O Concello de Negreira, no marco do seu cuarto Plan de Igualdade 2019-2022, realizou catro sesións formativas sobre igualdade de xénero ás que asistiron máis dun cento de traballadores e traballadores. Estas charlas pretenden concienciar aos e ás asistentes, sobre os estereotipos e os condicionantes de xénero que imperan na sociedade e aos que a mulleres teñen que enfrontarse.

A estas formacións que se están a celebrar ao longo da presente semana no Centro Sociocultural, acoden traballadores das oficinas municipais, dos distintos departamentos municipais, da brigada de obras, da escola infantil municipal, así como do servizo de limpeza, de axuda a domicilio, da escola de música, de conserxería, ou da Policía Local.

A participación foi maioritariamente feminina (57%). Os traballadores e traballadoras poden coñecer máis sobre os principios de igualdade entre o home e a muller, así como concienciarse sobre a situación de desigualdade e de discriminación de xénero na que se atopa a sociedade actual.

Dende o goberno municipal afirman que é unha ¨prioridade¨, loitar contra estes estereotipos sociais para mudalos dunha vez e conseguir unha sociedade xusta para todas e todos, sinalan.

O Concello pretende continuar con este tipo de accións, organizando obradoiros e charlas tamén noutros ámbitos, como pode ser o educativo.