A vila de Negreira celebra dende o venres 9 ao domingo 11 de xullo as súas populares festas na honra a San Cristovo que desta volta contarán con tres concertos coma pratos fortes: o venres 9 coa Mekánika Rolling Band; o sábado 10 con Andrea Pousa e Sheila Patricia –ambos no patio do CEIP O Coto-, e o domingo 11 co tradicional concerto a mediodía da Banda de Música Ateneo de Negreira, na praza do Concello.

Os concertos ás 22:00 horas no Patio interior do colexio do Coto son gratuitos, se ben é necesario reservar a entrada con rexistro previo nos seguintes enlaces:

- Mekánika Rolling Band: https://bit.ly/3qNLhtV
- Andrea Pousa e Sheila Patricia:

.

O programa das festas de San Cristovo 2021 inclúe aparte das actuacións musicais ao vivo, outras propostas ben interesantes. Na xornada festiva do venres 9 teremos unha dobre cita coa actuación do mago Romarís na planta baixa do Centro Sociocultural, cun aforo máximo de 30 persoas para cada pase (20 e 21 horas), dentro da súa Xira Máxica por distintas parroquias de Negreira. É necesario anotarse para a actuación no número de teléfono: 676 454 879.

Procesión motorizada

Non cabe dúbida que un dos momentos máis esperados das festas é o da procesión motorizada de camións, autobuses e coches engalanados, o sábado despois da misa fixada para as 12.30 horas na capela do Cotón. Nesta ocasión, os profesionais do transporte volven a transitar polas rúas da vila cos seus vehículos no día do seu patrón, cuxa imaxe é transportada por un dos vehículos abrindo a procesión.

E a partir das 20:00 horas do sábado será a charanga Os Celtas e maila agrupación musical Tíralle do aire quenes poñan a nota musical coa animación de rúas.

Para rematar, o domingo dende as 09:00 horas no Campo de fútbol Jesús García Calvo vaise desenvolver a undécima proba da Liga Autonómica de Agility, onde o público poderá comprobar in situ a evolución dos cans cos seus preparadores á hora de superar unha serie de circuitos con probas de habilidade e no menor tempo posible. A entrada é gratuita ata completar o aforo disponible.

A Corporación Municipal de Negreira celebrará o luns, día 12 de xullo, ás 21:00 horas, unha sesión do Pleno, con carácter ordinario, conforme á seguinte orde do día:

1º.- Aprobación, se procede, das actas seguintes:

- Acta da sesión extraordinaria de data 12 de abril de 2021.

- Acta da sesión ordinaria de data 10 de maio de 2021.

- Acta da sesión extraordinaria de data 7 de xuño de 2021.

2º.- Dar conta dos Decretos de Alcaldía emitidos dende o último Pleno Ordinario: do nº 77/2021 ó nº 204/2021, ambos inclusive.

3º.- Dar conta das resolucións de alcaldía sobre nomeamento de Concelleira de Educación e Sanidade, Tenente de Alcalde, e membro da Xunta de Goberno Local.

4º.- Festividades locais 2022.

5º.- Incorporación de ben ao Inventario Municipal.

6º.- POS + 2019.- Ratificación, se procede, do Decreto de Alcaldía nº 167/2021, de data 19 de maio de 2021.

7º.- POS +COMPLEMENTARIO/2021.- Ratificacion, se procede, dos Decretos de Alcaldía nº 163/2021, de data 14 de maio de 2021 e nº171/2021, de data 27 de maio de 2021.

8º.- POS +COMPLEMENTARIO/2021.- Ratificacion, se procede, dos Decretos de Alcaldía nº 165/2021, de data 18 de maio de 2021 e nº174/2021, de data 1 de xuño de 2021.

9º.- Aprobación inicial, se procede, do Regulamento e Manual de identidade visual corporativa.

10º.- Aprobación provisional, se procede, da modificación da ordenanza fiscal reguladora da taxa pola recollida de lixo.

11º.- Orzamento municipal exercicio 2021.

12.- Proposta de acordo que formula o Grupo Municipal do P.P relativa a determinadas actuacións a realizar na Barquiña

O Concello de Negreira informa de que a empresa ENEL, a concesionaria do parque eólico de Corzán, acometerá a xestión da biomasa da zona ocupada polas súas instalacións, é dicir, as pistas de acceso ao parque e as franxas perimetrais de cada un dos aeroxeradores. O concello foi notificado dunha acta dirixida a administradora dende a Consellería de Medio Rural, na que se recorda a obriga de manter as súas instalacións en bo estado.

Esta obriga está recollida na lei 3/2007 do 9 de abril, no seu artigo 20 bis, de Prevención e Defensa contra os Incendios Forestais de Galicia, a cal establece que, “nas instalacións de produción de enerxía eléctrica eólica deberá xestionarse a biomasa na superficie afectada de pleno dominio e voo, de acordo co establecido no Plan sectorial eólico de Galicia, ao redor de cada aeroxerador de produción de enerxía eólica instalado.

Así mesmo, nos camiños interiores das ditas instalacións a xestión da biomasa vexetal, no estrato arbustivo e subarbustivo, farase nos cinco metros dende a aresta exterior do camiño. Neste último suposto, non se esixirá a retirada de árbores das especies sinaladas na disposición terceira.

A xestión da biomasa nas instalacións comezará nos próximos días tal e como obriga a lei mencionada anteriormente. Para calquera problema que poidan atopar os propietarios e propietarias das parcelas, poden poñerse en contacto co responsable do parque eólico, Fran, no número 672 376 186.

A Corporación municipal de Negreira gardou un minuto de silencio como acto de rexeitamento de todo tipo de violencia tralo asasinato do mozo Samuel Luiz, na cidade da Coruña. 

Os concelleiros e concelleiras expresaron a súa repulsa pola morte de Samuel ao rematar a sesión plenaria celebrada este luns 12 de xullo na Casa do Concello.

A súa Xira Máxica, que comezou en Pesadoira o pasado 4 de xullo e tivo dous pases na vila de Negreira durante as festas de San Cristovo, prosegue o seu percorrido polo concello. O mago Romarís ten catro datas confirmadas máis ao longo do verán: as máis inmediatas, no mes de xullo, terán lugar en Aro, o sábado 17, e en Logrosa, o sábado 31.

A xira continuará no mes de agosto por Covas, o día 7, Xallas, o día 8, e Portor, o día 15. Todos os pases serán celebrados nos locais sociais de cada parroquia ás 20:30 horas, cun aforo limitado. 

Á marxe destes espectáculos, o mago Romarís ofrecerá un curso de maxia para rapaces e rapazas a partir dos nove anos na primeira quincena de agosto. Será en Negreira e para grupos limitados.

A maior programación de danza de Galicia, Propulsa: Danza+Paisaxe+Patrimonio parará en A Ponte Maceira este domingo 18 de xullo con distintas actividades que se celebrarán no Pazo de Baladrón, ás oito da tarde.

Este evento do programa do Xacobeo 2021/2022, xestionada por Agadic · Xunta de Galicia, pretende enmarcar a danza e fomentar a creación contemporánea das artes do movemento en entornos de gran valor paisaxístico e patrimonial da comunidade para atraer a novos públicos, xenerar complicidade con administracións locais e crear oportunidades laborais para profesionais e compañías galegas.

O programa de espectáculos desenvolverase en 27 localidades distribuidas polas catro provincias coa exhibición de pezas de danza de profesionais. O proxecto tamén acolle a presentación de traballos de compañías convidadas de España e Portugal para, deste xeito, establecer vínculos con outros territorios profesionais

Os asistentes poderán gozar de espectáculos como “Voo” da bailarina acróbata Ánxela Blanco (30 min.); o abstracto “Feelings” de Janet Novás (18 min.); a proposta “Give it a spin” de Pisando Ovos co DJ Jas Processor (25 min.) que mestura diálogo e movemento entre un picadiscos e unha bailarina; e “Keep going” de La Macana (15 min.), un alegato á dinámica e unha mostra da esencia do movemento co corpo.

O evento é de balde pero as prazas serán limitadas, polo que os interesados en achegarse ao Pazo de Baladrón deberán inscribirse no WhatsApp do número 676 454 879 indicando os seus nomes e apelidos, DNI e un teléfono de contacto.

O servizo de Atención Temperá dos concellos de Negreira e Val do Dubra celebrou esta mañá, no Auditorio da Casa da Cultura, un pequeno acto coas familias dos rapaces e rapazas usuarias da unidade, que atende a vinte sete nenos e nenas de entre cero e seis anos en Negreira.

As traballadoras do servizo fixeron presentación dun breve vídeo que recompila varias das metodoloxías empregadas para atender á rapazada, ademais de repartir uns pequenos obsequios aos nenos e nenas. Con este acto, a unidade comeza un período de descanso ata o vindeiro mes de setembro, cando retomarán a súa actividade.

O servizo de Atención Temperá, ofrecido grazas ao convenio dos concellos de Negreira e Val do Dubra, realiza un traballo de diagnose e valoración de diversas dificultades ou trastornos de desenvolvemento en rapazas e rapaces de entre 0 e 6 anos. A unidade está integrada por profesionais da pedagoxía, psicoloxía, logopedia e fisioterapia, que traballan co fin de mellorar as capacidades comunicativas, psicomotrices e cognitivas dos nenos e nenas suxeitas ao programa.

A actividade do servizo desenvólvese de luns a mércores no edificio do antigo instituto de Negreira, na rúa de Castelao, e os xoves e venres, no Val do Dubra. A unidade permite que a rapazada que necesita desta atención non teña que pasar polas instalacións do Hospital Clínico Universitario de Santiago de Compostela, que os deriva directamente ao seu servizo local de referencia.

Volve unha nova edición dos campamentos de verán organizada polo Concello de Negreira e o departamento de Cultura e Deportes. Terán lugar en Boiro, no Albergue Xuvenil Espiñeira dende o 26 de agosto ata o 4 de setembro. Os rapaces e rapazas nados entre o 2006 e o 2010 poderán apuntarse na Casa da Cultura ou no teléfono 981 885 886 ata o día 13 de agosto.

En total, son 17 prazas dispoñibles baixo un custo de 60 euros. Os nenos e nenas que vaian asistir terán unha reunión informativa o luns 16 de agosto ás 20:30 horas no Auditorio Vello para ultimar todos os detalles sobre estas xornadas de verán.

As bolsas correspóndenlle á rapazada nada nos anos 2018, 2017 e 2016, que cursarán cuarto, quinto e sexto de educación infantil, respectivamente, nos dous colexios do concello: o CEIP O Coto e a Escola Unitaria de Aro.

O obxectivo destas dotacións, valoradas nuns setenta euros por rapaz, é facilitar ás familias con baixos recursos o acceso ao material escolar que necesiten. Estes cheques poderán ser empregados nas librarías de Negreira.

Os beneficiarios son toda a poboación residente e empadroada no concello dende hai polo menos seis meses, con escasos recursos e que non superen os baremos económicos establecidos:

• Para familias con dous convivintes o límite de ingresos é de 550 euros.
• Para as de tres convivintes, é de 700 euros.
• Para as de catro, 850 euros.
• Para as de cinco, 1000 euros.
• E para as de seis ou máis, 1150 euros.
• Ademais, no caso de que as familias teñan aluguer ou hipoteca, as cantidades poderán excederse nun máximo de 200€ mensuais.

Os impresos de solicitude estarán a disposición das persoas que así o queiran no departamento de Servizos Sociais, ao longo do mes de agosto. Para máis información poden chamar ao 881 035 159.

O obxectivo principal desta iniciativa, do Servizo de Voluntariado Social do Concello, é convocar á veciñanza do concello a doar ordenadores e outros equipos informáticos portátiles en desuso, para que poidan ser recuperados para o seu emprego durante o curso virtual.

O Concello garante a eliminación dos datos que puidesen conter os equipos cedidos. Para obter máis información ou para realizar doazóns, cómpre acudir á Oficina de Voluntariado do Concello, ou chamar ao teléfono 664 074 674.