupacións interesadas en participar nun desfile que arrincará ás cinco da tarde dende o Campo da Feira para percorrer as principais rúas de Negreira, rematando diante da Casa do Concello, onde ás seis da tarde terá lugar a lectura do pregón. 

O Concello de Negreira manten a cuantía económica dos diferentes premios en metálico: 1.000; 600; 300; 150 e dous accésits de 100 euros, respeitivamente, tanto na modalidade de carrozas como na de comparsas. En grupos os premios serán de: 250; 150 e 100 euros, e na modalidade de individuais/parellas de 150, 100 e 50 euros, para os tres primeiros clasificados. En canto á modalidade de mellor copla ¨Juan Varela Areoso¨, a cuantía é de 100 euros.

Como colofón ao gran desfile de carrozas e comparsas do Entroido 2018 tralo mesmo, haberá unha entrega de premios na Praza do Concello, onde a orquestra Xacobeo amenizará a festa.

O domingo 11 de febreiro, a partir das 10 horas vaise celebrar a II Festa dos Callos que organiza a SD Negreira, baixo unha carpa instalada na Praza do Concello, e xa pola tarde, o baile de disfraces para maiores no Centro Sociocultural, a partir das sete da tarde e amenizado por un dúo musical.

O luns 12 de febreiro é a quenda para o baile e concurso infantil de disfraces, dende ás cinco da tarde no Centro Sociocultural, cuxos premios pódense consultar máis abaixo.

Por último, e como principal novidade, o Concello recupera o seu concurso de receitas de Entroido, cuxas bases pódense consultar nesta web. O fallo do xurado e entrega de premios efectuarase o sábado 17 de febreiro nun acto a desenvolverse no Centro Sociocultural, dende as sete e media da tarde. Inclúe premios para as tres mellores receitas.  

O venres 2 de febreiro no Auditorio do Centro Sociocultural, terá lugar a sétima edición consecutiva dunha gala de entrega duns premios que recoñecen os méritos deportivos entre a veciñanza do noso concello, quenes co seu esforzo e compromiso levan o nome de Negreira por toda Galicia e tamén por España adiante.

A 7ª Gala do Deporte comezará ás 21:00 horas e, ademáis dos recoñecementos aos méritos deportivos, tamén haberá actuacións musicais e exhibicións, nunha gala cunha duración aproximada de 90 minutos.

Os galardoados/as na sexta edición foron os seguintes:

Mellor deportista do 2016 - Alba Vázquez Corzón (kárate).

Mellor deportista promesa - Valeria Torreira González (Ximnasia rítmica).

Mellor equipo - Club de Tenis Negreira (Equipo +45).

Recoñecemento a traxectoria - José Manuel García Estévez (adestrador de atletismo).

Recoñecemento colaborador co deporte - Jesús Mancebo Rojo, a título póstumo.

Recoñecemento especial - Jesús Rey Ferreiro (Negreira Veteranos).

Deseñador gráfico pola Escola de Artes e Oficios Pablo Picasso, da Coruña, e enxeñoso humorista gráfico, Luis Davila é o responsable da elaboración do cartaz anunciador das grandes festas do Entroido barcalés deste 2018, do 9 ó 17 de febreiro, en que as xentes de Negreira e quenes nos visitan viven de maneira singular unha festa de arraigo popular, do propio pobo.

Luis Davila é o autor dun bo número de sorrisos diarios a través das súas tiras de humor O Bichero e O Fotomatón, nas páxinas do xornal Faro de Vigo, pero tamén fai cavilar aos seus lectores, porque coma él mesmo dí «debuxar é a miña voz, é o meu altofalante, e o meu xeito de expresarme. Recoñece que O Bichero «ten na idiosincrasia galega o seu éxito», e que vivir en Galicia «é a miña inspiración, aparte da actualidade diaria. Esta actualidade mestúroa coa nosa maneira de ver a vida. O xeito en que os galegos se toman as cousas está reflectido na miña tira».

Luis Davila xunto con Carlos Blanco, unen os seus talentos en divertidos espectáculos co público en directo. En novembro de 2016 fixérono coa estrea do ciclo Menú da fala, da Deputación da Coruña, no Auditorio de Negreira.

O actor Pepo Suevos, pregoeiro do Entroido

Comezou a súa andaina profesional coma contacontos e desde entón ten participado en multitude de longametraxes con papeis secundarios, así coma na maioría das series máis coñecidas da Televisión de Galicia, e tamén nalgúns programas da pequeña pantalla. En outubro de 2017 participou no 5º Ciclo de Monólogos de Negreira.

A súa bagaxe na pantalla grande comezou en 2002 con Entre bateas, de Jorge Coira, seguíndolle outros filmes como Ilegal (2003), de Ignacio Vilar; Máis ca irmáns (2005), de Ramón Costafreda; Heroína (2005), de Gerardo Herrero; Chapapote…o no (2006), de Ferrán Llagostera; El partido (2006), de Juan Calvo; Unha muller invisible (2007), de Gerardo Herreo; Padrolongo (2008), de Ignacio Vilar , e A esmorga (2014), de Ignacio Vilar.

En televisión participou en series de éxito como Pratos combinados; Mareas vivas; Rías Baixas; Terra de Miranda; As leis de Celavella; Hospital Central (Telecinco); Padre Casares e Matalobos, así como en programas como Luar ou O show dos Tonechos, entre outros.  

Dirixido a persoas maiores dependentes ou con discapacidade e con mobilidade reducida, o Concello de Negreira, coa financiación da Deputación da Coruña, pon en marcha un ano máis o seu programa de fisioterapia e podoloxía, con atención de balde no domicilio.

A veciñanza interesada debe solicitar os servizos no departamento municipal de Servizos Sociais, tendo de prazo até o día 21 de febreiro de 2018. Pódese obter máis información chamando ó número de teléfono: 981 88 53 81.